1A sa vosa vei Mosese ko Jiova, ka kaya,
2Mo vosa vei ira na luve i Isireli, ka taura maivei ira yadua nai titoko me vaka na qase, io maivei ira kecega na nodra turaga me vaka na nodra qase, e tinikarua nai titoko: mo vola na yacana na tamata yadua e na nonai titoko:
3ia mo vola na yaca i Eroni e na nodrai titoko na Levi: ni na dua ga nai titoko mai na turaga yadua me vaka na nodra qase.
4Ia mo virikotora e na vale gatu ni veitata e na mata ni kato ni vunau, kaʼu sa veitata kina kei kemudou.
5Ia ena kubu na nonai titoko na tamata kaʼu sa digitaka: ia kaʼu na vakaotia vei au na nodra didi na luve i Isireli, era didivaki kemudrau kina.
6A sa vosa vei ira na luve i Isireli ko Mosese, a ra sa solia tauyadua vua nai titoko na nodra turaga, sa ra tauyadua na turaga, me vaka na nodra qase, e tinikarua nai titoko; a sa tu vata kei na nodrai titoko nai titoko i Eroni.
7A sa virikotora na veititoko ko Mosese e na mata i Jiova, e na vale gatu ni vunau.
8Ia e na sabogibogi sa curu ki na vale gatu ni vunau ko Mosese; ka, raica, sa kubu tu nai titoko i Eroni, a ya ni mataqali i Levi, a sa kubu tiko, ka seraka na sena, ka vuataka e so na amodi.
9A sa kauta mai ko Mosese nai titoko kecega mai na mata i Jiova kivei ira kecega na luve i Isireli: a ra sa raica, ka taura na tamata yadua na nonai titoko.
10A sa kaya vei Mosese ko Jiova, Mo kauta tale nai titoko i Eroni ki na mata ni kato ni vunau, me maroroi tu mei vakatakilakila vei ira na tamata dautalaidredre; mo muduka laivi kina vei au na nodra didi, me ra kakua ni mate kina.
11A sa kitaka ko Mosese: me vaka sa vakarota vua ko Jiova, sa kitaka vakakina ko koya.
12A ra sa vosa vei Mosese na luve i Isireli, ka kaya, Raica, keimami sa mate, keimami sa kawayali, keimami kecega sa kawayali!
13ko ira kecega sa toro vakalailai ki na vale-tikotiko i Jiova ena mate: keimami na vakaoti beka ga e na mate?
Who We AreWhat We EelieveWhat We Do
2025 by iamachristian.org,Inc All rights reserved.
