Na Tiko Voli Mai Na Lekutu 16 - AI VOLA TABU（FIJ1864）

A talaidredre i Kora, kei Tocani, kei Epirami, 1-22. Era sa cudruvi, 23-40. Era sa qai didi na tamata, ka ra sa cudruvi, 41-45. Sa mudu na mate levu, e na vuku ni sa sorovaki ira ko Eroni, 46-50.

1IA sa vakasoqona vata ko Kora na luve i Isari, na luve i Koaca, na luve i Levi, kei Tacani kei Epirami, na luve i Iliapi, kei Oni na luve i Peleci, eratou luve i Rupeni:

2a ratou sa tu cake e na mata Mosese, kei ira vata e so na luve i Isireli, era lewe rua na drau ka limasagavulu na turaga vei ira nai vavakoso, era tamata kilai e nai vavakoso, era tamata rogo:

3a ra sa soqoni vata me beitaki Mosese kei Eroni, ka kaya vei rau, Kakua soti, ni sa savasava nai vavakoso taucoko, io ko ira kece sara, a sa tiko vei ira ko Jiova: a cava drau sa laveti kemudrau cake kina vei ira nai vavakoso i Jiova?

4A sa rogoca ko Mosese, ka bale vakatobocu;

5a sa vosa vei Kora kei ira kecega na nonai tokani, ka kaya, E na sabogibogi ena vakatakila ko Jiova se ko cei sa nona, kei koya sa savasava, ia ena cakava me toro vua; ia na tamata sa digitaka ko koya, ena cakava ko koya me toro vua.

6Dou kitaka na ka o qo: Dou kauta vei kemudou e so na miqa ni ka boi vinaka, ko Kora, kei kemudou kecega na nonai tokani;

7ka viria kina na buka waqa, ka viria kina na ka boi vinaka e na mata i Jiova, e na sabogibogi: ia na tamata sa digitaka ko Jiova, ko koya ga sa savasava: kakua soti, oi kemudou na luve i Levi.

8A sa kaya vei Kora ko Mosese, Dou vakarorogo mada, na luve i Levi:

9a ka lailai beka vei kemudou, ni sa tawasei kemudou na Kalou ni Isireli maivei ira nai vavakoso ni Isireli me kauti kemudou mo dou voleka vua, mo dou kitaka na cakacaka ni vale-tikotiko i Jiova, ka me tu e na matadra nai vavakoso me cakacaka e na vukudra?

10A sa kauti iko mo voleka vua, kei ira kecega na wekamu na luve i Levi vata kei iko: ia dou sa gata tale beka na cakacaka vakabete?

11E na vuku ni ka o qo, ko iko kei ira na nomui tokani kecega, kemudou sa soqoni vata me veivala kei Jiova: ia ko cei ko Eroni, mo dou kudrukudrutaki koya kina?

12A sa talaki ko Mosese me kacivi Tacani kei Epirami na luve i Iliapi; a rau a kaya, Keirau na sega ni lako cake:

13a ka lailai beka na nomu kauti keimami cake mai na vanua ka dave kina na wai-ni-sucu kei na oni, me vakamatei keimami kina e na lekutu, mo sa mai vaka talega mo turaga levu vei keimami?

14ia ko sa sega ni kauti keimami ki na vanua sa dave kina na wai-ni-sucu kei na oni, se solia vei keimami me taukena na veiwere kei na veivaini: ko na vakamatabokotaka beka na matadra na tamata o qo? keirau na sega ni lako cake.

15A sa cudru vakalevu ko Mosese, ka kaya vei Jiova, Mo ni kakua ni donuya na nodrai madrali: au sa sega ni kovea vei ira e dua na asa, au sa sega talega ni vakacacana e dua vei ira.

16A sa kaya vei Kora ko Mosese, O iko, kei ira kecega na nomui tokani, dou mai tiko e na mata i Jiova, e na sabogibogi, ko iko, kei ira, kei Eroni:

17ia me kauta na nona miqa ni ka boi vinaka na tamata yadua, ka viria kina na ka boi vinaka, ka taura ki na mata i Jiova na tamata yadua na nona miqa, e rua na drau ka limasagavulu na miqa; ko iko talega, kei Eroni, me taura yadua na nona miqa.

18A ra sa taura na tamata yadua na nona miqa ni ka boi vinaka, ka viria kina na buka waqa, ka viria kina na ka boi vinaka, ka tu vata kei Mosese kei Eroni mai na katuba ni vale gatu ni veitata.

19Ia ko Kora sa vakasoqona nai vavakoso taucoko ki na katuba ni vale gatu ni veitata, me veileti kei rau: a sa rairai nai ukuuku i Jiova vei ira nai vavakoso taucoko.

20A sa vosa ko Jiova vei Mosese kei Eroni, ka kaya,

21Drau tawasei kemudrau mai nai vavakoso o qo, meʼu sa vakarusai ira vakasauri.

22A rau a bale vakatobocu, ka kaya, Na Kalou, na Kalou ni yalo ni tamata kecega, ni sa valavala ca na tamata e lewe dua, kemuni na qai cudruvi ira li nai vavakoso taucoko?

23A sa vosa vei Mosese ko Jiova, ka kaya,

24Mo vosa vei ira nai vavakoso, ka kaya, Dou lako tani mai na vale i Kora, kei Tacani, kei Epirami, e na veiyasana kecega.

25A sa tu cake ko Mosese, ka lako vei Tacani kei Epirami; a ra sa muri koya na qase ni Isireli.

26A sa vosa ko koya ki nai vavakoso, ka kaya, Dou lako tani mada mai na nodra vale na tamata ca o qo, ka kakua ni tara e dua na ka sa nodra, do dou vakarusai e na vuku ni nodrai valavala ca.

27A ra sa lako tani kina mai na vale i Kora, kei Tacani, kei Epirami, e na veiyasana kecega: a sa curu mai ko Tacani kei Epirami, ka tu mai na katuba ni nodrau vale, kei na watidrau, kei iratou na luvedrau tagane, kei na nodrau lalai.

28A sa kaya ko Mosese, E na ka o qo dou na kila ni sa talai au ko Jiova me kitaka na cakacaka kecega o qo; ni sa sega mai na lomaqu ga:

29Kevaka era mate na tamata o qo me vaka era daumate na tamata kecega, se ra cudruvi me vaka era sa daucudruvi na tamata kecega; sa sega ni talai au ko Jiova.

30Ia kevaka sa cakava e dua na ka vou ko Jiova, a sa dalaga na gusuna na vanua, ka tilomi ira vata kei na nodra ka kecega; a ra sa lako bula sobu ki nai bulubulu; dou na qai kila ni ra vakacudrui Jiova na tamata o qo.

31A sa yaco, ni sa vosataka oti na vosa kecega o qo, sa qai kasei na vanua era tu kina:

32a sa dalaga na gusuna na vanua, ka tilomi ira, kei na nodra veivale, kei ua tamata kecega sa tiko vei Kora, kei nai yaya kecega.

33Ko ira, kei na nodra ka kecega, sa lako bula sobu ki nai bulubulu, a sa sogoti ira kiloma na vanua: a ra yali tani mai nai vavakoso.

34Ia sa dro e na vuku ni nodra qoqolou ko ira kecega na Isireli, sa voliti ira, ni ra kaya, De tilomi keda na vanua.

35A sa lako mai na buka waqa maivei Jiova, ka kani ira na tamata e lewe rua na drau ka limasagavulu era sa cabora na ka boi vinaka.

36A sa vosa vei Mosese ko Jiova, ka kaya,

37Mo vosa vei Eliasari na luve i Eroni na bete, me laʼki tara mai na veimiqa ni ka boi vinaka mai na yasana sa kama kina, ni sa ka tabu ga; ka me biuta laivi maikea na buka waqa;

38a nodra veimiqa ni ka boi vinaka na tamata o qo sa caka ca ki na yalodra, me cakavi kina e so na ka rabailevu mei ubi ni cabocabo-ni-soro: ni ra a cabora e na mata i Jiova, a sa tabu kina na veika o qo: ia me rai vakatakilakila tiko vei ira na luve i Isireli.

39A sa kauta ko Eliasari na bete na veimiqa parasa ni ka boi vinaka, era a cabora ko ira sa kama; a sa cakavi kina e so na ka rabailevu mei ubi ni cabocabo-ni-soro:

40me ra nanuma tikoga na luve i Isireli, me kakua na tamata tani, sa sega ni kawa i Eroni, me toro yani me cabora na ka boi vinaka e na mata i Jiova; me kakua ni vakataki Kora, kei na nonai vavakoso: me vaka ka kaya vua ko Jiova e na gusu i Mosese.

41Ia e na sabogibogi, era sa didivaki Mosese kei Eroni nai vavakoso taucoko ni luve i Isireli, ka kaya, Drau sa vakamatei ira na tamata i Jiova.

42A sa yaco ni sa soqoni vata tu nai vavakoso me vakacacataki Mosese kei Eroni, era sa qai rai yani ki na vale gatu ni veitata: ka, raica, sa ubia na o, a sa rairai nai ukuuku i Jiova.

43A rau sa lako mai ki na mata ni vale gatu ni veitata ko Mosese kei Eroni.

44A sa vosa vei Mosese ko Jiova, ka kaya,

45Mo drau lako cake tani mai nai vavakoso o qo, meʼu sa vakarusai ira vakusakusa. A rau a bale vakatobocu.

46A sa kaya vei Eroni ko Mosese, Mo kauta e dua na miqa ni ka boi vinaka, ka viria kina na buka waqa mai nai cabocabo-ni-soro, ka viria kina na ka boi vinaka, ka lako vakusakusa ki nai vavakoso, ka sorovaki ira: ni sa lako yani na cudru maivei Jiova; sa vakatekivu na mate levu.

47A sa kauta ko Eroni me vaka na vosa i Mosese, ka cici yani ki loma ni vavakoso; ka, raica, sa vakatekivu na mate levu vei ira na tamata: a sa tokara ko koya na ka boi vinaka, ka sorovaki ira na tamata.

48A sa tu ko koya e na nodra maliwa na mate kei na bula; a sa mudu na mate levu.

49Ia ko ira ka ciba e na mate levu, era tinikava na udolu ka vitu na drau, ni ra sa sega ni wili ko ira sa mate e na vuku i Kora.

50A sa lesu vei Mosese ko Eroni ki na katuba ni vale gatu ni veitata; a sa mudu na mate levu.