1A SA vosa vei Mosese ko Jiova, ka kaya,
2Mo vosa vei ira na luve i Isireli, ka kaya vei ira, Ni dou sa yaco ki na vanua dou na tiko kina, o koya kaʼu sa solia vei kemudou,
3ka dou sa cabora e dua na ka sa cabori o na buka waqa vei Jiova, ai soro kama, sei soro tani me vakayacora na vavakini, so nai soro sa tubu e na lomamudou me cabora, se na nomudoui soqosoqo levu, me cakava na ka e boi vinaka vei Jiova, mai na qele ni karavau se na qele ni sipi:
4me qai kauta ga mai ko koya sa cabora na nonai madrali vei Jiova, mei madrali laukana, o dua na omeri madrai droka sa waki vata kei na painiti e rua ka levu cake ni waiwai;
5ka rua na painiti ka levu cake ni waini mei madrali liviraki, mo vakarautaka kei nai soro kama se nai soro tani, na ka ni dua na lami.
6Se me ka ni sipi tagane, mo vakarautaka mei madrali laukana e rua na omeri madrai droka sa waki vata kei na painiti e tolu ka levu cake ni waiwai;
7ia na ka mei madrali liviraki mo cabora e tolu na painiti ka levu cake ni waini, me ka boi vinaka vei Jiova.
8Ia ni ko sa vakarautaka e dua na karavau mei soro kama, se mei soro tani me vakayacora na vavakini, sei madrali e na veivinakati vei Jiova;
9me qai kau vata koi na karavau nai madrali laukana, e tolu na omeri madrai droka sa waki vata kei na painiti e lima ni waiwai.
10Ia mo kauta mei madrali liviraki e lima na painiti waini, me ka sa cabori e na buka waqa, na ka boi vinaka vei Jiova.
11Me caka vakaoqo na karavau e dua, se na sipi tagane e dua, se na lami e dua, se na luve ni koti.
12Me tautauvata kei na kedrai wiliwili na ka kemudou sa vakarautaka, dou kitaka vakakina ki na ka yadua me vaka na kedrai wiliwili.
13O ira kecega nai taukei me ra kitaka vakaoqo na ka o qo, ni sa cabora na ka sa cabori e na buka waqa, me ka boi vinaka vei Jiova.
14Ia kevaka sa tiko vulagi kei kemudou na kai tani, se na tamata tani sa tiko kei kemudou e na nomudou veitabatamata, a sa cabora na ka sa cabori e na buka waqa, me ka boi vinaka vei Jiova; me vaka na ka kemudou kitaka me kitaka vakakina ko koya.
15Ena dua ga na vunau vei kemudou sai vavakoso, kei koya na kai tani sa tiko vulagi; na vunau me tawa mudu e na nomudou veitabatamata: me vakataki kemudou ga ko koya na kai tani e na mata i Jiova.
16Ena dua ga na vunau ka dua nai valavala vei kemudou kei na kai tani sa tiko vulagi kei kemudou.
17Sa vosa talega vei Mosese ko Jiova, ka kaya,
18Mo vosa vei ira na luve i Isireli, ka kaya vei ira, Ni dou sa yacova na vanua kaʼu sa kauti kemudou kina,
19ena qai yaco, ni dou sa kania na kakana ni vanua, dou na cabora e dua nai soro e lavelaveti vei Jiova.
20Dou na cabora e dua nai buli lailai mai na madrai taumada, mei soro e lavelaveti: dou lavelaveta me vaka nai soro e lavelaveti mai na rara ni buturaki sila.
21Dou solia vei Jiova e so na nomudou madrai taumada, mei soro e lavelaveti, e na nomudou veitabatamata.
22Ia kevaka kemudou sa cala, ka sega ni vakabauta kecega na vunau o qo, sa vosataka vei Mosese ko Jiova,
23io na ka kecega sa vunautaka ko Jiova vei kemudou e na gusu i Mosese, mai na siga ka vunautaka kina ko Jiova, ka yacova na nomudou veitabatamata emuri;
24kevaka sa dua na ka sa vakacalakataki ka ra sa sega ni kila nai vavakoso, me ra qai cabora e dua na karavau sa gone ko ira nai vavakoso taucoko, mei soro kama, me ka boi vinaka vei Jiova, kei na kenai madrali laukana kei na kenai madrali liviraki, me vaka na vunau, ka dua na luve ni koti mei soro ni valavala ca.
25Me na qai sorovaki ira nai vavakoso taucoko ni luve i Isireli ko na bete, a ra na tawa cudruvi kina: ni sa vakacalaka: ia me ra kauta na nodrai madrali, na ka sa cabori e na buka waqa vei Jiova, kei na nodrai soro ni valavala ca, ki na mata i Jiova, e na vuku ni nodra vakacalaka:
26era na qai tawa cudruvi kina ko ira nai vavakoso taucoko ni luve i Isireli, kei na kai tani sa tiko vulagi kei ira; ni ra sa vakacalaka ga na tamata kecega.
27Ia kevaka sa valavala ca e na vakacalaka e dua na tamata, me na qai kauti e dua na koti alewa sa yabaki dua ga, mei soro ni valavala ca.
28Ena qai sorovaka ko na bete na tamata sa vakacalakataka, ni sa valavala ca e na vakacalaka e na mata i Jiova, me sorovaki koya, ena qai tawa cudruvi kina ko koya.
29Ena dua ga vei kemudou na vunau vei koya sa vakacalaka, sei taukei ko koya vei ira na luve i Isireli, se kai tani sa tiko vulagi vei ira.
30Ia na tamata sa valavala vakaukauwa, sei taukei se vulagi, sa beci Jiova; ia na tamata ko ya ena tawase tani vei ira na kai nona.
31E na vuku ni sa beca na vosa i Jiova, a sa vakacataka na nona vunau, ena tawase laivi na tamata ko ya; ena tauci koya na nona caka ca.
32IA ni ra a tiko lako mai na lekutu na luve i Isireli, era sa kunea e dua na tamata ni sa ca buka e na siga ni vakacecegu.
33Ia ko iratou eratou sa kunei koya ni sa ca buka tiko, eratou sa kauta vei Mosese kei Eroni, vei ira talega nai vavakoso taucoko.
34A ra sa soli koya me sogoti, ni sa sega ni matata na ka me kitaki vua.
35A sa kaya vei Mosese ko Jiova, Ena vakamatei dina ga na tamata: me ra viriki koya e na vatu nai vavakoso taucoko, mai nai bili ni koro.
36Ia ko ira nai vavakoso taucoko era sa kauti koya ki nai bili ni koro, ka viriki koya e na vatu, a sa mate kina ko koya; me vaka ka vunautaka vei Mosese ko Jiova.
37A SA vosa vei Mosese ko Jiova, ka kaya,
38Mo vosa vei ira na luve i Isireli, ka kaya vei ira me ra kitaka na ka vakai ukuuku e na bele ni nodrai sulu, e na nodra veitabatamata, ka me ra cula ki nai ukuuku e na bele ni sulu, e dua na wa karakarawa:
39ia ena dua na ka vakaiukuuku vei kemudou, mo dou raica, ka nanuma na vunau kecega i Jiova, ka cakava; ia mo dou kakua kina ni gadreva me muria na lomamudou, kei na matamudou, dou a daulako vakatani kina me muria:
40mo dou nanuma kina, ka cakava na noqu vunau kecega, mo dou tabu kina me nona na nomudou Kalou.
41Sa ko Jiova koi au na nomudou Kalou, ko koya ka kauti kemudou mai na vanua ko Ijipita, meʼu nomudou Kalou: sa ko Jiova koi au na nomudou Kalou.
Who We AreWhat We EelieveWhat We Do
2025 by iamachristian.org,Inc All rights reserved.
