Na Tiko Voli Mai Na Lekutu 14 - AI VOLA TABU（FIJ1864）

Era sa didi na tamata e nai tukutuku, 1-4. Erau via vakacegui ira ko Kalepi kei Josua, 5-10. Sa kaya na Kalou me cudruvi ira, a sa kakua ga e na masumasu i Mosese, 11-25. Era sa vakatatabui na tamata ka didi, me ra kakua ni lako ki Kenani, 26-35. Sa yaviti iratou na tamata ka tukutuku vakaca ko Jiova, 36-38. Era sa yaviti e nai valu na tamata sa talaidredre, 39-45.

1A ra sa laveta cake na domodra ka qoqolou nai vavakoso taucoko; a ra sa tagi na tamata e na bogi ko ya.

2A sa didivaki Mosese kei Eroni ko ira kecega na luve i Isireli: a ra sa kaya vei rau nai vavakoso taucoko, E ca ni da a sega ni ciba mai na vanua ko Ijipita! se ca ni da a sega ni ciba e na lekutu o qo!

3ia sa kauti keda mai ko Jiova e na vuku ni cava ki na vanua o qo, me da bale kina e nai seleiwau, me ra bobulataki na watida kei na luveda? sa sega li ni vinaka me da lesu tale ki Ijipita?

4A ra sa veikayaki vakai ira, Tou lesia mada e dua na turaga, me da lesu tale ki Ijipita.

5Erau a qai bale vakatobocu ko Mosese kei Eroni e na matadra nai soqosoqo taucoko ni vavakoso ni luve i Isireli.

6Ia ko Josua na luve i Nuni, kei Kalepi na luve i Yifune, maivei iratou na rai vanua, erau a dresuka na nodraui sulu:

7a rau sa vosa vei ira nai vavakoso taucoko ni luve i Isireli, ka kaya, Na vanua keitou a lako basika me raica vakavinaka, sa vanua vinaka vakaidina:

8kevaka sa marautaki keda ko Jiova, ena vakayacori keda ki na vanua o qori, ka solia vei keda; a vanua sa dave kina na wai-ni-sucu kei na oni:

9ia dou kakua ni talaidredre vei Jiova, dou kakua talega ni rerevaki ira na lewe ni vanua, ni ra sa keda madrai: sa lako tani vei ira na nodra kaukauwa, a sa tiko kei keda ko Jiova: dou kakua ni rerevaki ira.

10Ia nai vavakoso taucoko era kaya me viriki rau e na vatu.

A sa rairai mai e na vale gatu ni veitata nai ukuuku i Jiova vei ira kecega na luve i Isireli.

11A sa kaya vei Mosese ko Jiova, A cava tale na kena dede me ra vakacudrui au tiko na tamata o qo? ia evei na gauna era na vakabauti au kina, e na vuku ni vakatakilakila kecega kaʼu sa cakava oti e na kedra maliwa?

12Au na yaviti ira e na mate levu, ka vakuai ira, ia kaʼu na cakavi iko me matanitu e levu cake ka kaukauwa cake vei ira.

13A sa kaya vei Jiova ko Mosese, Era na qai rogoca na kai Ijipita, (ni ko a kauti ira mai na tamata o qo mai na kedra maliwa e na nomu kaukauwa,)

14a ra na tukuna ki na lewe ni vanua o qo: era sa rogoca oti, i Jiova, ni kemuni sa tiko kei ira na tamata o qo; ni ra sa veiraici mata, i Jiova, kei kemuni; ni sa vakarurugi ira tiko talega na nomuni o; ni kemuni sa liutaki ira talega, e na duru o e na siga, kei na duru buka waqa e na bogi.

15Ia kevaka kemuni sa vakamatei ira na tamata o qo me vaka era tamata e lewe dua, era na qai vosa ko ira na veimatanitu era sa rogoca na kemuni rogorogo, ka kaya,

16E na vuku ga ni sa sega ni kauti ira rawa ko Jiova na tamata o qo ki na vanua ka vosavavakini kina vei ira, sa vakamatei ira kina ko koya e na lekutu.

17Ia o qo, me levu mada na kaukauwa ni noqu Turaga, me vaka na nomuni vosa, ni kemuni a kaya,

180 Jiova sa vosovoso vakadede, ka sa levu na yalovinaka, a sa tawa cudruvaka na caka ca kei na talaidredre, ia sa sega ga ni vakadonuya kece; sa cudruvaka na nodra caka ca na qase vei ira na luvedra, ka yacova nai katolu ni tabatamata, kei na kenai kava.

19Mo ni kakua mada ni cudruvaka na nodra caka ca na tamata o qo, me vaka na kena levu ni nomuni yalovinaka, me vaka talega na nomu tawa cudruva na tamata o qo, ka vakatekivu mai Ijipita ka yacova na siga o qo.

20A sa kaya ko Jiova, Au na tawa cudruva, me vaka na nomu vosa:

21ia me vaka na kena dina na noqu bula, kei na roboti vuravura nai ukuuku i Jiova;

22ko ira kecega na tamata, era sa raica oti na kequi ukuuku, kei na noqu veivakataki-lakila kaʼu a kitaka mai Ijipita kei na lekutu, a sa vakatini ga na nodra vakatovolei au vakaca, ka sa sega ni vakarorogo ki na domoqu;

23era na sega sara ni raica na vanua kaʼu a vosavavakini kina ki na nodra qase; kei ira kecega era a vakacudrui au era na sega ni raica:

24ia na noqu tamata ga ko Kalepi, e na vuku ni sa dua tani na yalona, a sa muri au tikoga, au na vakayacori koya ki na vanua ka lako kina ko koya; a ra na taukena ko ira na nona kawa.

25(Ia ko ira na luve i Amaleki kei ira na luve i Kenani era a tiko mai na vanua buca.) Dou lesu yani e na sabogibogi, ka lako ki na lekutu e na sala ki na asa Damudamu.

26A sa vosa vei Mosese kei Eroni ko Jiova, ka kaya,

27Me vakaevei na kena dede ni vavakoso ca o qo, era daudidi vei au? au sa rogoca na nodra didi na luve i Isireli, era sa didi kina vei au.

28Mo kaya vei ira, Sa kaya ko Jiova, Me vaka na kena dina na noqu bula, au na kitaka vei kemudou me vaka dou sa vosa e na daliga-qu:

29ena bale e na lekutu o qo na yagomudou; ia ko ira kece vei kemudou sa wili, me vaka na nomudoui wiliwili kecega, sa ruasagavulu na nodra yabaki ka levu cake, oi kemudou sa didi vei au,

30dou na sega sara ni yaco ki na vanua a ya kaʼu a laveta na ligaqu me vakatikori kemudou kina, o Kalepi ga na, luve i Yifune, kei Josua na luve i Nuni:

31ia ko ira ga na nomudou lalai, dou a kaya era na bobulataki, au na vakayacori ira kina, a ra na kila na vanua dou a beca:

32ia koi kemudou, ena bale na yagomudou e na lekutu o qo:

33ia ko ira na luvemudou, era na lako sese e na lekutu me vasagavulu na yabaki, ka tarogi e na vuku ni nomudou lako vakatani, me malai mada na yagomudou e na lekutu.

34Me vaka nai wiliwili ni siga kemudou a raica vakavinaka kina na vanua, io na siga e vasagavulu, e dua na i yabaki mei sau ni dua na siga, dou na cudruvi tiko e na vuku ni nomudoui valavala ca, io me vasagavulu na yabaki; ia dou na kila na noqu veivutuni.

35Oi au ko Jiova, au sa vosataka, au na kitaka vakaidina na ka o qo ki nai vavakoso ca taucoko o qo, era sa soqoni vata me veivala kei au; e na lekutu o qo era na oti kina, ia maikea era na mate kina.

36Ta ko iratou na tamata sa tala ko Mosese me raica vakavinaka na vanua, a ratou sa lesu, ka kitaki ira nai vavakoso taucoko me ra didi vua, ni ratou a vakarogocataka na vanua ko ya,

37io ko iratou na tamata ka ratou a vakarogocataka na vanua, eratou a ciba e na mate levu e na mata i Jiova.

38Ia ko Josua na luve i Nuni, kei Kalepi na luve i Yifune, maivei iratou na tamata ka laʼki raica vakavinaka na vanua, erau sa bula.

39A sa tukuna na vosa o qo ko Mosese vei ira kece na luve i Isireli; a ra sa tagi vakalevu na tamata.

40A ra sa sou e na mataka caca, ka cabo ki ua dela ni ulu-ni-vanua, ka kaya, Raica, koi keimami; ia keimami na lako cake ki na yasana ka yalataka ko Jiova: ni keimami a kitaka nai valavala ca.

41A sa kaya ko Mosese, A cava dou sa vakacacataka kina na vunau i Jiova? ia ena sega ga ni yaco.

42Mo ni kakua ni lako cake, ni sa sega ni tiko kei kemudou ko Jiova; mo dou kakua kina ni yaviti e na matadra na nomudou meca.

43Ni ra sa tiko maikina e na matamudou na luve i Amaleki kei na kai Kenani, ia dou na bale e nai seleiwau: e na vuku ni kemudou sa vuki tani vei Jiova, ena sega kina ni tiko kei kemudou ko Jiova.

44Ja ka ra sa doudou mo cabo ki dela ni ulu-ni-vanua: ia ko Mosese koi na kato ni veiyalayalati i Jiova, sa sega ni lako tani mai na loma ni tikotiko.

45Era sa qai lako sobu na luve i Amaleki kei na kai Kenani era tiko e na ulu-ni-vanua ko ya, ka yaviti ira, ka vakubutaki ira ka yacovi Orima.