Na Tiko Voli Mai Na Lekutu 13 - AI VOLA TABU（FIJ1864）

Eratou sa talai e so me raica vakavinaka na vanua, 1-20. A nodratoui lakolako, 21-25. A nodratoui tukutuku, 26-33.

1A SA vosa vei Mosese ko Jiova, ka kaya,

2Mo tala na tamata e so, me ratou raica vakavinaka na vanua ko Kenani, o koya kaʼu sa solia vei ira na luve i Isireli: me dua na tamata mai na yavusa yadua ni nodra qase mo dou talai iratou, me ratou turaga kecega vei ira.

3A sa talai iratou mai na lekutu mai Perana ko Mosese me vaka na vosa i Jiova: eratou sa turaga kecega na tamata o qori vei ira na luve i Isireli.

4A sa vakaoqo na yacadratou: Mai na yavusa i Rupeni, ko Samua na luve i Sakuri:

5mai na yavusa i Simioni, ko Safati na luve i Ori:

6mai na yavusa i Juta, ko Kalepi na luve i Yifune:

7mai na yavusa i Isakari, ko Ikiali na luve i Josefa:

8mai na yavusa i Ifireimi, ko Osea na luve i Nuni:

9mai na yavusa i Penijamini, ko Paliti na luve i Rafu:

10mai na yavusa i Sepuloni, ko Katieli na luve i Soti:

11mai na yavusa i Josefa, io mai na yavusa i Manase, ko Kati na luve i Susi:

12mai na yavusa i Tani, ko Amieli na luve i Kimali:

13mai na yavusa i Aseri, ko Sicuri na luve i Mikaeli:

14mai na yavusa i Nafitali, ko Napi na luve i Vofisi:

15mai na yavusa i Kata, ko Kueli na luve i Maki.

16Sa vakaoqo na yacadratou na tamata sa tala ko Mosese me raica vakavinaka na vanua. Ia ko Josua na yaca sa vakatokai Osea kina, na luve i Nuni, ko Mosese.

17A sa talai iratou ko Mosese me raica vakavinaka na vanua ko Kenani, a sa kaya vei iratou, Dou lako cake e na sala o qo ki na mata ni ceva, ka cabe ki na ulu-ni-vanua:

18ka raica na vanua, se vakaevei; kei ira na tamata era tiko kina, se ra kaukauwa se malumalumu, se ra lewe lailai se lewe vuqa;

19ka vakaevei na vanua era sa tiko kina, se vinaka se ca; ka vakaevei na Veikoro era sa tiko kina, se vaka nai tikotiko, se koro kaukauwa;

20ka vakaevei na vanua, se qele vinaka se ca, se tu kina na kau, se segai: ia dou gumatua, dou kauta talega mai e so na vua ni vanua. Ia na vula ko ya na vula sa dreu kina na vua ni vaini taumada.

21A ratou a lako cake ka raica vakavinaka na vanua, ka vakatekivu mai na lekutu ko Sini ka yacovi Riopi, ki na sala sa curu ki Emaci.

22A ratou a lako cake e na yasana sa donuya na ceva, ka lako ki Epironi, eratou sa tiko kina ko Eiimani, ko Sesei, kei Talimei, na luve i Anaki. (Ia ko Epironi sa tara oti ka yabaki e vitu, sa qai tara ko Soani mai Ijipita.)

23A ratou sa yaco mai ki na buca ko Esikoli, a sa cebeta maikina e dua na taba sa dua kina nai yawa vaini, a rau sa kauta na lewe rua, ni rau veisalai e nai vua; e so talega na lolo, kei na vua ni kau tani.

24Sa vakatokai na tikina ko ya na buca ko Esikoli, e na vuku ni yawa vaini eratou a cebeta maikina na luve i Isireli.

25A ratou a lesu mai na nodratou raica vakavinaka na vanua ni sa oti na bogi e vasagavulu.

26A ratou a lako ka yaco vei Mosese, kei Eroni, kei nai vavakoso taucoko ni luve i Isireli, ki na lekutu mai Perana, ki Ketesa; ka laʼki tukutuku vei rau, vei ira kece talega nai vavakoso, ka vakatakila vei ira na vua ni vanua.

27A ratou a tukuna vua, ka kaya, Keitou a lako ki na vanua ko a talai keitou kina; a sa dave kina na wai-ni-sucu kei na oni; ia sa o qo na vuana:

28sa dina ya, ko ira na tamata sa tiko e na vanua era sa kaukauwa, a sa viri na Veikoro, sa levu sara: keitou a raici ira talega kina na luve i Anaki:

29era sa tiko e na vanua sa donuya na ceva ko ira na Amaleki; kei ira na luve i Eci, kei ira na kai Jepusa, kei ira na luve i Amori, era tiko mai na ulu-ni-vanua; a ra sa tiko na kai Kenani e na baravi, kei na bati ni Joritani.

30A sa vakaruruvi ira na tamata ko Kalepi e na mata i Mosese, ka sa kaya, Me da lako cake sara, me da taukena; ni sa rawarawa me da vakamalumalumutaka.

31Ia ko iratou na tamata eratou lako kaya, eratou sa kaya, Eda sa sega ni lako cake rawa me veivala kei ira na tamata; ni ra sa kaukauwa a sa malumalumu ko keda.

32A ratou a kauta mai nai tukutuku ca vei ira na luve i Isireli, e na vuku ni vanua eratou a laʼki raica vakavinaka, a ratou kaya. Na vanua keitou a lako basika me raica vakavinaka, a vanua sa kania na lewena; kei na tamata kecega keitou a raica kina, era tamata yagolevu:

33ia keitou a raica kina na tamata yagolevu sara, na luve i Anaki, era kawa ni tamata yagolevu sara; ia keitou sa vaka na vodre e na mata i keitou, ka sa vakakina e na matadra.