Na Tiko Voli Mai Na Lekutu 12 - AI VOLA TABU（FIJ1864）

Sa vosavakacacataki Mosese ko Eroni kei Miriami, 1-3. Sa vunauci rau ko Jiova, 4-9. Sa vukavuka mai ko Miriami, 10; a sa veivutuni ko Eroni, 11, 12; sa qai masu ko Mosese, a sa bula ko Miriami, 13-15.

1A SA vosavakacacataki Mosese ko Miriami kei Eroni, e na vuku ni alewa ni Kusa sa vakawati kina ko koya: ni ka veiwatini kaya e dua na alewa ni Kusa.

2A rau a kaya, Sa vosa li vei Mosese duaduaga ko Jiova? sa sega ni vosa talega vei keirau beka? A sa rogoca ko Jiova. (

3A sa yalomalumalumu cake na tamata ko Mosese, vei ira na tamata kecega sa tiko e na dela i vuravura.)

4A sa vosa vakasauri mai ko Jiova vei Mosese, kei Eroni, kei Miriami, Oi kemudou na lewe tolu, dou lako mai ki na vale gatu ni veitata. A ratou sa lako mai na lewe tolu.

5A sa lako sobu mai ko Jiova e na duru o, ka sa tu mai na katuba ni Vale gatu, a sa kacivi Eroni kei Miriami: a rau a lako ruarua mai.

6A sa kaya ko koya, Drau rogoca mada na noqu vosa: Kevaka sa tiko kei kemudou e dua na parofita, oi au ko Jiova, au sa vakatakilai au vua e na raivotu, au sa vosa vua e na tadra:

7sa dua tani ko Mosese na noqui talatala: sa yalodina e na vuku ni noqu vale kece:

8au na vosa vakagusu ga vei koya, ka vakarairai, ka sega ga e na vosa butobuto; ena raica talega ko koya nai vakatakarakara i Jiova: e vakaevei ni drau a sega kina ni rere ni vosavakacacataki Mosese na noqui talatala?

9A sa waqa mai vei rau na cudru i Jiova; a sa lako yani ko koya.

10A sa lako tani na o mai na Vale gatu; ka, raica, sa vukavuka mai ko Miriami, a sa vaka na uca-vulavula: a sa rai vuki vei Miriami ko Eroni, ka, raica, sa vukavuka.

11A sa kaya vei Mosese ko Eroni, Ule, noqu turaga! mo kakua mada ni cudruvaka vei keirau nai valavala ca, keirau sa cakacaka vakalialia kina, ka sa valavala ca kina:

12me kakua mada ni tautauvata ko koya kei na dua sa mate, a sa vuca e so na lewena ni sa lako mai na kete i tinana.

13A sa tagi vei Jiova ko Mosese, ka kaya, Mo ni vakabulai koya mada, na Kalou.

14A sa vosa vei Mosese ko Jiova, Ena sega beka ni madua ka bogi vitu na alewa, kevaka ka kasivita vakalailai na matana ko na tamana? me sogoti tani ko koya mai nai tikotiko me bogi vitu, ka sa oti me qai kauti tale mai kina.

15Asa sogoti tani mai nai tikotiko ko Miriami ka bogi vitu: a ra sa sega ni lakolako na tamata, ka me kauti tale mada mai ko Miriami.

16A sa oti, era sa qai toki na tamata mai Eseroci, ka laʼki tiko e na lekutu mai Perana.