1A RA sa didi na tamata, a sa cata ko Jiova: a sa rogoca ko Jiova; a sa waqa mai na nona cudru; a sa kama voli na buka i Jiova e na kedra maliwa, a sa kani ira e so e nai yalayala ni tikotiko.
2A ra sa tagi vei Mosese na tamata; a sa vakamamasu vei Jiova ko Mosese, a sa boko na buka.
3A sa vakatoka ko koya na yaca ni yasana ko ya ko Tapera: e na vuku ni sa kama voli na buka i Jiova e na kedra maliwa.
4Era sa qai kusikusima na tamata sa dui kaikai era sa tiko vata kei ira: a ra sa ia tale na tagi ko ira talega na luve i Isireli, a ra sa kaya, Ko cei me vakani keda e na lewe ni manumanu?
5eda sa nanuma tiko na ika, eda a kania vakailoa mai Ijipita; na kukuba, kei na meloni, kei na liki, kei na varasa, kei na kari-liki:
6ia o qo, sa mamaca mai na yaloda: sa sega na ka e na matada, ko na mana walega. (
7Ia na mana sa vaka na sore ni koriada, kei na rokana sa vaka na roka ni mata-ni-civa.
8Era a lako voli na tamata ka tomitomika, ka vurumemea e nai varo varo ni madrai, se vutuka e na bilo, ka vavia e na bilo, me bulia: ia ni sa tovolei, sa vaka na kakana sa caka vata kei na waiwai.
9Ia ni sa miraka nai tikotiko na tegu e na bogi, sa qai qeqera mai ki delana na mana.)
10A sa rogoca na nodra tagi na tamata ko Mosese e na nodra veimataqali, a tamata yadua mai na katuba ni nona vale: a sa waqa vakalevu na cudru i Jiova; a sa cata talega ko Mosese.
11A sa kaya vei Jiova ko Mosese, A cava ko ni sa vakararawataki koya kina na nomu tamata? ia na cava ko ni sa sega ni lomani au kina, kemuni sa tauca kina vei au na kedrai colacola bibi na tamata kecega o qo?
12era sa sucu beka vei au na tamata kecega o qo? seʼu sa vakasikavi ira, mo ni kaya kina vei au, Mo keveti ira voli e na lomaseremu, me vaka ni sa keveta na luvena sa sucu tiko e dua na tamata—ki na vanua ko a vosavavakini kina ki na nodra qase?
13Au na rawata maivei na lewe ni manumanu, meʼu solia vei ira kecega na tamata o qo? ni ra sa tagi mai vei au, ka kaya, Mo solia vei keimami na lewe ni manumanu me keimami kania.
14Au sa sega ni rawata me kauti ira kecega na tamata o qo vakai au ga, ni sa bibi vei au.
15Ia kevaka kemuni sa cakacaka vakaoqo vei au, mo ni vakamatei au sara mada, kevaka kemuni sa lomani au; ia meʼu kakua ni kunea na noqu ca.
16A sa kaya vei Mosese ko Jiova, Mo soqona vata vei au e lewe vitusagavulu maivei ira na qase ni Isireli, o ira ko sa kila era sa qase vei ira na tamata, ka turaga vei ira; ka kauti ira ki na vale gatu ni veitata, me ra tu kina kei iko.
17Ia kaʼu na lako sobu ka vosa maikina vei iko: ia kaʼu na kauta na Yalo sa tiko vei iko, ka solia maikina vei ira; ia era na colata vata kei iko na kedrai colacola bibi na tamata, mo kakua kina ni colata vakai iko ga.
18Ia mo kaya vei ira na tamata, Dou vakasavasavataki kemudou ka waraka na sabogibogi, dou na qai kana lewe ni manumanu: ni dou sa tagi e na daliga i Jiova, ka kaya, Ko cei me vakani keda e na lewe ni manumanu? ni da a vinaka tiko mai Ijipita: ena qai vakani kemuni ko Jiova e na lewe ni manumanu, ia dou na kania.
19Ena sega ni bogi dua ga, se bogi rua, se bogi lima, se bogi tini, se bogi e ruasagavulu, dou na kania:
20ena dua sara na vula, ka me luaraki mai na ucumu-dou, ka sa velavela vei kemudou: e na vuku ni dou sa beci Jiova, ko koya sa tiko vata kei kemudou, a sa tagi e matana, ka kaya, A cava eda a lako mai kina mai Ijipita?
21A sa kaya ko Mosese, O ira na tamata kaʼu sa tiko kaya, era sa oba vakaonosagavulu era lako e na yavadra; ia kemuni sa kaya, Au na solia vei ira na lewe ni manumanu, me ra kana tiko kina ka dua sara na vula.
22Me na vakamatei beka na sipi kei na karavau me kedra, me rauti ira? se me na kumuni vata beka na ika kece mai na Wasawasa me kedra, me rauti ira?
23A sa kaya vei Mosese ko Jiova, Sa lekaleka beka mai na liga i Jiova? ko na raica e na gauna o qo se na yaco dina vei iko na noqu vosa, se segai.
24A sa lako yani ko Mosese, ka tukuna vei ira na tamata na vosa i Jiova, a sa vakasoqoni ira vata na tamata e lewe vitusagavulu maivei ira na qase ni tamata, ka sa vakatikori ira me volita na Vale gatu.
25A sa lako sobu ko Jiova e na o, a sa vosa vua, a sa kauta na Yalo sa tiko vua, ka sa solia maikina vei ira na tamata e lewe vitusagavulu, o ira na qase: a sa yaco, ni sa toka ga vei ira na Yalo, era sa parofisai, ka sega ni vakaruataka.
26A sa vo tiko e nai tikotiko e rua na tamata, a yacana e dua ko Elitati, ka yacana nai kadua ko Metati: a sa lutu vei rau na Yalo; a rau sa maivei ira sa volai, a rau a sega ni lako yani ki na Vale gatu: a rau a parofisai e na loma ni tikotiko.
27A sa cici e dua na cauravou, ka tukuna vei Mosese, ka kaya, O Elitati kei Metati, erau sa parofisai tiko e loma ni tikotiko.
28A sa vosa ko Josua na luve i Nuni, o koya sa dauqaravi Mosese, e dua vei ira na nona cauravou, a sa kaya, I Mosese, noqu turaga, mo tarovi rau.
29A sa kaya vua ko Mosese, Ko sa vuvu e na vukuqu, ne? e vinaka mada ke sa parofita na tamata kecega i Jiova, ka solia vei ira na Yalona ko Jiova.
30A sa lako ki loma ni tikotiko ko Mosese, kei ira vata kaya na qase ni Isireli.
31A sa lako tani vei Jiova e dua na cagi, ka kauta e so na toa kila mai na Wasawasa, ka vakalutuma ki nai tikotiko, a sa vaka nai lakolako e na siga e dua na kena balavu e na veiyasana vaka ka vaka ka volita nai tikotiko, a sa vaka na caga e va mai na dela ni vanua.
32A ra sa tu cake tiko na tamata e na siga ko ya ka bogi, e na bogi talega ka siga, e na siga cake talega, a ra sa kumuna vata na toa kila: o koya sa vakalailai sa kumuna e tini na omeri: a ra talaucaka vei ira e na veiyasana ka volita nai tikotiko.
33Ni ra sa katia tiko na lewe ni manumanu, ni ra sega ni namuta, sa waqa mai na cudru i Jiova vei ira na tamata, a sa yaviti ira na tamata ko Jiova e na mate levu sara.
34A sa vakatokai na yaca ni tikina ko ya ko Kipiroci-ateva: e na vuku ni ra a buluti ira maikea na tamata era i kusikusima.
35Era sa toki na tamata mai Kipiroci-ateva, ka lako ki Eseroci; a ra sa tiko mai Eseroci.
Who We AreWhat We EelieveWhat We Do
2025 by iamachristian.org,Inc All rights reserved.
