Na Tiko Voli Mai Na Lekutu 10 - AI VOLA TABU（FIJ1864）

A davui siliva e rua, 1-10. Era sa toki mai Sinei ki Perana na luve i Isireli, 11-13. Ai valavala ni nodrai lakolako, 14-28. Sa masuti Opapi ko Mosese me kakua ni laivi ira, 29-32. A vosa ni veivakalougatataki i Mosese ni sa lako na kato ni vunau, ka ni sa tiko talega, 33-36.

1A SA vosa vei Mosese ko Jiova, ka kaya,

2Mo cakava vei iko e rua na davui siliva; mo cakavi rau e nai tukituki: ia ko na vakasoqona vata kina nai vavakoso taucoko, era na cavu me lako talega kina na veivavakoso.

3Ia ni ra sa uvuca, me ra qai soqoni vata vei iko nai vavakoso taucoko ki na katuba ni vale gatu ni veitata.

4Ia ni ra sa uvuca e dua, me ra qai soqoni vata vei iko na turaga, era sa liu e na veiudolu ni Isireli.

5Ia ni dou sa uvuca vakaivalu, me ra qai cavu me lako na veivavakoso sa tiko e na yasana ki cake:

6ia ni dou sa uvuca tale vakaivalu, me ra qai cavu me lako na veivavakoso sa tiko ki na yasana sa donuya na ceva: me ra dauuvuca vakaivalu me ra cavu me lako.

7Ia ni vakasoqoni vata nai vavakoso taucoko, dou uvuca ga, ia me kakua ni vakaivalu.

8Ia me uvuci rau na davui ko iratou na bete na luve i Eroni; ia erau na ka sa lesi vei kemudou me tawa mudu e na nomudou veitabatamata.

9Ia kevaka kemudou sa lako ki nai valu e na nomudou vanua vei ira na meca sa vakasaurarataki kemudou, dou na qai uvuci rau vakaivalu na davui; ia ena qai nanumi kemudou ko Jiova na nomudou Kalou, ia dou na vakabulai maivei ira na nomudou meca.

10E na siga talega dou sa rereki kina, kei na nomudou veisolevu sa lokuci, kei nai vakatekivu ni nomudou veivula, dou na uvuci rau na davui, ni sa tu na nomudou veisoro kama, kei na nomudou veimadrali sa cabo e na veivinakati; mo dou na nanumi kina e na mata ni nomudou Kalou: sa ko Jiova koi au na nomudou Kalou.

11A SA yaco e nai karuasagavulu m siga ni karua ni vula, e nai karua ni yabaki, sa qai kauti cake na o mai na dela ni vale-tikotiko ni vunau.

12A ra sa qai cavu me lako na luve i Isireli mai na lekutu mai Sinei; a sa toka na o mai na lekutu mai Perana.

13A sa vakatekivu na nodra lako, ni vosataka ga ko Jiova e na gusu i Mosese.

14Sa cavu eliu me lako na drotini ni nodrai tikotiko na luve i Juta, e vaka na nodra veivavakoso: a sa lewa na nodrai vavakoso ko Nasoni na luve i Aminatapi.

15A sa lewa nai vavakoso ni nodra yavusa na luve i Isakari ko Nicaneli na luve i Suari.

16A sa lewa nai vavakoso ni nodra yavusa na luve i Sepuloni ko Iliapi na luve i Eloni.

17A sa qai sere na vale-tikotiko; a ra sa cavu me lako ka colata na vale-tikotiko ko ira na luve i Kerisoni, kei na luve i Mirari.

18Sa qai cavu me lako na drotini ni nodrai tikotiko na Rupeni, e vaka na nodra veivavakoso: a sa lewa na nodrai vavakoso ko Ilisuri na luve i Siteuri.

19A sa lewa nai vavakoso ni nodra yavusa na luve i Simioni ko Silumieli na luve i Surisatai.

20A sa lewa nai vavakoso ni nodra yavusa na luve i Kata ko Eliasafi na luve i Tiueli.

21A ra sa qai cavu me lako na luve i Koaca, ka colata lako na vale tabu: ia sa so era sa vakaduria cake eliu na vale-tikotiko, a ra tadu emuri ko ira o qo.

22A sa qai cavu me lako na drotini ni nodrai tikotiko na luve i Ifireimi e vaka na nodra veivavakoso: a sa lewa na nodrai vavakoso ko Ilisama na luve i Amiuti.

23A sa lewa nai vavakoso ni nodra yavusa na luve i Manase ko Kamilieli na luve i Pitasuri.

24A sa lewa nai vavakoso ni nodra yavusa na luve i Penijamini ko Epitani na luve i Kitioni.

25A sa cavu me lako na drotini ni nodrai tikotiko na luve i Tani, a ya sa muria sara nai tikotiko kecega, e vaka na nodra veivavakoso: a sa lewa na nodrai vavakoso ko Eieseri na luve i Amisatai.

26A sa lewa nai vavakoso ni nodra yavusa na luve i Aseri ko Pakieli na luve i Okirani.

27A sa lewa nai vavakoso ni nodra yavusa na luve i Nafitali ko Eira na luve i Enani.

28Sa vakaoqo na nodrai lakolako na luve i Isireli e na nodra veivavakoso, ni ra sa cavu me lako.

29A sa kaya ko Mosese vei Opapi, na luve i Riueli na kai Mitiani, na vugo i Mosese, Keimami sa lako tiko ki na yasana sa vosataka ko Jiova, Au na solia vei kemudou: tou lako vata, ia keimami na caka vinaka vei iko: ni sa tukuna na ka vinaka ko Jiova me yacovi ira na Isireli.

30A sa kaya vua ko koya, Au na sega ni lako; ia kaʼu na lesu ga ki na noqu vanua, kei na kai noqu.

31A sa kaya ko koya, Mo kakua mada ni laivi keimami; e na vuku ni ko sa kila nai tikotiko vei keimami e na lekutu, ia ko na vaka na mata vei keimami.

32Ia ena yaco, kevaka ko lako kei keimami, keimami na qai kitaka vei iko na ka vinaka ko ya sa kitaka vei keimami ko Jiova.

33A ra sa lako tani mai na ulu-ni-vanua i Jiova, ka lako tiko ka bogi tolu: a sa liutaki ira tiko na kato ni veiyalayalati i Jiova e nai lakolako e na bogi e tolu, me qara na yasana me ra vakacegu kina.

34A sa vakarurugi ira e na siga na o i Jiova, ni ra lako tani mai nai tikotiko.

35Ia ni daulaʼki lako na kato, sa qai kaya ko Mosese, Mo ni tu cake, i Jiova, ia me ra dui vakasevi na nomu meca; ia me ra dro tani e na matamu ko ira era cati iko.

36Ia ni sa dauvakacegu o qori, sa qai kaya ko koya, Mo ni lesu tale mai, i Jiova, kivei ira na udolu vakavuqa ni Isireli.