Na Tiko Voli Mai Na Lekutu 9 - AI VOLA TABU（FIJ1864）

Su vunautaki tale na solevu ni lako-sivia, 1-14. Sa tubera tiko na Isireli na o, 15-23.

1A SA vosa vei Mosese ko Jiova mai na lekutu mai Sinei, e nai matai ni vula e nai karua ni yabaki ni ra sa lako oti mai na vanua ko Ijipita, ka kaya,

2Me ra ia na solevu ni lako-sivia na luve i Isireli e na kena gauna sa lokuci.

3E nai katinikava ni siga ni vula o qo, e na yakavi, dou ia kina e na kena gauna sa lokuci: me vaka na kena vunau kecega, kei na kenai valavala kecega, dou ia.

4A sa vosa vei ira na luve i Isireli ko Mosese, me ra ia na solevu ni lako-sivia.

5Ia era sa ia na solevu ni lako-sivia e nai katinikava ni siga ni kenai matai ni vula, e na yakavi, mai na lekutu mai Sinei: me vaka na ka kecega ka vunautaka vei Mosese ko Jiova, era sa kitaka vakakina na luve i Isireli.

6A sa so na tamata era sa tawa savasava e na yago ni tamata sa mate, a ra sa sega kina ni ia rawa na solevu ni lako-sivia e na siga ko ya: a ra sa lako mai e na siga ko ya ki na mata i Mosese kei na mata i Eroni:

7a ra sa kaya na tamata o qori vua, Keitou sa tawa savasava e na yago ni tamata sa mate: a cava keitou sa tarovi kina, me keitou kakua ni cabora, vata kei ira na luve i Isireli, nai madrali vei Jiova e na kena gauna sa lokuci?

8A sa kaya vei ira ko Mosese, Dou tu mada, meʼu rogoca mada se cava na ka ena vunautaka ko Jiova e na vukumudou.

9A sa vosa vei Mosese ko Jiova, ka kaya,

10Mo vosa vei ira na luve i Isireli, ka kaya, Kevaka e dua na tamata vei kemudou, se vei ira na nomudou veitabatamata, sa tawa savasava e na yago ni mate, se sa lakolako vakayawa, me ia ga ko koya na solevu ni lako-sivia vei Jiova:

11e nai karua ga ni vula, e na kenai katinikava ni siga, e na yakavi, me ra ia kina: me ra kania vata kei na ka sa tawa vakaleveni kei na co gaga:

12me ra kakua ni vakacauna me tiko e na sabogibogi, ia me ra kakua ni musuka e dua na suina: me ra ia, me vaka na vunau kecega e navuku ni solevu ni lako-sivia.

13Ia na tamata sa savasava, ka sa sega ni lakolako, ka sa bese ni ia na solevu ni lako-sivia, na tamata ko ya ena tawase tani vei ira na kai nona: e na vuku ni sa sega ni kauta mai nai madrali vei Jiova e na kena gauna sa lokuci; ena cudruvi na tamata ko ya e na nonai valavala ca.

14Ia kevaka sa tiko vulagi kei kemudou e dua na kai tani, a sa ia na solevu ni lako-sivia vei Jiova; me ia ko koya, me vaka na vunau kei nai valavala ni solevu ni lako-sivia: me dua ga na vunau vei kemudou, vei koya sa vulagi, kei koya sai taukei.

15IA e na siga sa vakaduri cake kina na vale-tikotiko, sa qai ubia na vale-tikotiko na o, io, na vale gatu ni vunau: ia e na yakavi, sa tiko e dela ni vale-tikotiko sa vaka na buka waqa na kenai rairai, ka sigavaka.

16Sa vakakina tikoga: na o sa ubia e na siga; ia e na bogi, sa dua nai rairai e vaka na buka waqa.

17Ia ni sa kauti cake oti na o mai na dela ni Vale gatu, era sa qai lako na luve i Isireli: ia e na yasana sa toka kina na o, era sa tiko kina na luve i Isireli.

18E na vosa i Jiova era sa lako na luve i Isireli; era sa tiko talega e na vosa i Jiova: na veisiga kecega sa tiko kina na o e na dela ni vale-tikotiko, era sa tikoga.

19Ia ni sa tiko vakadede na o e na dela ni vale-tikotiko me bogi vuqa, era sa qai vakabauta na ka sa lesia ko Jiova ko ira na luve i Isireli, ka sega ni lako.

20A sa vakakina, ni sa tiko vakalailai na o e na dela ni vale-tikotiko; era sa tikoga e na vosa i Jiova; ia era sa lako e na vosa i Jiova.

21A sa vakakina, ni sa toka na o mai na yakavi ka yacova na sabogibogi, a sa kauti cake na o e na sabogibogi, era sa qai lako: ni sa kauti cake na o, e na siga se na bogi, era sa qai lako.

22Se sa rua na bogi, se dua na vula, se dua na yabaki, ni sa vakadede na o e na dela ni vale-tikotiko, me tiko kina, era sa tikoga na luve i Isireli, ka sega ni lako: ia ni sa kauti cake, era sa qai lako.

23E na vosa i Jiova era sa tikoga, era sa lako talega e na vosa i Jiova: era sa vakabauta na ka sa lesia ko Jiova, me vaka sa vosataka e na gusu i Mosese ko Jiova.