Na Tiko Voli Mai Na Lekutu 8 - AI VOLA TABU（FIJ1864）

Ai valavala ni sa tutuvaki na veicina, 1-4. A nodrai bulibuli na luve i Levi, 5-22. A yabaki me ra qarava kina na vale gatu ni veitata, 23-26.

1A SA vosa vei Mosese ko Jiova, ka kaya,

2Mo vosa vei Eroni, ka kaya vua, Ni ko sa vakacaudreva na veicina, me cinava na yasana sa qarava nai tutu-ni-cina na cina e vitu.

3A sa kitaka vakakina ko Eroni; sa vakacaudreva na veicina ki na yasana sa qarava nai tutu-ni-cina, me vaka ka vakarota vei Mosese ko Jiova. (

4Ia nai tutu-ni-cina sa caka e na koula sa tukilaki; na tolona, kei na sena, sa tukilaki: me vaka nai vakatakarakara sa vakatakila vei Mosese ko Jiova, sa cakava oti vakakina nai tutu-ni-cina ko koya.)

5A SA vosa vei Mosese ko Jiova, ka kaya,

6Mo kauti ira na luve i Levi maivei ira na luve i Isireli, ka vakasavasavataki ira.

7Ia mo kitaki ira vakaoqo mo vakasavasavataki ira kina: Mo kureitaka vei ira na wai ni veivakasavasavataki, ia me ra toroya na yagodra taucoko, ka vuya na nodra veisulu, ka vakasavasavataki ira kina.

8Me ra qai kauta e dua na karavau sa gone, kei na kenai madrali laukana, io na madrai droka sa waki vata kei na waiwai, ia mo kauta e dua tale na karavau sa gone mei soro ni valavala ca.

9Mo qai kauti ira na luve i Levi ki na mata ni vale gatu ni veitata: ka vakasoqoni ira vata nai vavakoso taucoko ni luve i Isireli:

10ia mo qai kauti ira na luve i Levi ki na mata i Jiova: ia me ra tabaki ira na luve i Levi e na ligadra ko ira na luve i Isireli:

11me na qai soli ira na luve i Levi ko Eroni me vaka nai soro sa yalovaki e na mata i Jiova, maivei ira na luve i Isireli, me ra qarava na cakacaka i Jiova.

12Me ra qai tabaka na uludrau na karavau e na ligadra ko ira na luve i Levi: mo qai cabora e dua mei soro ni valavala ca, kei na kenai karua mei soro kama, vei Jiova, me sorovaki ira kina na luve i Levi.

13Mo qai vakaturi ira na luve i Levi e na mata i Eroni, kei na matadrau na luvena, ka soli ira me vaka nai soro sa yalovaki vei Jiova.

14Ia mo tawasei ira na luve i Levi maivei ira na luve i Isireli: era na noqu kina na luve i Levi.

15A sa oti, me ra qai curu na luve i Levi me kitaka na cakacaka ni vale gatu ni veitata: ia mo vakasavasavataki ira, ka soli ira me vaka nai soro sa yalovaki.

16Ni ra sa soli sara vei au ko ira maivei ira na luve i Isireli; me nodrai sosomi na ulumatua kecega, io na ulumatua kecega ni luve i Isireli, kaʼu sa kauti ira kina vei au:

17ni sa noqu na ulumatua kecega ni luve i Isireli, na tamata kei na manumanu e yavai va: au a vakatabui ira me noqu, e na siga kaʼu a yaviti ira kecega kina na ulumatua ni vanua ko Ijipita:

18ia kaʼu sa kauti ira na luve i Levi, me kedrai sosomi na ulumatua kecega ni luve i Isireli:

19ia kaʼu sa soli ira na luve i Levi maivei ira na luve i Isireli, mei solisoli vei Eroni kei ira na luvena, me ra kitaka na nodra cakacaka na luve i Isireli e na vale gatu ni veitata, ka me ra sorovaki ira na luve i Isireli: me kakua kina e dua na yaviti vei ira na luve i Isireli, ni ra sa torova na tikina tabu ko ira na luve i Isireli.

20Ia ko Mosese kei Eroni kei nai vavakoso taucoko ni luve i Isireli, era a kitaka vei ira na luve i Levi me vaka na ka kecega sa rotaka ko Jiova vei Mosese e na vukudra na luve i Levi; era sa cakacaka vakakina vei ira ko ira na luve i Isireli.

21A ra sa vakasavasavataki ira na luve i Levi, a ra sa derea na nodra veisulu; a sa soli ira ko Eroni me vaka nai soro sa yalovaki e na mata i Jiova; a sa sorovaki ira ko Eroni me vakasavasavataki ira.

22A sa oti, era sa qai curu na luve i Levi me kitaka na nodra cakacaka e na vale gatu ni veitata e matana ko Eroni, e matadrau talega na luvena: me vaka ka rotaka ko Jiova vei Mosese e na vukudra na luve i Levi, era sa kitaka vakakina vei ira.

23A sa vosa vei Mosese ko Jiova, ka kaya,

24O qo e na vukudra na luve i. Levi: o ira sa ruasagavulu ka lima na nodra yabaki ka levu cake, era na curuma nai vavakoso ki na cakacaka ni vale gatu ni veitata:

25ia ni sa limasagavulu na nodra yabaki, era na cegu mai nai vavakoso sa cakacaka, ka sega ni cakacaka tale:

26ia era na qarava ga nai vakatawa, vata kei ira na wekadra, e na vale gatu ni veitata, ia me ra kakua ni cakacaka. Mo cakava vakaoqo vei ira na luve i Levi e na vuku ni nodrai tavi.