Na Tiko Voli Mai Na Lekutu 6 - AI VOLA TABU（FIJ1864）

A vunau e na vukudra sa tawase, 1-21. A vosa me ra vosavakalougatataki kina na tamata, 22-27.

1A SA vosa vei Mosese ko Jiova, ka kaya,

2Mo vosa vei ira na luve i Isireli, ka kaya vei ira, Ni sa laivi koya e dua na tagane se dua na alewa, me vosataka na vavakini sa tawase kina e dua, me tawasei koya me nei Jiova:

3me qai kua waini kei na yaqona kaukauwa ko koya; me kakua ni gunuva na wai wiwi sa caka e na waini, se na wai wiwi sa caka e na yaqona kaukauwa, me kua talega ni gunuva na wai ni vua-ni-vaini, me kua talega ni kania na vua-ni-vaini sa drokadroka, se sa sigani.

4E na veisiga kecega ni nona tawase, me kakua ni kania ko koya e dua na ka sa caka e na kau vaini, mai na sorena ka yaco ki na kulina.

5E na veisiga kecega sa vavakini kina me tawase, me kakua ni tara na uluna e dua nai toroi: ena tabu ga ko koya, ka me oti mada na veisiga kecega sa tawasei koya kina me nei Jiova; me laiva ko koya na drau ni uluna me tubu.

6Me kakua ni torova ko koya e dua na yago sa mate, e na veisiga kecega sa tawasei koya kina me nei Jiova.

7Me kakua ni vakatawasavasavataki koya ko koya e na vuku i tamana se na tinana, e na vuku i tuakana se na tacina, se na ganena, ni sa mate: ni sa toka e na uluna na ka sa tawase kina ko koya me nona na nona Kalou.

8Sa tabu ko koya me nei Jiova e na veisiga kecega sa tawase kina ko koya.

9Ia kevaka sa lelekitaki e dua na tamata ni sa tiko voleka vua, ka sa vakatawasavasavataki na uluna sa tawase kina ko koya; me na qai toroya na uluna e na siga sa vakasavasavataki kina, io me toroya e nai kavitu ni siga:

10ia e nai kawalu ni siga me kauta e rua na soqe, se rua na luve ni ruve, vua na bete, ki na katuba ni vale gatu ni veitata:

11ia me cabora e dua ko na bete mei soro ni valavala ca, kei nai kadua mei soro kama, me sorovaki koya, e na vuku ni sa cala e na mate, ia me vakatabuya na uluna e na siga ko ya.

12Ia me vakatabuya ko koya me nei Jiova na veisiga ni nona tawase, ka kauta e dua na lami sa yabaki dua mei soro ni caka cala: ia na veisiga eliu sa na biu, e na vuku ni sa vakatawasavasavataki na nona tawase.

13Ia o qo na vunau e na vukuna sa tawasei koya, ni sa oti na veisiga sa tawase kina ko koya: me mai kauti ko koya ki na katuba ni vale gatu ni veitata:

14ka cabora na nonai madrali vei Jiova, e dua na lami tagane sa yabaki dua sa tawa ca mei soro kama, ka dua na lami alewa sa yabaki dua sa tawa ca mei soro ni valavala ca, ka dua na sipi tagane sa tawa ca mei madrali e na veivinakati,

15ka dua nai su ka sa tawa vakaleveni, e so nai buli lalai ni madrai droka sa waki vata kei na waiwai, kei nai buli mamare e so sa tawa vakaleveni sa boro e na waiwai, kei na kedrai madrali laukana, kei na kedrai madrali liviraki.

16Ia me kauta na veika o qo na bete ki na mata i Jiova, ka cabora na nonai soro ni valavala ca, kei na nonai soro kama:

17ia me cabora ko koya na sipi tagane mei madrali e na veivinakati vei Jiova, kei nai su ka sa tawa vakaleveni: me cabora talega na bete na nonai madrali laukana, kei na nonai madrali liviraki.

18Ia me na qai toroya na uluna sa tawase kina ko koya sa tawasei koya, mai na katuba ni vale gatu ni veitata, ka kauta na drau ni uluna sa tawase kina, ka biuta ki na buka waqa a ya e ruku ni madrali sa cabo e na veivinakati.

19Me qai kauta ko na bete na taba ni sipi tagane sa saqa tu, ka dua nai buli lailai sa tawa vakaleveni mai nai su, ka dua nai buli mamare sa tawa vakaleveni, ka solia ki na ligana sa tawasei koya, ni sa toroi oti na uluna sa tawase kina:

20me na qai yalovaka na bete mei soro e yalovaki e na mata i Jiova: o qo sa tabu me nona na bete, kei na serena sa yalovaki kei na tabana sa lavelaveti: ka sa oti, sa qai tara vua ka tawasei koya me gunu waini.

21O qo na vunau e na vukuna sa tawasei koya ni sa vosavavakini oti, io na nonai madrali vei Jiova e na vuku ni nona tawase, ka vo tale na ka sa rawarawa vua: me vaka na vosa vavakini ka vavakini kina ko koya, me kitaka vakakina ko koya me vaka na vunau ni nona tawase.

22A SA vosa vei Mosese ko Jiova, ka kaya,

23Mo vosa vei Eroni kei rau na luvena, ka vaka, Me vaka o qo na nomudou vosavakalougatataki ira na luve i Isireli, dou kaya vei ira:

24Me vakalougatataki iko ko Jiova, ka maroroi iko:

25me cilavi iko ko Jiova e na matana, ka yalololoma vei iko:

26me vakanamata vei iko ko Jiova, ka solia vei iko na vakacegu.

27Ia era na vakatoka na yacaqu vei ira na luve i Isireli; ia kaʼu na vakalougatataki ira.