Na Tiko Voli Mai Na Lekutu 5 - AI VOLA TABU（FIJ1864）

Me ra tiko tani vakai ira na tawa savasava, 1-4. Me saumi na ka e cala kina, 5-10. A rei vakatovolei ni sa veivuvutaki na veiwatini, 11-31.

1A SA vosa vei Mosese ko Jiova, ka kaya,

2Mo vakarota vei ira na luve i Isireli, me ra kauti ira tani mai na koro na vukavuka kecega, kei ira kecega sa turi, kei ira kecega sa tawa savasava e na vuku ni mate:

3dou kauta tani na tagane kei na alewa talega, io dou kauta ki nai bili ni koro; me ra kakua ni vakadukadukalitaka na nodra koro, o koya kaʼu sa tiko kina.

4A ra sa kitaka vakakina na luve i Isireli, ka kauti ira ki nai bili ni koro: me vaka ka vosa ko Jiova vei Mosese, era sa kitaka vakakina na luve i Isireli.

5Sa vosa talega vei Mosese ko Jiova, ka kaya,

6Mo vosa vei ira na luve i Isireli, Ni sa kitaka e dua nai valavala ca vaka-tamata e dua na tagane se dua na alewa, me caka cala kina vei Jiova, a sa cala na tamata ko ya;

7me ra qai tukuna na nodrai valavala ca era sa cakava: ia me sauma kece ko koya na nona caka cala, ka vakaikuritaka e na dua na tikina ni sa wase lima, ka solia vua sa caka cala kina.

8Ia kevaka sa sega na wekana me sauma kina na caka cala, me qai kau vei Jiova nai sau ni caka cala, io vei koya na bete; kei na sipi tagane talega mei bulubulu, ena ia kina na veibuluti e na vukuna.

9Kei nai madrali kecega ni ka kecega sa tabu maivei ira na luve i Isireli, era kauta vua na bete, ena nona ga.

10Kei na ka sa vakatabuya na tamata yadua, ena nona ga: a ka sa solia na tamata yadua vua na bete, ena nona ga.

11Sa vosa talega vei Mosese ko Jiova, ka kaya,

12Mo vosa vei ira na luve i Isireli, ka kaya vei ira, Kevaka sa lako vakatikitiki tani na watina e dua na tagane, ka caka cala vua,

13a sa koto kaya e dua na tagane, a sa tawa kila ko na watina tagane, a sa ubi ga, a sa vakadukadukalitaki ko koya, ka sega e tukuni koya, ka sa sega ni tauri,

14a sa tauva na tagane na yalo ni vuvu, me vuvutaka na watina, a ya sa vakadukadukalitaki: se sa tauva na tagane na yalo ni vuvu, me vuvutaka na watina, a ya sa sega ni vakadukadukalitaki:

15me na qai kauta na watina vua na bete na tamata ko ya, me kauta talega e na vuku ni alewa na nonai madrali, e dua na omeri madrai parile droka; me kakua ni livia kina na waiwai ko koya, se viria kina na drega me vakamai; ni sai madrali ni veivuvutaki o qo, nai madrali ni vakananumi, me vakananuma na caka cala.

16Ia me kauti koya voleka ko na bete, ka vakatura e na mata i Jiova:

17me qai kauta na wai tabu na bete e na dua na bilo qele; me kauta talega na bete mai na dra-vukase sa koto e na loma ni vale-tikotiko, ka viria ki na wai:

18ia me vakatura na alewa ko na bete e na mata i Jiova, ka luvata nai sala mai na uluna na alewa, ka solia ki na ligana nai madrali ni vakananumi, ko ya nai madrali ni veivuvutaki: ia me taura tu e ligana na bete na wai gaga sa vaka-rusataka rawa:

19ia me kaya vua ko na bete me vosavavakini, ia me kaya ko koya vua na alewa, Kevaka sa sega na tagane kemudrau sa koto kaya, kevaka ko sa sega talega ni lako vakatikitiki tani mai na watimu, me vakadukadukalitaki, mo qai i kakua ni ca e na wai gaga o qo sa vaka-rusataka rawa:

20ia kevaka ko sa lako vakatikitiki tani mai na watimu, ia kevaka ko sa vakadukadukalitaki, ni drau sa koto kaya e dua na tagane sa sega ni watimu:

21(me qai vosa vua na alewa ko na bete na vosa vavakini me rukaki kina, ia me kaya vua na alewa ko na bete,) Me cakavi iko ko Jiova mo daucavuti e na veirukaki kei na vavakini vei ira na kai nomu, ni sa cakava na sagamu me vuca ko Jiova, kei na ketemu me vuvuce;

22ia na wai o qo sa vakarusataka rawa me curuma na lomamu me vuvuce na ketemu, ka me vuca na sagamu. Me na qai kaya na alewa, Emeni, emeni.

23Me na qai vola na vosa ni ruru o qo e nai vola ko na bete, ka bokoca tale e na wai gaga:

24ia ena vagunuva na alewa ko koya e na wai gaga sa vakarusataka rawa: ia na wai sa vakarusataka rawa ena curumi koya, ena qai gaga mai.

25Me taura talega nai madrali ni veivu-vu taki na bete mai na ligana na alewa, ka, yalovaka nai madrali e na mata i Jiova, ka cabora e dela ni cabocabo-ni-soro:

26me qai qumia e so mai nai madrali na bete e na ligana, io na ka me vakananuma, ka vakama e dela ni cabocabo-ni-soro, ka sa oti me qai vagunuva na alewa e na wai.

27Ia ni sa vagunuvi koya oti e na wai ko koya, ena qai yaco, kevaka sa vakadukadukalitaki ko koya, ka sa caka cala vua na watina, ena qai curumi koya na wai sa vakarusataka rawa, ka gaga mai, ka vuvuce kina na ketena, ka vuca na sagana: ena qai daucavuti na alewa e na veirukaki vei ira na kai nona.

28Ia kevaka sa sega ni vakadukadukalitaki na alewa, ka sa savasava ga; ena qai sega ni ca ko koya, ia ena kunekune rawa ga.

29O qo na vunau ni veivuvutaki, ni sa lako vakatikitiki tani na alewa mai na watina, a sa vakadukadukalitaki;

30se ni sa tauva na tagane na yalo ni vuvu, me vuvutaka na watina: me qai vakaturi e na mata i Jiova na alewa, ka me kitaka vua na vunau kecega o qo ko na bete.

31Sa na qai tawa cala na tagane e na caka cala, ka na cudruvi ga na alewa o qo e na nona caka cala.