Na Tiko Voli Mai Na Lekutu 4 - AI VOLA TABU（FIJ1864）

A nodra yabaki na luve i Levi me ra qarava kina na vale gatu ni veitata, 1-3. A nodrai kaukau na luve i Koaca, 4-15, 17-20. Ai tavi i Eliasari, 16. A nodrai kaukau na luve i Kerisoni, 21-28. A nodrai kaukau na luve i Mirari, 29-33. A kedrai wiliwili na luve i Koaca, 34-37; kei na luve i Kerisoni, 38-41; kei na luve i Mirari, 42-49.

1A sa vosa vei Mosese kei Eroni ko Jiova, ka kaya,

2Mo okati ira na luve i Koaca maivei ira na luve i Levi, e na kedra veimataqali, me vaka na nodra qase,

3o ira sa tolusagavulu na nodra yabaki, ka levu cake me yacovi ira sa limasagavulu na nodra yabaki, o ira kece sa lako rawa e nai vavakoso, me kitaka na cakacaka ni vale gatu ni veitata.

4O qo na nodrai tavi na luve i Koaca e na vale gatu ni veitata: na ka tabu sara.

5Ia ni sa laʼki lako nai vavakoso, me qai toro mai ko Eroni kei rau na luvena, ka luvata nai lati sa rube, ka ubia kina na kato ni vunau:

6ka tevuka ki delana na kuli sai ubi ecake, ka ubia e na gatu e karakarawa walega, ka daramaka na kena veivua.

7Ia me ra tevuka e dua na gatu karakarawa ki dela ni kanakana ni ka dauraici, ka viritu kina na veidari, kei na veitaki, kei na veisedre, kei na veibilo me livilivi kina: ia me tikoga kina na madrai sa dautu kina:

8me ra qai tevuka ecake e dua na gatu damudamu, ka ubia o qo e na kuli sai ubi ecake, ka daramaka kina na kena veivua.

9Me ra qai kauta e dua na gatu karakarawa, ka ubia nai tutu-ni-cina, kei na kena veicina, kei na veikoti-ni-cina, kei na veidari ni de-ni-cina, kei na kena bilo kecega ni waiwai, era kitaka kina na kena cakacaka:

10ia me ra viria kei na kenai yaya kecega ki na dua nai sole kuli ni manumanu, ka savenaka ki nai vua.

11Ia me ra tevuka e dua na gatu karakarawa ki dela ni cabocabo sa koula, ka ubia e nai ubi kuli ni manumanu, ka daramaka na kena veivua:

12me ra qai kauta nai yaya kecega ni cakacaka era cakacaka kina e na tikina tabu, ka viria ki na dua na gatu karakarawa, ka ubia e nai ubi kuli ni manumanu, ka savenaka ki nai vua.

13Me ra qai kauta tani na dravusa mai nai cabocabo-ni-soro, ka tevuka kina na gatu karakarawa:

14ia me ra viritu kina na kenai yaya kecega, era dauqarava kina, io na veidari ni de-ni-buka, na veiqila ni lewe ni manumanu, kei na veibilo sa kau tani kina na dravu, kei na veibilo me kau kina na dra me kureitaki, nai yaya kecega ni cabocabo-ni-soro; me ra qai tevuka kina nai sole kuli ni manumanu, ka daramaka na kena veivua.

15Ia ni sa ubia oti ko Eroni na tikina tabu, kei nai yaya kecega ni tikina tabu, ni sa laʼki lako nai vavakoso; me ra qai toro mai na luve i Koaca me colata: ia me ra kakua ga ni tara e dua na ka tabu, de ra mate. O qo na nodrai kaukau na luve i Koaca mai na vale gatu ni veitata.

16Ia nai tavi i Eliasari, na luve i Eroni na bete, na waiwai ni cina, kei na kau boi vinaka vakamai, kei nai madrali laukana sa caka tikoga, kei na waiwai ni veilumuti, me vakaraica talega na vale-tikotiko taucoko, kei na ka kecega sa tu kina, e na tikina tabu, kei na kena veiyaya.

17A sa vosa vei Mosese kei Eroni ko Jiova, ka kaya,

18Drau kakua ni muduka tani na yavusa ni nodra veimataqali na luve i Koaca maivei ira na luve i Levi:

19ia drau kitaka vakaoqo ga vei ira, me ra bula ga, me ra kakua ni mate, ni ra sa torova na ka tabu sara: Me curu mada ko Eroni kei rau na luvena, ka lesia na nodrai tavi yadua kei na nodrai kaukau:

20ia me ra kakua ga ni curu kina me raica ni sa vaka-ubi tiko na ka tabu, de ra mate.

21A sa vosa vei Mosese ko Jiova, ka kaya,

22Mo okati ira talega na luve i Kerisoni, me vaka na nodra qase, e na nodra veimataqali;

23o ira sa tolusagavulu na nodra yabaki, ka levu cake ka yacovi ira sa limasagavulu na nodra yabaki, mo wiliki ira; o ira kece sa lako rawa e nai vavakoso, me kitaka na cakacaka e na vale gatu ni veitata.

24O qo na nodrai tavi na nodra veimataqali na luve i Kerisoni, me ra qarava, ka me ra colacola:

25ia era na colata na veigatu ni vale-tikotiko, kei na vale gatu ni veitata, na kenai ubi, kei na kuli sai ubi ecake kei na ka-rube sai sogo ni vale gatu ni veitata,

26kei na veigatu e bai ni rara, kei na ka-rube sai sogo ni katuba ni rara sa vakabai, ko ya sa volita na vale-tikotiko kei nai cabocabo-ni-soro, kei na kedra veidali, kei nai yaya kecega sa kitaki kina na kedra cakacaka, kei na ka kecega sa cakavi me yaga kina, me ra qarava.

27Me lewa ko Eroni kei rau na luvena na nodrai tavi kecega na luve i Kerisoni, e na nodrai kaukau kecega, kei na nodra cakacaka kecega: ia dou lewa vei ira na nodrai kaukau kecega me ra qarava.

28O qo na nodrai tavi na nodra veimataqali na luve i Kerisoni e na vale gatu ni veitata; ia me lewa na nodra cakacaka ko Icamari na luve i Eroni na bete.

29Ko ira na luve i Mirari, mo wiliki ira e na nodra veimataqali, me vaka na nodra qase:

30o ira sa tolusagavulu na nodra yabaki ka levu cake, ka yacovi ira sa limasagavulu na nodra yabaki, mo wiliki ira, o ira kecega sa lako rawa e nai vavakoso, me kitaka na cakacaka ni vale gatu ni veitata.

31Ia o qo nai tavi e nodrai kaukau, e na nodra cakacaka kecega e na vale gatu ni veitata: na veipapa ni vale-tikotiko, kei na kena veikolokolo, kei na kena veiduru, kei na kena veiqara,

32kei na veiduru ni bai sa volita na rara, kei na kedra qara, kei na kedrai vakadei, kei na kedra dali, kei na kedrai yaya kecega, kei na kedrai valavala kecega: ia dou cavuta na yaca ni yaya sa nodrai tavi e nodrai kaukau.

33O qo na nodrai tavi na nodra veimataqali na luve i Mirari, io na nodrai tavi kecega e na vale gatu ni veitata, ka me lewa ko Icamari na luve i Eroni na bete.

34Ia ko Mosese kei Eroni kei ira na turaga ni vavakoso, era sa wiliki ira na tagane maivei ira na luve i Koaca e na nodra veimataqali, ka vaka na nodra qase,

35o ira sa tolusagavulu na nodra yabaki ka levu cake, ka yacovi ira sa limasagavulu na nodra yabaki, o ira kecega sa lako rawa e nai vavakoso, ki na cakacaka ni vale gatu ni veitata:

36ia ko ira sa wili vei ira, e na nodra veimataqali, era sa rua na udolu ka vitu na drau ka limasagavulu.

37O ira o qo sa wili e na nodra veimataqali na luve i Koaca, o ira kecega e cakacaka e na vale gatu ni veitata, o ira sa wilika ko Mosese kei Eroni me vaka na vosa i Jiova e na gusu i Mosese.

38Ia ko ira sa wili vei ira na luve i Kerisoni, e na nodra veimataqali, ka vaka na nodra qase,

39o ira sa tolusagavulu na nodra yabaki ka levu cake, ka yacovi ira sa limasagavulu na nodra yabaki, o ira kecega sa lako rawa e nai vavakoso, ki na cakacaka ni vale gatu ni veitata,

40io ko ira sa wili vei ira, e na nodra veimataqali, vaka na nodra qase, era sa rua na udolu ka ono na drau ka tolusagavulu.

41O ira o qo sa wili e na nodra veimataqali na luve i Kerisoni, o ira kecega e cakacaka e na vale gatu ni veitata, o ira sa wilika ko Mosese kei Eroni me vaka na vosa i Jiova.

42Ia ko ira sa wili vei ira na nodra veimataqali na luve i Mirari, e na nodra veimataqali, vaka na nodra qase,

43o ira sa tolusagavulu na nodra yabaki ka levu cake, ka vacovi ira sa limasagavulu na nodra yabaki, o ira kecega sa lako rawa e nai vavakoso, ki na cakacaka ni vale gatu ni veitata,

44io ko ira sa wili vei ira e na nodra veimataqali, era sa tolu na udolu ka rua na drau.

45O ira o qo sa wili e na nodra veimataq ali na luve i Mirari, o ira sa wilika ko Mosese kei Eroni me vaka na vosa i Jiova e na gusu i Mosese.

46O ira kecega sa wili vei ira na luve i Levi, o ira sa wilika ko Mosese kei Eroni kei ira na turaga ni Isireli, e na nodra veimataqali, ka vaka na nodra qase,

47o ira sa tolusagavulu na nodra yabaki ka levu cake, ka yacovi ira sa limasagavulu na nodra yabaki, o ira kecega sa laʼki qarava na cakacaka, ka qarava nai kaukau, e na vale gatu ni veitata,

48io ko ira sa wili vei ira, era sa walu na udolu ka lima na drau ka walusagavulu.

49Era sa wiliki ni sa lewa ko Mosese, me vaka na vosa i Jiova, ko ira yadua me vaka na nona cakacaka, kei na nonai kaukau: ia ko ira sa wilika ko koya, sa vaka nai vakaro i Jiova vei Mosese.