1O IRA o qo nai tubutubu i Eroni kei Mosese, e na siga ka vosa kina vei Mosese ko Jiova mai na ulu-ni-vanua ko Sinei.
2Ia o qo na yacadratou na luve i Eroni; o Natapi na ulumatua, kei Apiu, ko Eliasari, kei Icamari.
3O qo na yacadratou na luve i Eroni, eratou bete sa lumuti, o iratou ka vakatabui me ratou bete.
4Ia ko Natapi kei Apiu, erau a mate e na mata i Jiova, ni rau a cabora na buka waqa tani e na mata i Jiova, mai na lekutu mai Sinei; a sa sega na luvedrau: ia ko Eliasari kei Icamari erau a cakacaka vakabete e na mata i Eroni na tamadrau.
5A sa vosa vei Mosese ko Jiova, ka kaya,
6Mo kauta mai na yavusa i Levi, ka vakatura e na mata i Eroni na bete, me ra qaravi kova.
7A me ra qarava na nona cakacaka, kei na cakacaka ni vavakoso taucoko, e na mata ni vale gatu ni veitata, me ra kitaka na cakacaka ni vale-tikotiko.
8Ia me ra maroroya nai yaya kecega ni vale gatu ni veitata, kei na cakacaka ni luve i Isireli, me kitaka na cakacaka ni vale-tikotiko.
9Ia mo soli ira na luve i Levi kivei Eroni kei ira na luvena: era sa soli sara vua, maivei ira na luve i Isireli.
10Ia mo lesi Eroni kei ira na luvena, me ra qarauna na nodra cakacaka vakabete: ia na tamata tani sa toro kina me na vakamatei.
11A sa vosa vei Mosese ko Jiova, ka kaya,
12Ia koi au, raica, au sa kauti ira na luve i Levi maivei ira na luve i Isireli, mei sosomi ni ulumatua kece sa sucu eliu vei ira na luve i Isireli: era na qai noqu na luve i Levi;
13ni sa noqu ko ira kece na ulumatua: au a vakatabuya me noqu na ulumatua kecega nei Isireli, na tamata kei na manumanu, e na siga kaʼu a yavita kina na ulumatua kecega mai na vanua ko Ijipita: era na noqu ga: sa ko Jiova koi au.
14A sa vosa vei Mosese ko Jiova mai na lekutu mai Sinei, ka kaya,
15Mo wiliki ira na luve i Levi, me vaka na nodra qase, e na nodra veimataqali: a tagane kecega sa dua na vula ka levu cake mo wilika.
16A sa wiliki ira ko Mosese, me vaka na vosa i Jiova, me vaka sa vakaroti ko koya.
17Ia ko iratou o qo na luve i Levi vaka na yacadratou; ko Kerisoni, kei Koaca, kei Mirari.
18Ia o qo na yacadrau na luve i Kerisoni e na nodrau mataqali; ko Lipini, kei Simi.
19Kei na luve i Koaca e na nodra veimataqali; ko Amirami, kei Isiari, ko Epironi, kei Usieli.
20Kei na luve i Mirari e na nodrau mataqali; ko Mali, kei Musi. O ira o qo na nodra veimataqali na luve i Levi vaka na nodra qase.
21Sa maivei Kerisoni na nodra mataqali na luve i Lipini, kei na nodra mataqali na luve i Simi: oi rau o qo na nodrau mataqali na luve i Kerisoni.
22O ira sa wili maivei ira, e na kedrai wiliwili na tagane kecega, o ira sa vula dua ka levu cake, io ko ira sa wili maivei ira, era udolu vakavitu ka lima na drau.
23A nodra mataqali na luve i Kerisoni era na tiko kivaka ki ra, e taudaku ni vale-tikotiko.
24Ia na turaga ni vale ni nodra qase na luve i Kerisoni ko Eliasafi na luve i Laeli.
25Ia na nodrai tavi na luve i Kerisoni, e na vale gatu ni veitata: na vale-tikotiko, kei nai ubi, kei nai ubi etautuba, kei na ka-rube sai sogo ni vale gatu ni veitata,
26kei na veigatu e bai ni rara, kei na ka-rube sai sogo ni rara sa vakabai, ko ya sa volita na vale-tikotiko kei nai cabocabo-ni-soro, kei na kena vei-dali ki na kena cakacaka kecega.
27Ia sa maivei Koaca na nodra mataqali na luve i Amirami, kei na nodra mataqali na luve i Isiari, kei na nodra mataqali na luve i Epironi, kei na nodra mataqali na luve i Usieli: o ira o qo na veimataqali ni luve i Koaca.
28Na kedrai wiliwili na tagane kecega, era vula dua ka levu cake, era walu na udolu ka ono na drau, era qarava tiko na vale tabu.
29Na nodra veimataqali na luve i Koaca, me ra tiko mai na yasa ni vale-tikotiko sa donuya na ceva.
30Ia na turaga ni vale ni nodra qase na veimataqali ni luve i Koaca, ko Elisafani na luve i Usieli.
31Ia na nodrai tavi na kato ni vunau, kei nai kanakana, kei nai tutu-ni-cina, kei nai cabocabo e rua, kei nai yaya ni vale tabu era dauia kina na cakacaka, kei na ka-rube, kei na kenai valavala kecega.
32Ia ko Eliasari na luve i Eroni na bete ena turaga vei ira na nodra turaga na luve i Levi, me vakaraici ira era qarava tiko na vale tabu.
33Sa maivei Mirari na nodra mataqali na luve i Mali, kei na nodra mataqali na luve i Musi: oi rau o qo na mataqali i Mirari.
34Ia ko ira sa wili maivei ira, ko ya na kedrai wiliwili na tagane kecega, era vula dua ka levu cake, era ono na udolu ka rua na drau.
35Ia na turaga ni vale ni nodra qase na mataqali i Mirari ko Surieli na luve i Epieyili: o ira o qo era na tiko mai na yasa ni vale-tikotiko sa donuya na tokalau.
36Ia na cakacaka era qarava na luve i Mirari na veipapa ni vale-tikotiko, kei na kena veikolokolo, kei na kena veiduru, kei na kena veiqara, kei na kenai yaya kecega, kei na kenai valavala kecega,
37kei na veiduru sa volita na rara sa vakabai, kei na kedra qara, kei na kedrai vakadei, kei na kedra dali.
38Ia ko ira era tiko ki na mata ni vale-tikotiko kivaka ki cake, io ki na mata ni vale gatu ni veitata kivaka ki cake, ko Mosese, kei Eroni kei rau na luvena, me qarava tiko na cakacaka ni vale tabu, e na vukudra na luve i Isireli; ia na tamata tani sa toro kina ena vakamatei.
39O ira kecega na luve i Levi sa wili, erau a wilika ko Mosese kei Eroni me vaka sa vakarota ko Jiova, e na nodra veimataqali, na tagane kecega sa vula dua ka levu cake, era oba vakarua ka rua na udolu.
40A sa kaya vei Mosese ko Jiova, Mo wilika na ulumatua kecega ni luve i Isireli era tagane, era vula dua ka levu cake, ka okata na yacadra.
41Ia mo kauti ira na luve i Levi me noqu (sa ko Jiova koi au) mei sosomi ni ulumatua kece vei ira na luve i Isireli; kei na nodra manumanu na luve i Levi, mei sosomi ni ulumatua kece ni nodra manumanu na luve i Isireli.
42A sa wilika na ulumatua kecega vei ira na luve i Isireli ko Mosese, me vaka ka vakarota vua ko Jiova.
43Ia ko ira kecega na ulumatua era tagane, ni sa wili na yacadra, o ira era vula dua ka levu cake, ko ira sa wili vei ira, era oba vakarua ka rua na udolu ka rua na drau ka vitusagavulu ka tolu.
44A sa vosa vei Mosese ko Jiova, ka kaya,
45Mo kauti ira na luve i Levi mei sosomi ni ulumatua vei ira na luve i Isireli, kei na nodra manumanu na luve i Levi mei sosomi ni nodra manumanu: a ra na noqu na luve i Levi: sa ko Jiova koi au.
46Ia e na vukudra era na voli, ko ira na lewe rua na drau ka vitusagavulu ka tolu maivei ira na nodra na ulumatua na luve i Isireli, era sa lewe levu cake vei ira na luve i Levi;
47mo kauta maivei ira yadua e lima na sikeli; me vaka na sikeli ni tikina tabu mo kauta: (e dua na sikeli sa tauvata kei na kera e ruasagavulu:)
48ia nai lavo ko ya, sa ra voli kina ko ira sa levu cake, mo solia vei Eroni kei rau na luvena.
49A sa kauta ko Mosese nai lavo sa voli kina ko ira sa levu cake, vei ira era sa volia na luve i Levi:
50sa taura nai lavo maivei ira na nodra ulumatua na luve i Isireli; sa dua na udolu ka tolu na drau ka onosagavulu ka lima na sikeli, me vaka na sikeli ni tikina tabu:
51ia na kedrai lavo era sa voli kina sa solia ko Mosese kivei Eroni kei rau na luvena, me vaka na vosa i Jiova, me vaka ka vakarota vei Mosese ko Jiova.
Who We AreWhat We EelieveWhat We Do
2025 by iamachristian.org,Inc All rights reserved.
