Na Tiko Voli Mai Na Lekutu 2 - AI VOLA TABU（FIJ1864）

Ai valavala ni nodrai tikotiko.

1A SA vosa vei Mosese kei Eroni ko Jiova, ka kaya,

2Me ra tiko ko ira na luve i Isireli, na tamata yadua me voleka ki na nona drotini, me vaka na rogele ni vale ni nodra qase: me ra tiko me donuya na vale gatu ni veitata, me volita.

3Ia kivaka ki cake, kivaka ki nai ca-dracadra ni siga, me ra tiko kina ko ira mai na drotini ni nodrai tikotiko na Juta, e na nodra veivavakoso: ia me lewai ira na luve i Juta ko Nasoni na luve i Aminatapi:

4ia na nodrai vavakoso, io ko ira sa wili; maivei ira, era oba vakavitu ka va na udolu ka ono na drau.

5Ia me tiko voleka vei ira na yavusa i Isakari: ia me lewai ira na luve i Isakari ko Nicaneli na luve i Suari:

6ia na nonai vavakoso, io ko ira sa wili maivei ira, era oba vakalima ka va na udolu ka va na drau.

7Na yavusa i Sepuloni: ia me lewai ira na luve i Sepuloni ko Iliapi na luve i Eloni:

8ia na nonai vavakoso, io ko ira sa wili maivei ira, era oba vakalima ka vitu na udolu ka va na drau.

9O ira kecega sa wili e na nodrai tikotiko na Juta, era oba vakatini-kawalu ka ono na udolu ka va na drau, e na nodra veivavakoso. O ira o qo era na liu e na lako.

10Na drotini ni nodrai tikotiko na Rupeni ena donuya na ceva, e na nodra veivavakoso: ia me lewai ira na luve i Rupeni ko Ilisuri na luve i Siteuri:

11ia na nodrai vavakoso, io ko ira sa wili maivei ira, era oba vaka va ka ono na udolu ka lima na drau.

12Ia me tiko voleka vei ira na yavusa i Simioni: ia me lewai ira na luve i Simioni ko Silumieli na luve i Surisatai:

13ia na nonai vavakoso, io ko ira sa wili maivei ira, era oba vakalima ka ciwa na udolu ka tolu na drau.

14Kei na yavusa i Kata: ia me lewai ira na luve i Kata ko Eliasafi na luve i Riueli:

15ia na nonai vavakoso, io ko ira sa wili maivei ira, era oba vaka va ka lima na udolu ka ono na drau ka limasagavulu.

16O ira kecega sa wili e na nodrai tikotiko na Rupeni, era oba vakatini kalima ka dua na udolu ka va na drau ka limasagavulu, e na nodra veivavakoso Ia era nai karua e na lako.

17Ena qai lako na vale gatu ni veitata, sa voleka kina nai tikotiko ni luve i Levi, e na loma ni veivavakoso; me vaka na nodra tiko, era na lakolako vakakina, na tamata yadua e nona tikina ka voleka ki na nodra drotini.

18Na drotini ni nodrai tikotiko na Ifireimi ena donuya na ra, e na nodra veivavakoso: ia me lewai ira na luve i Ifireimi ko Ilisama na luve i Amiuti:

19ia na nodrai vavakoso, io ko ira sa wili maivei ira, era oba vakavaka lima na drau.

20Ia me na tiko voleka vei ira na yavusa i Manase: ia me lewai ira na luve i Manase ko Kamilieli na luve i Pitasuri:

21ia na nonai vavakoso, io ko ira sa wili maivei ira, era oba vakatolu ka rua na udolu ka rua na drau.

22Kei na yavusa i Penijamini: ia me lewai ira na luve i Penijamini ko Epitani na luve i Kitioni:

23ia na nonai vavakoso, io ko ira sa wili maivei ira, era oba vakatolu ka lima na udolu ka va na drau.

24O ira kecega sa wili e na nodrai tikotiko na Ifireimi, era oba vakatini ka walu na udolu ka dua na drau, e na nodra veivavakoso. Ia era nai katolu e na lako.

25Na drotini ni nodrai tikotiko na Tani ena donuya na tokalau, e na nodra veivavakoso: ia me lewai ira na luve i Tani ko Eieseri na luve i Amisatai:

26ia na nodrai vavakoso, io ko ira sa wili maivei ira, era oba vakaono ka rua na udolu ka vitu na drau.

27Ia me tiko voleka vei ira na yavusa i Aseri: ia me lewai ira na luve i Aseri ko Pakieli na luve i Okirani:

28ia na nonai vavakoso, io ko ira sa wili maivei ira, era oba vakava ka dua na udolu ka lima na drau.

29Kei na yavusa i Nafitali: ia me lewai ira na luve i Nafitali ko Eira na luve i Enani:

30ia na nonai vavakoso, io ko ira sa wili maivei ira, era oba vakalima ka tolu na udolu ka va na drau.

31O ira kecega sa wili e na nodrai tikotiko na Tani, era oba vakatinikalima ka vitu na udolu ka ono na drau. Era na muri e na lako, me vaka na nodra drotini.

32O ira o qo era sa wili maivei ira na luve i Isireli, e na nodra qase; o ira kecega era sa wili e nodrai tikotiko, e na nodra veivavakoso, era oba vakaonosagavulu ka tolu na udolu ka lima na drau ka limasagavulu.

33Ia sa sega ni wili vata kei ira na luve i Isireli ko ira na luve i Levi; me vaka ka vakarota vei Mosese ko Jiova.

34A ra sa kitaka na luve i Isireli me vaka na ka kecega sa vakarota vei Mosese ko Jiova: a ra sa dui tiko voleka ki na nodra drotini, a ra sa daulakolako vakakina, ko ira yadua e nodra veimataqali, me vaka na nodra qase.