1A SA vosa vei Mosese ko Jiova mai na lekutu mai Sinei, e na vale gatu ni veitata, e nai matai ni siga e nai karua ni vula, e na kenai karua ni yabaki ni ra sa lako oti mai na vanua ko Ijipita, ka kaya,
2Mo okata nai vavakoso taucoko ni luve i Isireli, e na nodra veimataqali, me vaka na nodra qase, ia me wiliki na yacadra, ko ira kecega na tagane, vakayadua;
3o ira sa ruasagavulu na nodra yabaki ka levu cake, o ira kecega vei ira na Isireli sa lako rawa e nai valu: oi kemudrau kei Eroni, drau wiliki ira e na nodrai matai valu.
4Ia me tiko kei kemudrau e dua na tamata mai na yavusa yadua, ko koya sa turaga e na vale ni nona qase.
5Ia o qo na yacadratou na tamata eratou na tiko kei kemudrau: Maivei ira na Rupeni; ko Ilisuri na luve i Siteuri:
6maivei ira na Simioni; ko Silumieli na luve i Suri-satai:
7maivei ira na Juta; ko Nasoni na luve i Aminatapi:
8maivei ira na Isakari; ko Nicaneli na luve i Suari:
9maivei ira na Sepuloni; ko Iliapi na luve i Eloni:
10maivei ira na luve i Josefa: maivei ira na Ifireimi; ko Ilisama na luve i Amiuti: maivei ira na Manase; ko Kamilieli na luve i Pitasuri:
11maivei ira na Penijamini; ko Epitani na luve i Kitioni:
12maivei ira na Tani; ko Eieseri na luve i Amisatai:
13maivei ira na Aseri; ko Pakieli na luve i Okirani:
14maivei ira na Kata; ko Eliasafi na luve i Tiueli:
15maivei ira na Nafitali; ko Eira na luve i Enani.
16O iratou o qo era tamata rogo e nai vavakoso, eratou turaga e na veiyavusa ni nodra qase, eratou turaga ni veiudolu ni Isireli.
17Ia ko Mosese kei Eroni, erau sa kauti iratou na tamata o qo sa tukuni na yacadratou:
18a rau sa vakasoqona vata nai vavakoso taucoko e nai matai ni siga e nai karua ni vula, a ra sa tukuna na nodrai tubutubu e na nodra veimataqali, me vaka na nodra qase; a ra sa wilika na yacadra, ko ira sa ruasagavulu na nodra yabaki ka levu cake, vakayadua.
19Me vaka ka vunautaka vei Mosese ko Jiova, sa wiliki ira vakakina ko koya mai na lekutu mai Sinei.
20Ia ko ira na luve i Rupeni, na ulumatua i Isireli, e na nodrai tubutubu, e na nodra veimataqali, vaka na nodra qase, vaka nai wiliwili ni yacadra, vakayadua, io na tagane kecega sa ruasagavulu na nodra yabaki ka levu cake, o ira kecega sa lako rawa e nai valu;
21o ira sa wili maivei ira, io e na yavusa i Rupeni, era oba vakava ka ono na udolu ka lima na drau.
22Vei ira na luve i Simioni, ena nodrai tubutubu, e na nodra veimataqali, vaka na nodra qase, o ira sa wili maivei ira me vaka nai wiliwili ni yacadra, vakayadua, io na tagane kecega sa ruasagavulu na nodra yabaki ka levu cake, o ira kecega sa lako rawa e nai valu;
23o ira sa wili maivei ira, io e na yavusa i Simioni, era oba vakalima ka ciwa na udolu ka tolu na drau.
24Vei ira na luve i Kata, e na nodrai tubutubu, e na nodra veimataqali, vaka na nodra qase, vaka nai wiliwili ni yacadra, o ira sa ruasagavulu na nodra yabaki ka levu cake, o ira kecega sa lako rawa e nai valu;
25o ira sa wili maivei ira, io e na yavusa i Kata, era oba vakava ka lima na udolu ka ono na drau ka limasagavulu.
26Vei ira na luve i Juta, e na nodrai tubutubu, e na nodra veimataqali, vaka na nodra qase, vaka nai wiliwili ni yacadra, o ira sa ruasagavulu na nodra yabaki ka levu cake, o ira kecega sa lako rawa e nai valu;
27o ira sa wili maivei ira, io e na yavusa i Juta, era oba vakavitu ka va na udolu ka ono na drau.
28Vei ira na luve i Isakari, e na nodrai tubutubu, e na nodra veimataqali, vaka na nodra qase, vaka nai wiliwili ni yacadra, o ira sa ruasagavulu na nodra yabaki ka levu cake, o ira kecega sa lako rawa e nai valu;
29o ira sa wili maivei ira, io e na yavusa i Isakari, era oba vakalima ka va na udolu ka va na drau.
30Vei ira na luve i Sepuloni, e na nodrai tubutubu, e na nodra veimataqali, vaka na nodra qase, vaka nai wiliwili ni yacadra, o ira sa ruasagavulu na nodra yabaki ka levu cake, o ira kecega sa lako rawa e nai valu;
31o ira sa wili maivei ira, io e na yavusa i Sepuloni, era oba vakalima ka vitu na udolu ka va na drau.
32Vei ira na luve i Josefa:
Vei ira na luve i Ifireimi, e na nodrai tubutubu, e na nodra veimataqali, vaka na nodra qase, vaka nai wiliwili ni yacadra, o ira sa ruasagavulu na nodra yabaki ka levu cake, o ira kecega sa lako rawa e nai valu;
33o ira sa wili maivei ira, io e na yavusa i Ifireimi, era oba vakava ka lima na drau:
34Vei ira na luve i Manase, e na nodrai tubutubu, e na nodra veimataqali, vaka na nodra qase, vaka nai wiliwili ni yacadra, o ira sa ruasagavulu na nodra yabaki ka levu cake, o ira kecega sa lako rawa e nai valu;
35o ira sa wili maivei ira, io e na yavusa i Manase, era oba vakatolu ka rua na udolu ka rua na drau.
36Vei ira na luve i Penijamini, e na nodrai tubutubu, e na nodra veimataqali, vaka na nodra qase, vaka nai wiliwili ni yacadra, o ira sa ruasagavulu na nodra yabaki ka levu cake, o ira kecega sa lako rawa e nai valu;
37o ira sa wili maivei ira, io e na yavusa i Penijamini, era oba vakatolu ka lima na udolu ka va na drau.
38Vei ira na luve i Tani, e na nodrai tubutubu, e na nodra veimataqali, vaka na nodra qase, vaka nai wiliwili ni yacadra, o ira sa ruasagavulu na nodra yabaki ka levu cake, o ira kecega sa lako rawa e nai valu;
39o ira sa wili maivei ira, io e na yavusa i Tani, era oba vakaono ka rua na udolu ka vitu na drau.
40Vei ira na luve i Aseri, e na nodrai tubutubu, e na nodra veimataqali, vaka na nodra qase, vaka nai wiliwili ni yacadra, o ira sa ruasagavulu na nodra yabaki ka levu cake, o ira kecega sa lako rawa e nai valu;
41o ira sa wili maivei ira, io e na yavusa i Aseri, era oba vakava ka dua na udolu ka lima na drau.
42Vei ira na luve i Nafitali, e na nodrai tubutubu, e na nodra veimataqali, vaka na nodra qase, vaka nai wiliwili ni yacadra, o ira sa ruasagavulu na nodra yabaki ka levu cake, o ira kecega sa lako rawa e nai valu;
43o ira sa wili maivei ira, io e na yavusa i Nafitali, era oba vakalima ka tolu na udolu ka va na drau.
44O qo ko ira sa wiliki, a ya sa wilika ko Mosese kei Eroni, kei iratou na turaga ni Isireli eratou lewe tinikarua na tamata, eratou yadua na tamata e na vale ni nona qase.
45Ia ko ira kecega era sa wiliki maivei ira na luve i Isireli, vaka na nodra qase, o ira sa ruasagavulu na nodra yabaki ka levu cake, o ira kecega sa lako rawa e nai valu vei ira na Isireli;
46io ko ira kecega era sa wiliki, era oba vakaonosagavulu ka tolu na udolu ka lima na drau ka limasagavulu.
47Ia ko ira na luve i Levi e na yavusa i tamadra, era sa sega ni wili vata kei ira.
48Ia sa vosa vei Mosese ko Jiova, ka kaya,
49Na yavusa i Levi ga mo kakua ni wilika, ia mo kakua ni okati ira vata kei ira na luve i Isireli:
50ia mo lesi ira ga na luve i Levi me lewa na vale-tikotiko ni vunau, kei na kenai yaya kecega, kei na kena ka kecega: era na colata na vale-tikotiko, kei na kenai yaya kecega; ia me ra qarava tiko, ka me volita na vale-tikotiko na nodra veivale gatu.
51Ia ni na laʼki lako na vale-tikotiko, me qai sereka ko ira na luve i Levi: ia ni na duri na vale-tikotiko, me ra vakaduria na luve i Levi: ia ke torova e dua tani, ena vakamatei.
52Ia ko ira na luve i Isireli, me ra dautiko, na tamata yadua e na nonai tikotiko, kei na tamata yadua me voleka ki na nona drotini, e na nodra veivavakoso.
53Ia ko ira na luve i Levi, me volita na vale-tikotiko ni vunau na nodra veivale gatu, me kakua ni ra cudruvi kina nai vavakoso era luve i Isireli: ia ena nodrai tavi na luve i Levi, me vakatawa na vale-tikotiko ni vunau.
54A ra sa kitaka na luve i Isireli: me vaka na ka kecega ka vunautaka vei Mosese ko Jiova, era sa kitaka vakakina.
Who We AreWhat We EelieveWhat We Do
2025 by iamachristian.org,Inc All rights reserved.
