Na Vunau Ni Soro 27 - AI VOLA TABU（FIJ1864）

Ai voli ni tamata sa soli e na vosa vavakini vei Jiova, 1-8. A manumanu sa soli e na vosa vavakini vei Jiova, 9-13. Ni sa vakatabui na vale, se na tiki ni vanua, 14-25. A ulumatua ni manumanu, 26-29. Ai sigana, 30-33.

1A SA vosa vei Mosese ko Jiova, ka kaya,

2Mo vosa vei ira na luve i Isireli, ka kaya vei ira, Ni sa ia na vosa vavakini, sa sega ni daucaka, e dua na tamata, era na qai nei Jiova me vaka ko sa lewa na kedrai voli.

3Ia na ka ko na lewa mei voli ni tagane ni sa ruasagavulu na nona yabaki, se levu cake ka yacova e onosagavulu, io na ka ko sa lewa me limasagavulu na sikeli siliva, me vaka na sikeli ni tikina tabu:

4ia kevaka sa alewa, mo na qai lewa me tolusagavulu na sikeli na kenai voli.

5Ia kevaka sa lima ga na kena yabaki, se levu cake ka yacova na yabaki e ruasagavulu, mo qai lewa me ruasagavulu na sikeli mei voli ni tagane, ka tini na sikeli mei voli ni alewa.

6Ia kevaka sa dua ga na nona vula, se levu cake ka yacova na yabaki e lima, mo na qai lewa me lima na sikeli siliva nai voli ni tagane, ka tolu na sikeli siliva mo na lewa mei voli ni alewa.

7Ia kevaka sa onosagavulu na nona yabaki se levu cake; kevaka sa tagane, mo na qai lewa me tinikalima na sikeli na kenai voli; ka tini na sikeli nai voli ni alewa.

8Ia kevaka sa dravudravua ko koya, ka sega ni rawata na ka ko sa lewa, me na qai vakaraitaki koya vua na bete, ka me lewa na kenai voli na bete; me vaka na ka sa rawata ko koya sa vosavavakini, me lewa na kenai voli ko koya na bete.

9Ia kevaka sa manumanu e yavai va, sa kau maikina nai madrali vei Jiova, me na tabu kecega o qo sa soli vei Jiova.

10Me na kakua ni vakaisosomitaka ko koya, se kauta e dua tani, a ka vinaka mei sosomi ni ka ca, se na ka ca mei sosomi ni ka vinaka: ia kevaka sa mani vakaisosomitaka na manumanu e yavai va, ena qai tabu ruarua, na manumanu kei na kenai sosomi talega.

11Ia kevaka sa manumanu tawa savasava, sa sega ni kau maikina nai madrali vei Jiova, me na qai vakaraitaka ko koya na manumanu e na mata ni bete:

12me na qai lewa na kenai voli na bete, se sa vinaka se sa ca: me vaka na ka ko sa lewa, ko iko na bete, ena vakakina.

13Ia kevaka sa via sauma me nona tiko, me na qai vakaikuritaka na ka ko sa lewa me kenai voli e dua na tikina ni sa wase lima.

14Ia ni sa vakatabuya na nona vale e dua na tamata me tabu me nei Jiova, me na qai lewa na kenai voli na bete, se sa vinaka se sa ca: me vaka sa lewa na bete, me na vaka ga kina.

15Ia kevaka sa via sauma me nona tiko na nona vale ko koya ka vakatabuya, me na qai vakaikuritaka nai lavo ko sa lewa me kenai voli e dua na tikina ni sa wase lima: ena qai nona.

16Ia kevaka sa vakatabuya me nei Jiova e dua na tiki ni vanua sai taukei kina e dua na tamata, mo na qai lewa na kenai voli me vaka na sila me kaburaki kina, me limasagavulu na sikeli siliva ki na dua na omeri parile me kaburaki.

17Kevaka sa vakatekivu e na jupeli na nona vakatabuya na nona tiki ni vanua, me vaka na ka ko sa lewa, ena vaka ga kina.

18Ia kevaka sa oti na jupeli ni sa vakatabuya na nona tiki ni vanua, me na wilika vua nai lavo ko na bete, me vaka na yabaki sa vo tu yani me yacova na yabaki ni jupeli, ia me kauti tani nai lavo ko ya mai na ka ko sa lewa me kenai voli.

19Ia kevaka sa via sauma me nona tiko na tiki ni vanua ko koya ka vakatabuya, ena qai vakaikuritaka nai lavo ko sa lewa me kenai voli e dua na tikina ni sa wase lima; ena qai vakataudeitaki vua.

20Ia kevaka sa sega ni sauma ko koya me nona tale na tiki ni vanua, ka sa volitaki vua na tamata tani, ena qai sega tale ni saumi rawa me nona.

21Ia na tiki ni vanua, ni sa suka e na jupeli, ena tabu me nei Jiova, me vaka na tiki ni vanua sa vakatabui; enai taukei kina na bete.

22Ia kevaka sa dua na tamata sa vakatabuya me nei Jiova e dua na tiki ni vanua sa volia ko koya, a ya sa sega ni nona tiki ni vanua sai taukei kina eliu;

23me na wilika vua na kenai voli me yacova na yabaki ni jupeli ko na bete, me vaka ko sa lewa; me na solia na kenai voli ko sa lewa e na siga ko ya, me ka tabu me nei Jiova.

24E na yabaki ni jupeli ena suka na tiki ni vanua vua ka volitaka, io vei koya ka taukena na vanua.

25Ia nai voli ni ka kecega ko sa lewa, me na vaka na sikeli ni tikina tabu: e ruasagavulu nakera me dua na sikeli.

26Ia na ulumatua ni manumanu, ko ya na ulumatua nei Jiova, me kakua na tamata me vakatabuya; a karavau, se sipi; sa nei Jiova.

27Ia kevaka sa manumanu tawa savasava, me na qai sauma ko koya me vaka na ka ko sa lewa me kenai voli, ia me vakaikuritaka e dua na tikina ni sa wase lima: ia kevaka sa sega ni saumi, me na qai volitaki me vaka na ka ko sa lewa me kenai voli.

28Ia me na kakua ni volitaki se saumi na ka kecega sa vavakinitaki, sa vavakini-taka e dua na tamata me nei Jiova e nona ka kecega, a tamata, se manumanu e yavai va, se tiki ni vanua sa taukena; a ka kecega sa vavakinitaki sa tabu sara me nei Jiova.

29Ko ira kece sa vavakinitaki, maivei ira na tamata, me na kakua ni saumi; ena vakamatei vakaidina.

30Ia nai katini ni vua kecega ni vanua, na sila ni vanua, se na vua ni kau, sa nei Jiova: sa tabu me nei Jiova.

31Ia kevaka sa via sauma e dua na tamata nai katini ni nona ka e so, me vakaikuritaka e dua na tikina ni sa wase lima.

32Ia na kenai katini ni karavau, se na sipi, io na ka kecega sa lako e ruku ni titoko, io na kenai katini, me tabu me nei Jiova.

33Me kakua ni digitaka ko na tamata na ka vinaka se na ka ca, ia me kakua ni vakaisosomitaka: ia kevaka sa mani vakaisosomitaka, ena qai tabu ruarua, na ka ko ya kei na kenai sosomi talega: me na kakua ni saumi me nona.

34O qo na vunau sa vunautaka ko Jiova vei Mosese me tukuna vei ira na luve i Isireli, e na ulu-ni-vanua ko Sinei.