Na Vunau Ni Soro 26 - AI VOLA TABU（FIJ1864）

Sa tabu na matakau, 1. Me nanumi na siga ni vakacecegu, 2. Sa yalataki na ka vinaka vei ira sa talairawarawa, 3-13. Sa na cudruvi ko ira sa talaidredre, 14-39. Sa na lomani ira na Kalou era veivutuni mai, 40-46.

1DOU kakua ni cakava vei kemudou na kalou lasu, se nai vakatakarakara e ceuceu, se vakaduria na matakau, se na vatu sai vakatakarakara, e na nomudou vanua, me cuva kina: ni sa ko Jiova na nomudou Kalou koi au.

2Dou vakabauta na noqu veisiga ni vakacecegu, ka vakarokorokotaka na noqu vale tabu: sa ko Jiova koi au.

3Kevaka kemudou sa muria na ka kaʼu sa lesia, ka vakabauta na noqu vunau, ka cakava;

4au na qai solia vei kemudou na uca e na kena vula, ka na vuataka na kena vuata na vanua, ka vuataka na vuana na kau ni veiwere.

5Ia na nomudou samu sila ena yacova na vula e tauci kina na vua ni vaini, ia kemudou na tauca tiko na vua ni vaini ka yacova na kaburaki sila, ia dou na kania na kemudou me mamau kina, ka tiko vakasauvinaka e na nomudou vanua.

6Ia kaʼu na solia na sauvinaka e na vanua, dou na koto sobu kina, ka sega e dua me vakarerei kemudou: au na vakaotia tani talega e na vanua na manumanu ca, ena tawa lako-basika talega na nomudou vanua nai seleiwau.

7Ia dou na vakasavi ira na nomudou meca, a ra na bale e nai seleiwau e na matamudou.

8Ia ena lewe lima vei kemudou ena vakasava rawa na lewe drau, ka dua na drau vei kemudou ena vakasava rawa e lewe tini na udolu: ia era na bale e nai seleiwau na nomudou meca e na matamudou.

9Niʼu na golevi kemudou, ka vakaluveataki kemudou, ka vakavuqataki kemudou, ka vakataudeitaka vei kemudou na noqu veiyalayalati.

10Ia dou na kania tiko na ka e dede, ka kauta kitautuba na ka e dede me lalaga ki na ka vou.

11Ia kaʼu na vakaduria na noqu vale-tikotiko e na nomudou maliwa: ia ena tawa cati kemudou na yaloqu.

12Ia kaʼu na lako e na kemudou maliwa, ia kaʼu na nomudou Kalou, ia dou na noqu tamata.

13Sa ko Jiova na nomudou Kalou koi au, kaʼu a kauti kemudou tani mai na vanua ko Ijipita, mo dou kakua ni nodra bobula; ia kaʼu sa drutia nai vesu kemudou a vauci kina, ka cakavi kemudou mo dou lako vakadodonu.

14Ta kevaka kemudou sa bese ni vakarorogo vei au, ka bese ni kitaka na vunau kecega o qo;

15ka sa beca ga na ka kaʼu sa sautaka, se sa cata na noqu lewa na lomamudou, mo dou kakua kina ni kitaka na noqu vunau kecega, a sa vakacacataka ga na noqu veiyalayalati:

16au na qai kitaka o qo vei kemudou; au na lesia na domobula, na lila, kei na katakata waqawaqa, me tauvi kemudou, me kania na mata, ka vakararawataka na lomamudou: ia ena tawa yaga ni dou sa kaburaka na nomudou sila, ni ra na kania na nomudou meca.

17Ia ena rai vakatani vei kemudou na mataqu, ia dou na vakamatei e na matadra na nomudou meca: a ra na lewai kemudou ko ira era sa cati kemudou; ia dou na dro ni sa sega e vakasavi kemudou.

18Ia kevaka kemudou sa bese tiko ni vakarorogo vei au, ni sa yaco na veika o qo, au na qai cudruvi kemudou vakavitu cake e na vuku ni nomudoui valavala ca.

19Ia kaʼu na musuka na kaukauwa kemudou sa totoka kina; ka cakava na lomalagi me vaka na kaukamea vei kemudou, kei na nomudou qele me vaka na parasa:

20ia kemudou na oca walega: ni na sega ni vakalewe na nomudou vanua, ka sega ni vuataka na vuana na kau ni vanua.

21Ia kevaka kemudou na lako vakatani vei au, ka bese ni vakarorogo vei au; au na qai vakayacora na mate ca vakavitu cake vei kemudou e na vuku ni nomudoui valavala ca.

22Ia kaʼu na vakatala na manumanu tawa lasa e na kemudou maliwa, a ra na butakoca na luvemudou, ka vakarusa na nomudou manumanu e yavai va, ka vakalailaitaki kemudou; ia ena tawa lakovi na nomudou veisalatu.

23Ia kevaka kemudou sa bese tiko ni vinaka mai vei au, ni sa yaco na veika o qo, a sa lako vakatani tiko vei au;

24kaʼu na qai lako vakatani talega vei kemudou, ka cudruvi kemudou vakavitu cake, e na vuku ni nomudoui valavala ca;

25ia kaʼu na vakayacora nai seleiwau vei kemudou, me na cudruvaka na veiyalayalati, dou na soqoni vata kina e na loma ni nomudou Veikoro; ia kaʼu na tala na mate ca vei kemudou; ia dou na soli ki na ligadra na meca.

26Niʼu sa vakarusa na kakana sa tokoni kemudou, ena qai lewe tini na alewa sa vavia na kemudou kakana e na lovo e dua, a ra na vakatovolea na bibi ni kemudou kakana, ni ra vota: ia dou na kana, ka tawa mamau.

27Ia kevaka kemudou na tawa vakarorogo vei au, ni sa yaco na ka o qo, ka lako vakatani tiko vei au;

28kaʼu na qai lako vakatani vei kemudou e na cudru waqawaqa; ia koi au, kaʼu na cudruvi kemudou vakavitu cake, e na vuku ni nomudoui valavala ca:

29ia dou na kania na lewedra na luvemudou tagane; kei na lewedra na luvemudou alewa dou na kania.

30Au na vakarusa talega na nomudou veitikina cecere, ka taya sobu na nomudou vei-matakau e vaka na mata-ni-siga, ka biuta na yagomudou sa mate ki dela ni yagodra na nomudou matakau; ia ena cati kemudou na yaloqu.

31Ia kaʼu na vakalalataka na nomudou Veikoro, ka vakarusa na nomudou veivale tabu, kaʼu na tawa boi-vinakata na nomudoui madrali boi vinaka.

32Au na vakarusa talega na vanua: a ra na kurabui kina ko ira na nomudou meca era tiko kina.

33Ia kaʼu na vakasesei kemudou e na maliwa ni veimatanitu, ka ucuna nai seleiwau me muri kemudou: ia ena lekutu na nomudou vanua, ka lala na nomudou Veikoro.

34Sa na qai marautaka na nona vei gauna ni vakacecegu na vanua, ni sa lekutu tu, ni dou sa tiko e nodra vanua na nomudou meca; sa na qai vakacegu na vanua, ka marautaka na kena gauna ni vakacecegu:

35e na gauna kece sa lekutu tu kina, ena vakacegu; e na vuku ni sa sega ni vakacegu e na nomudou gauna ni vakacecegu, ni dou a tiko kina.

36Ia kaʼu na tala na rerere me tauva na lomadra era sa vo vei kemudou, e na vanua ni nodra meca; ia na domo ni drau-ni-kau sa cagina voli ena vakubutaki ira; a ra na dro, me vaka ni ra drotaka nai seleiwau; a ra na bale ni sa sega e vakasava:

37a ra na veibaleti, me vaka sa muri ira nai seleiwau, ni sa sega e vakasava: ia ena sega vei kemudou na kaukauwa me tu e matadra na nomudou meca.

38Ia dou na rusa e na maliwa ni veimatanitu, ia ena kani kemudou na nodra vanua na nomudou meca.

39Ia ko ira sa vo vei kemudou, era na wraicala yani, e na vuku ni nodrai valavala ca, e na nodra vanua na nomudou meca; ia e na vuku ni nodrai valavala ca na nodra qase talega, era na waicala yani vaka.

40Kevaka era na vakatusa na nodrai valavala ca, kei nai valavala ca ni nodra qase, kei na nodra caka cala era sa kitaka vei au, ka ni ra sa lako vakatani vei au;

41niʼu sa lako vakatani talega vei ira, ka kauti ira ki na vanua ni nodra meca; kevaka sa malumalumu mai na lomadra sa tawa cilivi, a ra sa vakadonuya nai sau ni nodrai valavala ca:

42au na qai nanuma na noqu veiyalayalati kei Jekope; kei na noqu veiyalayalati talega kei Aisake, kei na noqu veiyalayalati kei Eparaama, kaʼu na nanuma; kaʼu na nanuma na vanua talega.

43Ia ena sereki maivei ira na vanua, ka marautaka na nona gauna ni vakacecegu, ni sa lekutu ni ra sa takali kina: a ra na vakadonuya nai sau ni nodrai valavala ca, e na vuku dina ni ra sa beca na noqu lewa, a sa cata na noqui lesilesi na yalodra.

44Ia ni sa oti kece na ka o qori, ni ra na tiko e na vanua ni nodra meca, au na tawa biuti ira laivi, ia kaʼu na tawa cati ira me vakarusai ira laivi, ka me vakacacataka na noqu veiyalayalati kei ira: ni sa ko Jiova koi au na nodra Kalou.

45Ia e na vukudra ga, kaʼu na nanuma na veiyalayalati kei ira na qase, ko ira kaʼu a kauta tani mai na vanua ko Ijipita e na matadra na veimatanitu, meʼu nodra Kalou: sa ko Jiova koi au.

46O qo nai lesilesi, kei na lewa, kei na vunau, sa cakava ko Jiova e na ulu-ni-vanua ko Sinei, e na gusu i Mosese, me ra veiyalayalati kina ko koya kei ira na luve i Isireli.