1A SA vosa vei Mosese ko Jiova mai na ulu-ni-vanua ko Sinei, ka kaya,
2Mo vosa vei ira na luve i Isireli, ka kaya vei ira, Ni dou sa yaco ki na vanua kaʼu sa solia vei kemudou, me qai ia e dua na vakacecegu vei Jiova na vanua.
3E ono na yabaki ko na kaburaka na sila e na nomu veiwere, ka ono na yabaki ko na samaka na nomu veivaini, ka kumuna na vuana;
4ia na kenai kavitu ni yabaki me na gauna ni vakacecegu me vakacegu kina na vanua, a vakacecegu vei Jiova: mo kakua ni kaburaka na sila e na nomu veiwere, se samaka na nomu veivaini.
5A ka sa tubu mai na nomu sila sa lutu e na yabaki sa oti, mo kakua ni kumuna vata, se soqona vata na vua ni nomu vaini sa tawa samaki: sa yabaki me vakacegu kina na vanua.
6Ia ena kemudou na ka sa tubu e na gauna sa vakacegu kina na vanua; a kemu, kei na kena na nomui talatala, kei na kena na nomu vada, kei na kena na nomu tamata sa voli na nona cakacaka, kei na kena na nomu kai tani, era sa tiko vulagi kei iko,
7kei na kedra na nomu manumanu e yavai va, kei na kedra na manumanu tawa lasa sa tiko e nomu vanua, io ena kedra na ka kecega sa tubu kina.
8Ia mo qai wilika vei iko e vitu na yabaki ni vakacecegu, me vitu vakavitu na yabaki; ia na kena dede e vitu na yabaki ni vakacecegu, a ya e vasagavulu ka ciwa na yabaki.
9Mo qai vakarogorogotaka yani na davui sa vakadomoi levu, e na kenai katini ni siga e na kenai kavitu ni vula: e na siga ni veibuluti, dou vakarogorogotaka yani kina na davui e na nomudou vanua kece.
10Ia dou vakatabuya na kenai kalimasagavulu ni yabaki, ka kacivaka yani nai seresere e na vanua kivei ira kecega na lewena: ena jupeli vei kemudou; ia dou na lesu na tamata yadua ki na yasana sai taukei kina eliu, dou na lesu na tamata yadua talega ki na nona mataqali.
11Ena jupeli vei kemudou na kenai kalimasagavulu ni yabaki ko ya: dou kakua ni kaburaka na sila, se kumuna vata na ka sa tubu kina mai na sila sa lutu, se soqona vata mai na vaini sa tawa samaki kina:
12ni sa jupeli; ena tabu vei kemudou: mai na were ga, dou kania na ka sa tubu kina.
13E na yabaki ni jupeli o qo dou na lesu na tamata yadua ki na yasana sai taukei kina eliu.
14Ia kevaka e dua vei kemudou sa volitaka e dua na ka vua na kai nomu, se volia vua na kai nomu, me kakua ni vakacacana e dua nai kadua vei kemudou:
15mo volia vua na kai nomu me vaka nai wiliwili ni yabaki sa oti kina na jupeli; me volitaka vei iko ko koya me vaka nai wiliwili ni yabaki ni vuata:
16ni sa vuqa na yabaki, mo vakalevutaka na kenai voli; ia ni sa vica ga na yabaki, mo vakalailaitaka na kenai voli: ni sa volitaka vei iko ko koya me vaka nai wiliwili ni vuata.
17Ia me kakua ni vakacacana e dua nai kadua vei kemudou; mo rerevaka ga na nomu Kalou: ni sa ko Jiova na nomu Kalou koi au.
18Ia dou cakava na noqu vunau, ka vakabauta na noqu lewa, ka cakava; dou na qai tiko vakasauvinaka e na vanua.
19Ia ena vuataka na kena vuata na vanua, ia dou na kana ka mamau, ka tiko vakasauvinaka kina.
20Ia de kemudou kaya, A cava na ka me keimami kania e na kenai kavitu ni yabaki? raica, keimami na tawa kaburaka na sila, se kumuna vata na neimami vuata:
21au na vakarota mo dou kalougata e na kenai kaono ni yabaki, ia ena vuataki kina na vua ena rauta na yabaki e tolu.
22Ia dou na kaburaka na sila e na kenai kawalu ni yabaki, ka kania na vuata makawa ka yacova nai kaciwa ni yabaki; dou na kania tiko na vuata makawa ka me kumuni mada na vuata.
23Me na tawa volitaki na vanua me takali sara: ni sa noqu ga na vanua; ia oi kemudou, sa kai tani ka tiko vulagi vei au.
24Ia e na vanua taucoko kemudou sa taukena, dou na laiva me voli tale na vanua.
25Kevaka sa dravudravua mai na wekamu, a sa volitaka na vanua e so sa taukena, a sa laʼki volia tale e dua na wekana, me na qai volia rawa ko koya na ka ka volitaka na wekana.
26Ia kevaka sa sega na wekana na tamata ko ya me volia tale, a sa qai rawata ko koya, a sa kunea na ka me volia kina;
27me qai wilika ko koya na veiyabaki sa volitaki oti, ka vakasuka na kena caca ni voli vua na tamata ka volitaka kina; ia me lesu ko koya ki na vanua sa taukena eliu.
28Ia kevaka sa sega ni rawata na vakasuka vua, ena nona tiko ka volia na ka ka volitaki, me yaco mada na yabaki ni jupeli: ia e na jupeli, ena suka, ena qai lesu ko koya ki na vanua sa taukena eliu.
29Ia kevaka sa dua na tamata sa volitaka na vale sa tikori e loma ni koro vakabai, ena qai tara me volia tale e na yabaki ka volitaka kina; ni sa tawa oti na yabaki, sa tara vua me volia tale.
30Ia kevaka sa oti dina e dua na yabaki, a sa sega ni voli tale, ena qai vakataudeitaki na vale e na loma ni koro vakabai, me takali sara me nona ka volia, e na nona veitabatamata: ena tawa suka e na jupeli.
31Ia na veivale e na koro lalai sa tawa vakabai volita, me na vaka-tauvatani kei na veiwere ni vanua: e tara ga me voli tale, a ra na suka e na jupeli.
32Ia e na nodra veikoro na luve i Levi, na veivale e na koro erai taukei kina, e tara me ra volia na luve i Levi e na gauna kecega.
33Ia ko koya sa volia tale, me dua vei ira na luve i Levi; ia ena suka e na jupeli na vale ka volitaki, kei na koro sai taukei kina: ni sa ka era taukena na luve i Levi, e na kedra maliwa na luve i Isireli, na veivale ga e na nodra Veikoro.
34Ia na vanua sa volita na nodra Veikoro sa tabu ni volitaki; ni ra sa taukena ka tawa mudu.
35Ia kevaka sa dravudravua mai na wekamu, ka sa yali na nona ka ni drau a tiko kaya, mo na qai vukei koya; io na kai tani, se vulagi; me bula ko koya vata kei iko.
36Mo kakua ni taura maivei koya nai voli ni ka saravi, se nai kuri ni ka: mo rerevaka ga na nomu Kalou; me bula na wekamu vata kei iko.
37Mo kakua ni solia vua na nomui lavo me vakai volitaki, se solia vua na nomu kakana me vakuria.
38Sa ko Jiova na nomudou Kalou koi au, sa kauti kemudou mai na vanua ko Ijipita, me solia vei kemudou na vanua ko Kenani, meʼu nomudou Kalou.
39Ia kevaka sa dravudravua mai na wekamu ni drau a tiko kaya, a sa volitaki vei iko, mo kakua ni kitaki koya me vaka sa bobula:
40ena tiko ga vei iko me vaka na tamata sa voli na nona cakacaka, se na vulagi; me qaravi iko, ka yacova ga na yabaki ni jupeli:
41me na qai lako tani vei iko, ko koya, kei iratou vata kaya na luvena, ka lesu ki na nona mataqali, ia me lesu ki na vanua ka ra taukena na nona qase eliu.
42Ni sa noqu tamata ko ira, kaʼu a kauta mai na vanua ko Ijipita: me ra kakua ni volitaki mo vaka na bobula.
43Mo kakua ni valavala vakaukauwa vua; mo rerevaka ga na nomu Kalou.
44Ia na nomu tagane bobula, kei na nomu alewa bobula, ko iratou ko na rawata, maivei ira na veimatanitu era sa tiko voleka vei kemudou, sa tara mo dou volia maikina na tagane bobula kei na alewa bobula.
45O ira talega na luvedra na kai tani sa tiko vulagi kei kemudou, e tara mo dou volia maivei ira, kei na nodra mataqali era sa tiko kei kemudou, ko ira sa sucu vei ira e na nomudou vanua: ia dou na taukeni ira.
46Ia dou na tauri ira me nodra na luvemudou era na muri kemudou, me ka taukeni emuri; era na nomudou bobula ka tawa mudu: ia vei ira ga na wekamudou na luve i Isireli, dou kakua ni valavala vakaukauwa, e dua vua nai kadua.
47Ia kevaka sa vutuniyau mai na kai tani se na vulagi drau sa tiko kaya, a sa dravudravua mai na wekamu erau sa tiko kaya, a sa volitaki koya ko koya vua na kai tani, se vua na vulagi drau sa tiko kaya, se vei ira na kawa ni mataqali era kai tani:
48ni sa volitaki oti, sa tara me voli tale mai; me voli koya tale e dua vei ira na wekana:
49e tara me voli koya tale na tamana lailai, se na luvena na tamana lailai; se tara me voli koya tale o dua sa wekana dina sa rau mataqali vata; ia kevaka sa rawata, me na voli koya tale ko koya.
50Ia me wilika kei koya sa voli koya mai na yabaki sa volitaki oti vua, me yacova na yabaki ni jupeli: ia nai lavo me kenai voli me na vakarau-vatani kei nai wiliwili ni yabaki; ena vaka vua na nona yabaki na tamata sa voli na nona cakacaka.
51Kevaka sa vuqa na yabaki sa vo tiko, me na solia tale ko koya me vakakina nai voli ni nonai sere, mai nai lavo sa voli kina.
52Ia kevaka sa lailai ga na yabaki sa vo me yacova na yabaki ni jupeli, me rau qai wilika kaya; me na solia tale ko koya nai lavo ni nonai sere me vaka na kena yabaki sa vo,
53Ena vaka vua na tamata sa voli vakayabaki na nona cakacaka: me kakua ni valavala vakaukauwa vua ko koya e matamu.
54Ia kevaka sa sega ni voli tale vakakina, ena qai suka tani ko koya e na yabaki ni jupeli, ko koya, kei iratou vata kaya na luvena.
55Ni sa noqu tamata ko ira na luve i Isireli; sa noqu tamata ko ira, kaʼu a kauta mai na vanua ko Ijipita: sa ko Jiova na nomudou Kalou koi au.
Who We AreWhat We EelieveWhat We Do
2025 by iamachristian.org,Inc All rights reserved.
