1A SA vosa vei Mosese ko Jiova, ka kaya,
2Mo vosa vei ira na luve i Isireli, ka kaya vei ira, Na veisolevu i Jiova, dou na vakarogorogotaka mei soqosoqo tabu, io o qo na noqu veisolevu.
3E ono na siga me kitaki kina na cakacaka: ia nai kavitu ni siga sa gauna ni vakacecegu, me vakacegu kina, nai soqosoqo tabu; dou kakua ni kitaka kina e dua na cakacaka: o koya sa siga ni vakacecegu vei Jiova e na nomudoui tikotiko kecega.
4O qo sa veisolevu i Jiova, io nai soqosoqo tabu, dou na vakarogorogotaka e na kedra veivula:
5E na kenai katinikava ni siga e nai matai ni vula, e na yakavi, ena solevuti na lako-sivia i Jiova.
6Ia e na kenai katinikalima ni siga ni vula ko ya, sa na ia kina na solevu ni ka sa tawa vakaleveni vei Jiova: e vitu na siga dou kania na ka sa tawa vakaleveni.
7E na kenai matai ni siga, dou ia kina e dua nai soqosoqo tabu: dou kakua ni cakava kina e dua na cakacaka vakaisi.
8Ia dou cabora nai soro o na buka waqa vei Jiova e na siga e vitu: e na kenai kavitu ni siga sa dua nai soqosoqo tabu: dou kakua ni cakava kina e dua na cakacaka vakaisi.
9Sa vosa talega vei Mosese ko Jiova, ka kaya,
10Mo vosa vei ira na luve i Isireli, ka kaya vei ira, Ni dou na yacova na vanua kaʼu sa solia vei kemudou, ka sa tamusuka kina na kena vuata, dou na qai kauta e dua nai vau sila, nai sevu ni nomudou vuata, vua na bete:
11ia me na yalovaka ko koya nai vau sila e na mata i Jiova, me ka dou na vinakati kina; e na sabogibogi ni sa oti na siga ni vakacecegu me yalovaka na bete.
12Ia e na siga kemuni sa yalovaka kina nai vau sila, dou cabora kina e dua na lami sa tawa ca sa yabaki dua ga, mei soro kama vei Jiova.
13Ia nai madrali laukana vata kaya me rua na omeri madrai droka sa waki vata kei na waiwai, nai soro sa cabo e na buka waqa vei Jiova me ka boi vinaka: ia nai madrali liviraki vata kaya me waini e rua na painiti ka levu cake.
14Ia dou kakua ni kania na madrai, se na sila tavu, se na sola drokadroka, ka me yaco mada na siga dou sa kauta kina nai madrali vua na nomudou Kalou: me ka vakaroti tawa mudu e na nomudoui tikotiko kecega, e na nomudou veitabatamata.
15Ia ni sa oti na siga ni vakacecegu, na siga kemudou a kauta kina nai vau sila mei soro e yalovaki, mo dou wilika vei kemudou e vitu sara na wiki:
16ia me yacova na sabogibogi ni sa oti na siga ni vakacecegu e vitu, dou wilika e limasagavulu na bogi; dou na qai cabora nai madrali laukana e na sila vou vei Jiova.
17Mo dou kauta mai na nomudou veivale e rua nai buli madrai sa caka e na omeri e rua, me yalovaki: me madrai droka; me vavi kei na leveni; enai sevu vei Jiova.
18Ia dou cabora kei na madrai e vitu na lami sa tawa ca, sa yabaki dua ga, ka dua na karavau, ka rua na sipi tagane: eratou nai soro kama vei Jiova, kei nai madrali laukana kei nai madrali liviraki vata kei ira, io nai soro sa cabo e na buka waqa, na ka boi vinaka vei Jiova.
19Dou na qai vakamatea e dua na koti mei soro ni valavala ca, ka rua na lami sa yabaki dua ga mei madrali me cabo e na veivinakati.
20Ia me yalovaka vata na bete kei na madrai sai sevu, mei soro sa yalovaki e na mata i Jiova, kei na lami e rua: era na tabu me nei Jiova, me nona na bete.
21Ia e na siga ga ko ya dou vakarogorogotaka, mei soqosoqo tabu vei kemudou; dou kakua ni cakava kina e dua na cakacaka vakaisi: me ka vakaroti tawa mudu e na nomudoui tikotiko kecega, e na nomudou veitabatamata.
22Ia ni dou sa tamusuka na vuata ni nomudou vanua, mo kakua ni vakaotia na bati ni nomu veiwere ni ko tamusuka, mo kakua talega ni tomika na ka sa lutulutu walega ni ko sa tamusuka na sila: mo biuta ga me nodra na dravudravua, kei na vulagi: sa ko Jiova na nomudou Kalou koi au.
23Sa vosa talega vei Mosese ko Jiova, ka kaya,
24Mo vosa vei ira na luve i Isireli, ka kaya, E na kenai kavitu ni vula, e nai matai ni siga ni vula, me dua na nomudou siga ni vakacecegu, a gauna me vakana-nanu kina me uvu davui, nai soqosoqo tabu.
25Dou kakua ni kitaka kina na cakacaka vakaisi: dou cabora ga nai soro e na buka waqa vei Jiova.
26Sa vosa talega vei Mosese ko Jiova, ka kaya,
27A kenai katini talega ni siga e na kenai kavitu ni vula o qo, na siga ni veibuluti: mei soqosoqo tabu vei kemudou; dou vakamalumalumutaki kemudou kina, ka cabora e dua nai soro e na buka waqa vei Jiova.
28Ia dou kakua ni kitaka e dua na cakacaka e na siga ko ya: ni sa siga ni veibuluti, me sorovaki kemudou kina e na mata i Jiova na nomudou Kalou.
29Ia na tamata kecega sa na tawa vakamalumalumutaki e na siga ko ya, ena muduki tani ko koya vei ira na kai nona.
30Kei na tamata kecega sa kitaka e dua na cakacaka e na siga ko ya, au na vakarusa tani na tamata ko ya maivei ira na kai nona.
31Dou kakua ni kitaka e dua na cakacaka: me ka vakaroti tawa mudu e na nomudoui tikotiko kecega, e na nomudou veitabatamata.
32Ena siga ni vakacecegu mo dou vakacegu kina, ia dou vakamalumalumutaki kemudou: e na kenai kaci wa ni siga ni vula, e na yakavi, mai na yakavi e dua ka yacova na yakavi e dua, mo dou ia kina na nomudoui vakacegu.
33Sa vosa talega vei Mosese ko Jiova, ka kaya,
34Mo vosa vei ira na luve i Isireli, ka kaya, A kenai katinikalima ni siga e na kenai kavitu ni vula o qo, me ia kina na solevu ni vale taba ni kau vei Jiova ka bogi vitu.
35E na kenai matai ni siga, me dua nai soqosoqo tabu: mo dou kakua ni kitaka kina e dua na cakacaka vakaisi.
36E vitu na siga dou cabora kina nai soro e na buka waqa vei Jiova: e na kenai kawalu ni siga, me dua nai soqosoqo tabu vei kemudou, ia dou na cabora e dua nai soro e na buka waqa vei Jiova: sa solevu tabu: dou kakua ni cakava kina na cakacaka vakaisi.
37O qo sa veisolevu i Jiova, dou na vakarogorogotaka mei soqosoqo tabu, me cabora nai soro e na buka waqa vei Jiova, nai soro kama, kei nai madrali laukana, na ka sa cabo, kei nai madrali liviraki, sa dui caka e nona siga na ka kecega:
38ia na veisiga ni vakacecegu talega i Jiova, kei na nomudoui solisoli, kei nai madrali kecega dou sa vosavavakini kina, kei na nomudoui soro kecega sa lomamudou mo dou cabora, ko ya dou na solia vei Jiova.
39E na kenai katinikalima talega ni siga e na kenai kavitu ni vula, ni dou sa kumuna vata na vuata ni vanua, dou na ia kina na solevu vei Jiova ka bogi vitu; ena siga ni vakacecegu nai matai ni siga, ena siga ni vakacecegu talega nai kawalu ni siga.
40Ia dou kauta vei kemudou e nai matai ni siga na taba ni kau vinaka, vata kei na vuana, e so na taba ni balabala, e so talega na taba ni kau e veitini na tabana, kei na kau wilou mai na uciwai: ia dou na reki e na mata i Jiova na nomudou Kalou ka bogi vitu.
41Ia dou na ia na solevu o qo, na solevu vei Jiova, me bogi vitu e na veiyabaki. Me ka vakaroti tawa mudu e na nomudou veitabatamata: dou daukitaka e na kenai kavitu ni vula.
42E bogi vitu dou tiko e na veivale taba ni kau; o ira kecega sai taukei vei ira na Isireli era na tiko e na veivale taba ni kau:
43me ra kila kina na nomudou veitabatamata niʼu a dauvakatikori ira na luve i Isireli e na veivale taba ni kau, niʼu a kauti ira mai na vanua ko Ijipita: sa ko Jiova na nomudou Kalou koi au.
44A sa tukuna vei ira na luve i Isireli na veisolevu i Jiova ko Mosese.
Who We AreWhat We EelieveWhat We Do
2025 by iamachristian.org,Inc All rights reserved.
