Na Vunau Ni Soro 22 - AI VOLA TABU（FIJ1864）

Sa tabu rua na bete sa tawa savasava me kania na ka tabu, 1-7; a sa tabu na ka sa mate loa, se dresulaki, 8, 9. Sa tabu vua na vulagi me kania na ka tabu, 10-16. A ka mei soro me tawa ca, 17-25. Ai valavala ni soro, 26-33.

1A sa vosa vei Mosese ko Jiova, ka kaya,

2Mo vosa vei Eroni kei iratou na luvena, me ra tawasei ira mai na ka sa tabu vei ira na luve i Isireli, me ra kakua ni vakacacataka na yacaqu tabu e na ka era vakatabuya me noqu: sa ko Jiova koi au.

3Mo kaya vei ira, O koya vei ira kecega na nomudou kawa, e na nomudou veitabatamata, sa toro ki na veika tabu era vakatabuya vei Jiova na luve i Isireli, ni sa tiko vua na nona tawa savasava, a tamata ko ya sa na muduki tani e mataqu: sa ko Jiova koi au.

4A tamata kecega vei ira na luve i Eroni sa vukavuka, se turi, me na tawa kania ko koya na ka tabu, ka me savasava mada ko koya. Kei koya sa tara na ka tawa savasava e na vuku ni mate, se na tamata sa bura na nona si;

5se koya sa tara e dua na ka sa qasi, sa tawa savasava kina, se na tamata sa tawa savasava kina, e na ka tawa savasava kecega sa tiko vua;

6na tamata sa tara e dua sa vakakina, ena tawa savasava ka yacova na yakavi, ka na sega ni kania na ka tabu, kevaka sa sega ni vakasilima na yagona e na wai.

7Ia ni sa dromu na siga, ena savasava, ka sa oti, me na qai kania na ka tabu, ni sa kena kakana o qo.

8A ka sa mate loa, se kadresu, me kakua ni kania ko koya me vakadukadukalitaki kina: sa ko Jiova koi au.

9Ia me ra vakabauta na noqu vunau, de ra cudruvi kina e nai valavala ca, ka mate kina, ni ra sa vakacacataka: sa ko Jiova koi au, sa vakasavasavataki ira.

10Me kakua e dua na kai tani me kania na ka tabu: a nona vulagi na bete, se nona tamata sa voli na nona cakacaka, me kakua ni kania na ka tabu:

11ia kevaka sa volia e dua na tamata e nai lavo ko na bete, me na kania ko koya, kei koya sa sucu e nona vale: me ra kania na kena.

12A luvena alewa talega na bete, o koya sa veiwatini kei na kai tani, me na kakua ni kana ko koya e nai madrali maivei ira na ka tabu.

13Ia kevaka sa dawai na luvena alewa na bete, se biu, ka sega na luvena, a sa lesu tale ki na vale i tamana, me vaka ni ka gonealewa, me kania ga na kei tamana: ia me kakua na kai tani me kania.

14Ia kevaka sa kania loa na ka tabu e dua na tamata ni sa tawa kila, me na qai solia vua na bete na ka sa tautauvata kei na ka tabu, ka kuria e na dua na kena wase ni sa wase lima.

15Ia mo ra kakua ni vakaisina na nodra ka tabu na luve i Isireli, era sa cabora vei Jiova;

16ia ni ra kania na ka tabu maivei ira, me ra kakua ni cakavi ira me ra cudruvi e na caka cala; ni sa ko Jiova koi au, sa vakasavasavataki ira.

17Sa vosa talega vei Mosese ko Jiova, ka kaya,

18Mo vosa vei Eroni, kei iratou na luvena, kei ira kece na luve i Isireli, ka kaya vei ira, Ko koya yadua vei ira na mataqali i Isireli, se na kai tani sa tiko kei ira na Isireli, sa via cabora na nonai madrali, e na vuku ni nona vosa vavakini kecega, kei na nonai soro kecega sa lomana ga me cabora, era via cabora vei Jiova mei soro kama;

19mo dou vinakati kina, me dua na tagane sa tawa ca, se karavau, se sipi, se koti.

20Na ka sa dua kina na ca, dou kakua ni cabora: ni na sega ni ka dou na vinakati kina.

21Ia ko koya yadua sa cabora e dua nai madrali e na veivinakati vei Jiova, me vakayacora na ka ka vosavavakini kina, se nai soro sa lomana ga me cabora, se karavau se sipi, me tawa ca, me vinakati; me kakua e dua kina na ca.

22A mataboko, se ramusu, se mudu e dua na tikina, se dabo, se sa bu ca se vakanana, dou kakua ni cabora o qori vei Jiova, se cabora vei Jiova maivei ira e dua na ka sa cabo e na buka waqa, e na dela ni cabocabo-ni-soro.

23A karavau, se lami, sa dua na tikina sa tawa yaga, se yali e so na tikina, o qori e tara mo cabora ni sa lomamu ga; ia me vakayacora e dua na vosa vavakini, ena tawa donu kina.

24Dou kakua ni cabora vei Jiova na ka sa qaqi na qalana, se vorolaki, se ramusu, se sa sele; ia dou kakua ni kitaka na ka o qo e na nomudou vanua.

25Mai na ligana talega na kai tani dou kakua ni cabora na kakana me nei nomudou Kalou e na dua na ka vakaoqo; ni sa vei ira na nodra vuca, a sa dua vei ira na ca: era na sega ni ka dou na vinakati kina.

26Sa vosa talega vei Mosese ko Jiova, ka kaya,

27Ni sa sucu e dua na karavau, se sipi, se koti, me tiko voli kei tinana ka bogi vitu; ia e na kenai kawalu ni siga, kei na veisiga emuri, ena donu ni sai soro sa cabo e na buka waqa vei Jiova.

28Ia na karavau alewa se sipi alewa, dou kakua ni vakamatea ruarua, ko koya kei na luvena, e na siga e dua.

29Ia ni dou sa via cabora e dua nai soro ni vakavinavinaka vei Jiova, mo dou cabora mo dou vinakati kina:

30e na siga ko ya ga me kani; dou kakua ni laiva me vo ki na sabogibogi: sa ko Jiova koi au.

31Ia dou vakabauta na noqu vunau, ka kitaka: sa ko Jiova koi au.

32Dou kakua tale ni vakacacataka na yacaqu tabu; ia kaʼu na vakarokorokotaki ga vei irana luve i Isireli: sa ko Jiova koi au, sa vakasavasavataki kemudou,

33kaʼu a kauti kemudou mai na vanua ko Ijipita, meʼu nomudou Kalou: sa ko Jiova koi au.