Na Vunau Ni Soro 21 - AI VOLA TABU（FIJ1864）

A vunau vei ira na bete, e na ka e so.

1A SA kaya vei Mosese ko Jiova, Mo vosa vei iratou na bete na luve i Eroni, ka kaya vei iratou, Me kakua ni vakatawasavasavataki koya e dua e na vuku ni tamata mate vei ira na kai nona;

2ia e na vuku ni wekana ga sa wekana dina, e na vuku ni tinana, se tamana, se na luvena tagane, se na luvena alewa, se na tuakana, se na tacina,

3se na ganena ni sa gonealewa, sa wekana dina, o koya sa tawa vakawati; e na vukuna, e tara me vakatawasavasavataki koya kina.

4Me kakua ni vakatawasavasavataki koya e na vuku i koya sa turaga vei ira na nona tamata, me tawa savasava kina.

5Me ra kakua ni tasia na uludra, se tasia na tutu ni kumidra, se tava na yagodra.

6Me ra savasava vua na nodra Kalou, ka kakua ni vakacacataka na yaca ni nodra Kalou: ni ra sa cabora tiko na ka sa cabo e na buka waqa vei Jiova, me kakana me nei nodra Kalou: o koya me ra savasava kina.

7Me ra kakua ni taura me watidra e dua na alewa sa dauyatagane, se sa vaqaseni; me ra kakua talega ni taura e dua na alewa sa biu tani vua na watina: ni sa savasava ko ira yadua vua na nona Kalou.

8Mo vakasavasavataki koya kina; ni sa cabora ko koya na kakana me nei nomu Kalou: mo nanumi koya me savasava: ni sa savasava koi au ko Jiova, sa vakasavasavataki kemudou.

9Ia na luvena alewa e dua na bete sa vakaisini koya ni sa dauyatagane, sa vakacacataki tamana: ena vakamai ko koya e na buka.

10Ia na bete levu maivei ira na wekana, sa livi ki na uluna na waiwai ni veilumuti, a sa buli me suluma na veisulu tabu, me kakua ni biuta na nonai sala, se dresulaka nona veisulu;

11me kakua talega ni torova e dua na yago sa mate; me kakua ni vakatawasavasavataki koya e na vuku i tamana, se tinana:

12me kakua talega ni curu tani e na vale tabu, so vakacacataka na vale tabu ni nona Kalou; ni sa vakatabui oti e na waiwai ni veilumuti sa nei nona Kalou: sa ko Jiova koi au.

13Ia me kauta me watina e dua ni sa gonealewa ga.

14A alewa dawai, se alewa sa biu, se alewa sa vaqaseni, se na dauyatagane, me kakua ni taura e dua e vakaoqo: ia me taura me watina e dua sa gonealewa ga, maivei ira na kai nona.

15Me kakua talega ni vakaisina na nona kawa e nodra maliwa na kai nona; ni sa ko Jiova koi au, sa vakasavasavataki koya.

16Sa vosa talega vei Mosese ko Jiova, ka kaya,

17Mo vosa vei Eroni, ka kaya, O koya vei ira na nomu kawa e na dua nai tabatamata, sa dua kina na ca, me kakua ni toro ko koya me cabora na kakana me nei nona Kalou:

18ia na tamata kecega sa dua kina na ca, me na kakua ni torova: a tamata mataboko, se lokiloki, se ucu raraba, se dua na tikina sa tawa yaga,

19se na tamata sa ramusu na yavana, se ramusu na ligana,

20se sa dakuvusi, se na leka, se ca na matana, se sa bu ca se vakanana, se ceke;

21a tamata kecega vei ira na luve i Eroni na bete, sa dua kina na ca, me kakua ni toro me cabora na ka sa cabo e na buka waqa vei Jiova; sa dua na ca vua; me kakua ni toro ko koya me cabora na kakana me nei nona Kalou.

22Me na kania ga ko koya na kakana sa nei nona Kalou, maivei ira na ka tabu sara, kei na ka tabu:

23ia me kakua ga ni curu ki loma ni lati, se torova nai cabocabo-ni-soro, e na vuku ni sa dua na ca vua; me kakua kina ni vakacacataka na noqu veivale tabu: ni sa ko Jiova koi au, sa vakasavasavataki ira.

24A sa tukuna ko Mosese vei Eroni, kei iratou na luvena, kei ira kece na luve i Isireli.