Na Vunau Ni Soro 20 - AI VOLA TABU（FIJ1864）

Sa tukuna ko Jiova e so tale na ka e tabu.

1A sa vosa vei Mosese ko Jiova, ka kaya,

2Mo kaya tale vei ira na luve i Isireli, A tamata yadua vei ira na luve i Isireli, se vei ira na kai tani sa tiko vulagi kei ira na Isireli, sa solia e dua na luvena vei Moleki; ena vakamatei vakaidina ko koya: na lewe ni vanua me ra viriki koya e na vatu.

3Ia kaʼu na cudruva na tamata ko ya, ka muduka tani vei ira na kai nona; e na vuku ni sa solia e dua na luvena vei Moleki, me vakadukadukalitaka na noqu vale tabu, ka vakacacataka na yacaqu tabu.

4Ia kevaka sa bau tabonaka na matadra vua na tamata ko ya ko ira na lewe ni vanua, ni sa solia e dua na luvena vei Moleki, ka tawa vakamatei koya:

5au na qai cudruva na tamata ko ya, kei na nona lewe-ni-vale, ka muduki koya tani, kei ira kece era sa lako tani me muri koya, me lako tani vei Moleki, maivei ira na kai nodra.

6Kei na tamata sa golevi ira sa daucurumi, kei ira na dauveinita, me lako tani me muri ira, kaʼu na cudruva na tamata ko ya, ka muduka tani vei ira na kai nona.

7Dou vakasavasavataki kemudou kina, mo dou savasava: ni sa ko Jiova na nomudou Kalou koi au:

8ia dou vakabauta na noqu vunau, ka cakava: sa ko Jiova koi au, sa vakasavasavataki kemudou.

9Ena vakamatei vakaidina ko koya yadua sa rukaka na tamana se tinana: sa rukaka na tamana se tinana ko koya; sai sau dodonu na nona mate.

10A tamata talega sa veibutakoci kei na watina e dua na tamata, io sa veibutakoci kei na wati ni kai nona, erau na vakamatei vakaidina ruarua, na tagane sa dauyalewa kei na alewa sa dauyatagane.

11Kei na tamata sa koto kei na wati ni tamana, sa veikilaki kei koya erau sa veikilaki kei tamana; erau na vakamatei vakaidina ruarua; sai sau dodonu na nodrau mate.

12Ia kevaka sa koto na tagane e dua kei na vugona, erau na vakamatei vakaidina ruarua: erau sa kitaka na ka veivakamaduataki; sai sau dodonu na nodrau mate.

13Ia kevaka sa koto kei na tagane e dua na tagane me vaka sa koto kei na alewa, erau sa kitaka ruarua na ka vakasisila: erau na vakamatei vakaidina; sai sau dodonu na nodrau mate.

14Ia kevaka sa taura me watina e dua na alewa kei na tinana e dua na tamata, o qori na ca: eratou na vakamai e na buka, ko koya kei rau talega; me kakua kina na ca e na nomudou maliwa.

15Ia kevaka sa koto kei na manumanu na tamata e dua, ena vakamatei vakaidina ko koya; mo dou vakamatea talega na manumanu.

16Ia kevaka sa dua na alewa sa torova e dua na manumanu, me koto kina, mo vakamatea na alewa, kei na manumanu: erau na vakamatei vakaidina; sai sau dodonu na nodrau mate.

17Ia kevaka sa dua na tamata sa taura na ganena, na luvena alewa na tamana, se na luvena alewa na tinana, ka raica na nona luvawale, a sa raica na luvawale ni tagane na alewa ko ya; o qori na ka ca; erau na muduki tani e na matadra na kai nodrau: sa veikilaki kei na ganena na tagane ko ya: ena cudruvi ko koya e na nona caka ca.

18Ia kevaka sa koto na tamata kei na alewa ni sa mate vakaalewa, ka veikilaki kaya; sa vakarairaitaka na nona vure ko koya na tagane; ia sa vakarairaitaka na nona vure ni dra ko koya na alewa; a rau na muduki tani ruarua vei ira na kai nodrau.

19Mo kakua talega ni veikilaki kei na tuaka se na taci i tinamu, se na gane i tamamu: ni sai veikilaki ni veiwekani dina o qori: erau na cudruvi e na nodraui caka ca.

20Ia kevaka sa koto na tamata kei na wati ni tamana lailai, sa veikilaki ko koya kei koya erau sa veikilaki kei tamana lailai: erau na cudruvi e na nodraui valavala ca; erau na mate sa sega na nodrau kawa.

21Ia kevaka sa taura na wati i tuakana se tacina na tamata, sa ka velavela: sa veikilaki ko koya kei koya erau sa veikilaki kei tuakana se tacina; erau na tawa vakaivakawa.

22Ia dou vakabauta na noqu vunau kecega, kei na noqu lewa kecega, ka cakava: me kakua ni luaraki kemudou kina na vanua kaʼu sa kauti kemudou kina mo dou tiko kina.

23Ia dou kakua ni muria nai valavala ni matanitu, kaʼu sa vakaseva tani e na matamudou: ni ra a kitaka na ka kecega o qo, era qai velavela mai vei au:

24ia kaʼu a kaya vei kemudou, Dou na taukena na nodra vanua, ia kaʼu na solia vei kemudou mo dou taukena, a vanua sa dave kina na wai-ni-sucu kei na oni: sa ko Jiova na nomudou Kalou koi au, sa tawasei kemudou tani vei ira na veimatanitu.

25Dou vakatakilakilataka kina na manumanu savasava kei na kena sa tawa savasava, kei na manumanu vuka sa savasava kei na kena sa tawa savasava: mo dou kakua kina ni cakavi kemudou me vakasisilataki e na vuku ni manumanu e yavai va, se na manumanu vuka, se dua na ka sa yaqa e na qele, a ya kaʼu sa tawasea vei kemudou me tawa savasava.

26Ia dou savasava vei au: niʼu sa savasava koi au ko Jiova, a sa tawasei kemudou maivei ira na veimatanitu, mo dou noqu.

27Ia na tagane se alewa sa daucurumi, se sa dauveinita, me na vakamatei vakaidina: me viriki e na vatu: sai sau dodonu na nodra mate.