1A SA vosa vei Mosese ko Jiova, ka kaya,
2Mo vosa vei ira nai vavakoso taucoko ni luve i Isireli, ka kaya vei ira, Mo dou savasava; niʼu sa savasava koi au, ko Jiova na nomudou Kalou.
3Dou rerevaka na tamata yadua na tinana kei na tamana, ka vakatabuya na noqu veisiga ni vakacecegu: sa ko Jiova na nomudou Kalou koi au.
4Dou kakua ni vuki vei ira na kalou lasu, se cakava vei kemudou na kalou e na ka vakawaicalataki: sa ko Jiova na nomudou Kalou koi au.
5Ia kevaka kemudou sa cabora e so nai madrali e na veivinakati vei Jiova, dou cabora me vinakati kina:
6me kani ga e na siga dou sa cabora kina, kei na sabogibogi yani: ia kevaka sa vo na cauna e na kenai katolu ni siga, me vakamai e na buka.
7Ia kevaka sa kani e dua na tikina e na kenai katolu ni siga, sa vakasisilataki; ena sega ni donu.
8Ia ko koya sa kania ena cudruvi e na nona caka ca, e na vuku ni sa cakava me ka wale na ka tabu i Jiova: ia na tamata ko ya ena muduki tani vei ira na kai nona.
9Ia ni dou sa tamusuka na vuata ni nomudou vanua, mo kakua ni tamusuka kece sara na tutu ni nomu veiwere, ka kakua ni tomitomika na ka sa vo e na nomu vuata.
10Ia mo kakua ni tomitomika na i nomu veivaini, se tauca na vua ni vaini kecega e na nomu veivaini: mo laiva me nodra na dravudravua kei na vulagi: sa ko Jiova na nomudou Kalou koi au.
11Dou kakua ni butako; ia dou kakua ni cakacaka vakailasu, se vosa lasu, e dua i vua e dua.
12Dou kakua talega ni vosavavakini vakailasu e na yacaqu; ia mo kakua ni vosavakacacataka na yaca ni nomu Kalou: sa ko Jiova koi au.
13Mo kakua ni cakacaka vakaukauwa vua na kai nomu, se butakoca: ai voli i koya sa vakaivolitaki na nona cakacaka, me kakua ni tiko vei iko e na bogi ka siga.
14Mo kakua ni rukaki koya sa didivara, se biuta e dua na ka e na mata ni mataboko me tarabe kina, ia mo rerevaki koya ga na nomu Kalou: sa ko Jiova koi au.
15Dou kakua ni cakava e dua na ka tawa dodonu ni dou sa ia na lewa: mo kakua ni golevi koya sa kaisi, se vakarokorokotaki koya na tamata levu: mo lewa vakadodonu ga vua na kai nomu.
16Mo kakua ni lako voli ka daukakase e na kedra maliwa na kai nomu: mo kakua ni vosa me mate na kai nomu: sa ko Jiova koi au.
17Mo kakua ni cata na wekamu o lomamu: mo vunauca dina ga na kai nomu, ka kakua ni laiva me valavala ca.
18Mo kakua ni cudruva, se naki ca me saumi ira na luvedra na kai nomu, mo lomani koya ga na kai nomu me vakataki iko: sa ko Jiova koi au.
19Dou vakabauta na noqu vunau.
Me kakua ni veirikati na nomu manumanu e na veiyavusa sa dua tani, me vakaluvea kina. Mo kakua ni kaburaka vata na sore ni sila sa dua tani e na nomu were: mo kakua talega ni suluma nai sulu malo ka vutivuti.
20Ia ko koya sa koto kaya e dua na alewa bobula, sa musuki vei na watina, ka sega sara ni voli, se soli na kenai sere; ena vakanakuitataki na alewa: erau na tawa vakamatei, e na vuku ni sa bobula ko koya.
21Ia me kauta na tagane na nonai soro ni caka cala vei Jiova, ki na katuba ni vale gatu ni veitata, io na sipi tagane mei soro ni caka cala.
22Ia ena sorovaki koya na bete, e na sipi tagane sai soro ni caka cala, e na mata i Jiova, e na vuku ni valavala ca sa cakava ko koya: ena qai tawa cudruvaki nai valavala ca sa cakava ko koya.
23Ia ni dou na yaco ki na vanua ko ya, ka sa tea oti na kau kecega me kakana, kemuni na qai nanuma na vuana me vaka e dua sa tawa cilivi: me tolu na yabaki me vaka sa tawa cilivi vei kemuni; me na kakua ni kani.
24Ia e na kenai kava ni yabaki ena tabu na vuana kecega, me vakavinavinaka kina vei Jiova.
25Ia e na kenai kalima ni yabaki mo ni kania na vuana, me dauvuataka kina vei kemuni na kena vuata: sa ko Jiova na nomuni Kalou koi au.
26Mo ni kakua ni kania e dua na ka kei na kena dra; mo ni kakua talega ni parofi-sai e na gata, se daudigitaka na siga e so.
27Mo ni kakua ni kotiva na tutu ni ulumuni, se vakacacana na tutu ni kumi-muni.
28Mo ni kakua ni tavatava na i yagomuni e na vuku ni mate, se vola na yagomuni: sa ko Jiova koi au.
29Mo kakua ni vakacacana na luvemu alewa mo cakavi koya me dauyatagane; de na vakaoqo mai na vanua, ka sinai mai e na ca na vanua.
30Dou vakabauta na noqu veisiga ni vakacecegu, ka vakarokorokotaka na noqu vale tabu: sa ko Jiova koi au.
31Dou kakua ni golevi ira sa daucurumi, se vaka-saqaqara vei ira na dauveinita, mo dou vakadukadukalitaki kina: sa ko Jiova na nomuni Kalou koi au.
32Mo tu cake e matana sa sikosikoa na uluna, ka vakarokorokotaka na matana na tamata qase, ka rerevaka na nomu Kalou: sa ko Jiova koi au.
33Ia kevaka sa tiko vulagi kei iko e na nomudou vanua e dua na kai tani, mo ni kakua ni vakararawataki koya:
34na kai tani sa tiko vulagi kei kemudou ena tautauvata vei kemudou kei na dua na kai nomudou, ia mo lomani koya me vakataki iko; ni dou a vulagi mai na vanua ko Ijipita: sa ko Jiova na nomuni Kalou koi au.
35Dou kakua ni lewa vakatawadodonu, e nai vakarau ni balavu ni ka, se nai vakarau ni bibi ni ka, se nai vakarau ni levu ni ka:
36me dodonu ga na nomudoui vakarau ni bibi, me dodonu na kena bibi, me dodonu nai vakarau ni ka mamaca, ka dodonu nai vakarau ni ka liviraki: sa ko Jiova na nomuni Kalou koi au, ka kauti kemuni tani mai na vanua ko Ijipita.
37Mo dou na vakabauta kina na noqu vunau kecega, kei na noqu lewa, mo dou cakava: sa ko Jiova koi au.
Who We AreWhat We EelieveWhat We Do
2025 by iamachristian.org,Inc All rights reserved.
