Na Vunau Ni Soro 18 - AI VOLA TABU（FIJ1864）

Sa kaya Jiova, me ra muria na nona vunau, 1-5. Me ra kakua ni veiwatini na veiwekani, 6-18. Me ra kakua ni kitaka na ka vakasisila, 19-30.

1A SA vosa vei Mosese ko Jiova, ka kaya,

2Mo vosa vei ira na luve i Isireli, ka kaya vei ira, Sa ko Jiova na nomuni Kalou koi au.

3Mo ni kakua ni kitaka nai valavala ni vanua ko Ijipita, dou a tiko kina: kei nai valavala ni vanua ko Kenani, kaʼu sa kauti kemuni kina, mo ni kakua ni kitaka; ia mo ni kakua ni muria na nodra vunau.

4Na noqu lewa ga, mo ni cakava; kei na noqui lesilesi, mo ni vakabauta, me lako kina: sa ko Jiova na nomuni Kalou koi au:

5o koya mo ni vakabauta kina na noqu vunau, kei na noqu lewa; ia kevaka sa cakava na tamata, ena bula kina: sa ko Jiova koi au.

6Me kakua e dua vei kemuni sa toro vua e dua sa veiwekani dina kaya, me veikitaki kaya: sa ko Jiova koi au.

7Ko koya erau sa veikilaki kei tamamu, io na tinamu, mo kakua ni veikilaki kaya: sa tinamu ko koya; mo kakua ni veikilaki kaya.

8A wati i tamamu, mo kakua ni veikilaki kaya: ka veikilaki kei tamamu ko koya.

9A ganemu na luve i tamamu, se na luve i tinamu, sa sucu e nona vale, se sucu tani, mo kakua ni veikilaki kei rau.

10A luvena alewa na luvemu tagane, se na luvena alewa na luvemu alewa, mo kakua ni veikilaki kei rau: ni rau a tubu vua e dua kemudrau a veikilaki kaya.

11A luvena alewa na wati i tamamu, sa sucu vei tamamu, (o koya na ganemu), mo kakua ni veikilaki kaya.

12A gane i tamamu, mo kakua ni veikilaki kaya: sa wekana dina na tamamu ko koya.

13A tuaka se na taci i tinamu, mo kakua ni veikilaki kaya: ni sa wekana dina na tinamu ko koya.

14Ko koya erau sa veikilaki kei na tuaka se na taci i tamamu, mo kakua ni veikilaki kaya: mo kakua ni toro vua na watina: sa tinamu lailai ko koya.

15A vugomu, mo kakua ni veikilaki kaya: sa watina na luvemu tagane ko koya; mo kakua ni veikilaki kaya.

16A wati ni tuakamu se na tacimu, mo kakua ni veikilaki kaya: ka veikilaki kei na tuakamu se na tacimu ko koya.

17A alewa e dua kei na luvena alewa, mo kakua ni veikilaki kei rau: mo kakua talega ni kauta na luvena alewa na luvena tagane, se na luvena alewa na luvena alewa, mo veikilaki kaya: eratou sa wekana dina: o qori na ca.

18Mo kakua ni taura e dua na alewa, me veikilaki kaya, me kuria na tuakana se na tacina, me vakararawataka, ni sa bula tiko ko koya.

19Mo kakua talega ni toro vua na alewa mo veikilaki kaya, ni sa tawa savasava e na vuku ni mate vakaalewa.

20Mo kakua talega ni koto kaya na watina na kai nomu, mo vakatawasavasavataki iko vua.

21Ia mo kakua ni laiva e dua vei ira na luvemu me lako-basika vei Moleki, ia mo kakua ni vakacacana na yacana na nomu Kalou: sa ko Jiova koi au.

22Mo kakua ni koto kaya na tagane me vaka kei na alewa: o qori na ka vakasisila.

23Mo kakua talega ni koto kaya e dua na manumanu, me vakadukadukalitaki iko kina: me kakua talega na alewa me tu e na mata ni manumanu me koto vua: o qori na ka ni veivakamaduataki.

24Dou kakua ni vakadukadukalitaki kemudou e na dua na ka vakaoqori: ni ra sa vakadukadukalitaki e na ka kecega o qori ko ira na veimatanitu, kaʼu sa vakaseva tani e na matamudou:

25a sa dukadukali na vanua: o koya kaʼu sa sauma kina na kenai valavala ca, ia na vanua sa luaraka tani na lewena.

26Ia mo dou vakabauta ga na noqu vunau, kei na noqu lewa, ka kakua ni kitaka e dua na ka vakasisila o qo; io na kai nomu se na kai tani sa tiko vulagi kei kemudou:

27(ni ra sa kitaka na ka vakasisila kecega o qo na lewe ni vanua ka ra liutaki kemudou, a sa vakadukadukalitaki na vanua):

28me kakua ni luaraki kemudou talega na vanua, ni dou sa vakadukadukalitaka, me vaka ka luaraka na matanitu ka liutaki kemudou.

29Ia ko ira kecega era kitaka e dua na ka vakasisila o qo, io na tamata era kitaka, era na muduki tani vei ira na kai nodra.

30O koya mo dou vakabauta kina na noqu vunau, mo dou kakua ni kitaka e dua nai valavala vakasisila o qo, sa kitaki eliu ni dou sa tawa lako kina, mo dou kakua ni vakadukadukalitaki kemudou kina: sa ko Jiova na nomudou Kalou koi au.