Na Vunau Ni Soro 17 - AI VOLA TABU（FIJ1864）

Sa tabu me ra cabora vakailoa nai soro na tamata e na yasana kecega, 1-9. Sa tabu me laukana na dra, 10-14, se na ka sa mate loa se dresulaka na manumanu, 15, 16.

1A SA vosa vei Mosese ko Jiova, ka kaya,

2Mo vosa vei Eroni kei iratou na luvena, kei ira kece na luve i Isireli, ka kaya vei ira, O qo na ka sa vunautaka ko Jiova, ka vaka,

3A tamata kecega vei ira na mataqali i Isireli sa vakamatea na karavau, se lami, se koti, e loma ni koro, se vakamatea e nai bili ni koro,

4a sa sega ni kauta ki na katuba ni vale gatu ni veitata, me cabora nai madrali vei Jiova, e na mata ni vale-tikotiko i Jiova; ena wiliki na tamata ko ya me vaka sa vakamatea e dua: sa vakadavea na dra ko koya; ia ena muduki tani na tamata ko ya vei ira na kai nona:

5ka me ra kauta na nodrai soro na luve i Isireli era cabora e na vanua etautuba, io me ra kauta vei Jiova, ki na katuba ni vale gatu ni veitata, vua na bete, ka vakacabora mei madrali sa cabo e na veivinakati vei Jiova.

6Ia me kureitaka na dra na bete e na dela ni cabocabo-ni-soro i Jiova, sa tu mai na katuba ni vale gatu ni veitata, ka vakacaudreva na uro me ka boi vinaka vei Jiova.

7Ia me ra kakua ni cabora tale na nodrai soro vei ira na kalou sa vaka na koti, era sa lako tani kina me muria. A ka o qo me na ka vakaroti tawa mudu vei ira e na nodra veitabatamata.

8Ia mo kaya vei ira, A tamata kecega vei ira na mataqali i Isireli, se na kai tani sa tiko vulagi kei ira, sa cabora nai soro kama se dua nai soro,

9ka tawa kauta ki na katuba ni vale gatu ni veitata, me cabora vei Jiova; na tamata ko ya ena muduki tani vei ira na kai nona.

10Ia na tamata kecega vei ira na mataqali i Isireli, se na kai tani sa tiko vulagi kei ira, sa kania e dua na dra; kaʼu na mata vakatani vua na tamata ko ya sa kana dra, ia kaʼu na muduki koya tani vei ira na kai nona.

11Ni sa bula ni yago na dra: ia kaʼu sa solia vei kemuni me sorovaka na yalomuni e na dela ni cabocabo-ni-soro: ia na dra ga sa sorovaka na bula.

12O koya kaʼu a kaya kina vei ira na luve i Isireli, Me kakua e dua na tamata vei kemuni me kana dra, me kakua talega ni kana dra e dua na kai tani sa tiko vulagi kei kemuni.

13Kei na tamata kecega vei ira na luve i Isireli, se vei ira na kai tani sa tiko vulagi kei ira, sa vakasasa manumanu e yavai va se manumanu vuka sa tara ni kani; me livia mada ga ko koya na kena dra, ka ubia e na soso.

14Ni sa bula ni yago kecega na kena dra e na yagona: o koya kaʼu a kaya kina vei ira na luve i Isireli, Mo ni kakua ni kania na dra ni manumanu e dua: ni sa bula ni yago kecega na kena dra na manumanu kecega: ko ira kecega sa kania ena muduki tani.

15Kei na tamata kecega sa kania na ka sa mate loa, se na ka sa kadresu, e dua vei kemuni sa kai nomudou, se sa kai tani, me sava nona veisulu ko koya, ka sili e na wai, ia ena tawa savasava ka yacova na yakavi: ena qai savasava.

16Ia kevaka sa tawa sava nona veisulu, se silima na yagona, ena qai cudruvi e na nona caka ca.