1A SA vosa vei Mosese ko Jiova, ni rau sa mate oti na luve i Eroni, ni rau a toro ki na mata i Jiova, ka mate kina;
2a sa qai kaya vei Mosese ko Jiova, Mo vosa vei Eroni na tuakamu, me kakua ni curu e na veisiga kecega ki na tikina tabu, ki loma ni lati e na mata ni cabocabo-ni-bulubulu, a ya sa tu e dela ni kato; me kakua ni mate kina ko koya: niʼu na rairai e na o e na dela ni cabocabo-ni-bulubulu.
3Me curu vakaoqo ko Eroni ki na tikina tabu: me kauta ko koya e dua na karavau sa gone mei soro ni valavala ca, kei na dua na sipi tagane mei soro kama:
4me suluma ko koya na kote malo e tabu, ka vakaicurucuru na lewena e nai curucuru malo ni saga, ka vauci e nai vau malo ni tolo, ka vakaisala e nai sala malo: o qori na veisulu tabu; me vakasilima mada ko koya na yagona e na wai, ka qai vakaisulu kina.
5Me na qai taura maivei ira nai vavakoso ni luve i Isireli e rua na koti mei soro ni valavala ca, ka dua na sipi tagane mei soro kama.
6Me qai vakacabora ko Eroni na karavau mei soro ni valavala ca, a ya e na vukuna ga, ka sorovaki koya, kei na nona lewe-ni-vale.
7Me qai kauta ko koya na koti e rua, ka vakatura e na mata i Jiova, ki na katuba ni vale gatu ni veitata.
8Me na qai veidigidigi ko Eroni e na vukudrau na koti; me baleta e dua me nona ko Jiova, ka baleta e dua me nona ko Asasela.
9Me qai kauta ko Eroni na koti ka baleta na madigi me nona ko Jiova, ka cabora mei soro ni valavala ca.
10Ia na koti ka baleta na madigi me nona ko Asasela, me na vakaturi bula e na mata i Jiova, me sorovaki ko koya, me qai vakatalai tani ki na lekutu me nona ko Asasela.
11Me na qai kauta ko Eroni na karavau sai soro ni valavala ca, ko ya e na vukuna, ka sorovaki koya, kei na nona lewe-ni-vale, ka vakamatea na karavau sai soro ni valavala ca e na vukuna:
12me qai kauta ko koya na miqa sa sinai e na qilaiso ni buka waqa, mai nai cabocabo-ni-soro sa tu e na mata i Jiova, ka vaqu-mia e na ligana na kau boi vinaka me vakamai sa vuravura me matailalai, ka kauta ki loma ni lati:
13me na qai viria na boi vinaka vakamai ki dela ni buka waqa e na mata i Jiova, me ruguta na o ni boi vinaka vakamai nai cabocabo-ni-bulubulu sa tu e na dela ni kato ni vunau, me kakua ni mate kina ko koya:
14me qai kauta na dra ni karavau ko koya, ka kureitaka e na nonai qaqalo ki dela ni cabocabo-ni-bulubulu kivaka ki cake; ka kureitaka vakavitu na dra e na mata ni cabocabo-ni-bulubulu e na nonai qaqalo.
15Me qai vakamatea ko koya na koti sai soro ni valavala ca, ko ya e na vukudra na tamata, ka kauta na kena dra ki loma ni lati, ka kitaka e na dra ko ya me vaka ka kitaka e na dra ni karavau, ka kureitaka ki dela ni cabocabo-ni-bulubulu, kei na mata ni cabocabo-ni-bulubulu:
16ka sorovaka na tikina tabu, e na vuku ni nodra tawa savasava na luve i Isireli, kei na nodra caka cala e na nodrai valavala ca kecega: ia me caka vakakina e na vuku ni vale gatu ni veitata, a ya sa tiko e na kedra maliwa, io e na maliwa ni nodra tawa savasava.
17Ia me kakua na tamata me tiko e na vale gatu ni veitata, ni sa curuma ko koya na tikina tabu me cabora nai soro, ka me curu tale mada mai, ni sa sorovaki koya oti, kei na nona lewe-ni-vale, kei nai vavakoso taucoko ni Isireli.
18Ia me curu yani ko koya ki nai cabocabo-ni-soro sa tu e na mata i Jiova, ka sorovaka; ka kauta e so na dra ni karavau, kei na dra ni koti, ka boroya kina na veitikina sa tu cake e nai cabocabo-ni-soro.
19Me qai kureitaka vakavitu na dra ki delana e na nonai qaqalo, ka me vakasavasavataka, ka vakatabuya mai na nodra tawa savasava na luve i Isireli.
20Ia ni sa oti na nona sorovaka na tikina tabu, kei na vale gatu ni veitata, kei nai cabocabo-ni-soro, me qai kauta mai na koti sa bula:
21me na qai tabaka na ulu ni koti bula ko Eroni e na ligana ruarua, ka vakatusa kina na nodra caka ca kecega na luve i Isireli, kei na nodra caka cala kecega e na ka kecega era sa valavala ca kina, ka tauca ki na ulu ni koti, ka vakatala tani ki na lekutu, ni sa tubera yani e dua na tamata sa lesi kina.
22Ja na koti ena colata na nodra caka ca kecega ki na vanua lala: me na qai sereka ko koya na koti e na lekutu.
23Me na qai curuma na vale gatu ni veitata ko Eroni, ka luvata tani na veisulu malo ka suluma ko koya ni ka curuma na tikina tabu, ka laiva tu maikea:
24me na qai vakasilima na yagona e na wai e na dua na yasana tabu, ka suluma na nona veisulu, ka lako tani mai, ka vakacabora na nonai soro kama, kei na nodrai soro kama na tamata, ka sorovaki koya, kei ira na tamata.
25Ia me vakama ko koya na uro ni soro ni valavala ca e na dela ni cabocabo-ni-soro.
26Ia ko koya ka vakatala na koti sa nona ko Asasela, me sava nona veisulu, ka vakasilima na yagona e na wai, a sa oti, me qai curu mai ki na koro.
27Ia na karavau sai soro ni valavala ca, kei na koti sai soro ni valavala ca, sa kauti na kedrau dra ki na tikina tabu mei soro, me kauti tani ki nai bili ni koro; ia me vakamai e na buka na kulidrau, kei na lewedrau, kei na dedrau.
28Ia ko koya sa vakamai rau, me sava nona veisulu, ka vakasilima na yagona e na wai, a sa oti, me qai lako mai ki na koro.
29Ia na ka o qo me na ka vakaroti tawa mudu vei kemudou: mo dou vakamalumalumutaki kemudou e na kenai kavitu ni vula, e na kenai katini ni siga ni vula, ia mo dou kakua ni cakava kina e dua na cakacaka, e dua na kai nomudou, se na kai tani sa tiko vulagi kei kemudou:
30ni dou na sorovaki e na siga ko ya, mo dou vakasavasavataki: dou na savasava kina mai na nomudoui valavala ca kecega e na mata i Jiova.
31Ena siga ni vakacecegu mo dou vakacegu kina, ia mo dou vakamalumalumutaki kemudou, e na vunau tawa mudu.
32Ia na bete sa na lumuta ko koya, ka bulia, me bete mei sosomi kei tamana, me na cabora nai soro, ka suluma na veisulu malo, io na veisulu tabu:
33ia me sorovaka ko koya na vale tabu, ka sorovaka na vale gatu ni veitata, kei nai cabocabo-ni-soro; me sorovaki ira talega na bete ko koya, kei ira kece na tamata ni Vavakoso.
34Ia na ka o qo me na ka vakaroti tawa mudu vei kemudou, ka me sorovaki ira na luve i Isireli, e na vuku ni nodrai valavala ca, ka vakadua o na veiyabaki.
A sa cakava ko koya me vaka ka vunautaka vei Mosese ko Jiova.
Who We AreWhat We EelieveWhat We Do
2025 by iamachristian.org,Inc All rights reserved.
