1A SA vosa ko Jiova vei Mosese kei Eroni, ka kaya,
2Drau vosa vei ira na luve i Isireli, ka kaya vei ira, Ni sa dua na tagane sa turi na yagona, sa ka tawa savasava na nona turi.
3Ia o qo na nona tawa savasava, ni sa turi ko koya: ni sa turi na yagona, se sa sogota na yagona na nona turi, o qori na nona tawa savasava.
4Ai mocemoce kecega sa koto kina ko koya sa turi, sa tawa savasava: kei na ka kecega sa tiko kina ko koya, sa tawa savasava.
5O ira kecega sa tara na nonai mocemoce, me sava nodra veisulu, ka sili e na wai, ia ena tawa savasava ka yacova na yakavi.
6Ia ko koya sa tiko e na dua na ka ka tiko kina ko koya sa turi, me sava nona veisulu, ka sili e na wai, ia ena tawa savasava ka yacova na yakavi.
7Kei koya sa tara na yago i koya sa turi, me sava nona veisulu, ka sili e na wai, ia ena tawa savasava ka yacova na yakavi.
8Ia kevaka sa kasivita na tamata savasava ko koya sa turi, me qai sava nona veisulu, ka sili e na wai, ia ena tawa savasava ka yacova na yakavi.
9Kei na vodovodo kecega sa vodo lako kina ko koya sa turi, ena tawa savasava.
10Kei ira kecega sa tara e dua na ka ka tiko kina ko koya, ena tawa savasava ka yacova na yakavi: kei koya sa colata na ka vakaoqori, me sava nona veisulu, ka sili e na wai, ia ena tawa savasava ka yacova na yakavi.
11Kei ira kecega sa tara ko koya sa turi, a sa sega ni vuya e na wai na ligana, me sava nona veisulu, ka sili e na wai, ia ena tawa savasava ka yacova na yakavi.
12Kei na bilo qele sa tara ko koya sa turi, me na vorolaki: kei na bilo kau kecega me na vui e na wai.
13Ia ni sa savasava mai ko koya ka turi mai na nona turi; me na qai wilika vua e vitu na siga me vakasavasavataki kina, ka sava nona veisulu, ka vakasilima na yagona e na wai vure, ena qai savasava.
14Ia e na kenai kawalu ni siga me kauta vua e rua na soqe, se rua na ruve sa gone, ka lako ki na mata i Jiova, ki na katuba ni vale gatu ni veitata, ka solia vua na bete:
15ena qai vakacabora na bete, e dua mei soro ni valavala ca, ka dua mei soro kama; ia me sorovaki koya kina na bete e na mata i Jiova, e na vuku ni nona turi.
16Ia kevaka sa bura loa na si ni tamata e dua, me qai vakasilima kece na yagona e na wai, ia ena tawa savasava ka yacova na yakavi.
17Kei nai sulu kecega, kei na kuli ni manumanu kecega, sa buraci si, me na sava e na wai, ia ena tawa savasava ka yacova na yakavi.
18A alewa talega erau sa koto kaya na tagane sa bura loa na nona si, me rau sili e na wai, ia me rau tawa savasava ka yacova na yakavi.
19Ia kevaka sa turi e dua na alewa, io sa dra na nona turi mai yagona, me na tawase tani ko koya ka bogi vitu: ia ko koya sa tarai koya ena tawa savasava ka yacova na yakavi.
20Ia na ka kecega sa koto kina ko koya ni sa tawase tani, ena tawa savasava: a ka kece talega sa tiko kina ena tawa savasava.
21Kei koya sa tara na nonai kotokoto, me sava nona veisulu, ka sili e na wai, ia ena tawa savasava ka yacova na yakavi.
22Kei koya sa tara e dua na ka ka tiko kina ko koya, me sava nona veisulu, ka sili e na wai, ia ena tawa savasava ka yacova na yakavi.
23Ia kevaka sa dua na ka e dela ni kotokoto, se e dela ni ka sa tiko kina ko koya, ni sa tara e dua na tamata, ena tawa savasava ka yacova na yakavi.
24Ia kevaka sa koto kaya e dua na tagane, a sa tauvi dra vei koya, ena tawa savasava ko koya ka bogi vitu; kei nai mocemoce taucoko sa koto kina na tagane ko ya, ena tawa savasava.
25Ia kevaka sa turi dra e dua na alewa ka bogi vuqa ni sa tawa yaco na bogi e dau-tawase tani kina, se kevaka sa turi tiko ni sa oti na bogi me tawase tani kina; a siga kecega sa turi kina ka tawa savasava, ena vaka na bogi sa tawase tani kina ko koya: ena tawa savasava ko koya.
26Ai kotokoto kecega sa koto kina ko koya e na veisiga kece sa turi kina, ena vaka e na vukuna na nonai kotokoto ni sa tawase tani: kei na ka kecega sa tiko kina ko koya ena tawa savasava, me vaka na nona tawa savasava ni sa tawase tani.
27Kei koya sa tara na ka o qori ena tawa savasava, ia me sava nona veisulu, ka sili e na wai, ia ena tawa savasava ka yacova na yakavi.
28Ia kevaka sa savasava, mai na nona turi, me na qai wilika vua e vitu na bogi, a sa oti, ena qai savasava.
29Ia e na kenai kawalu ni siga mo na kauta vua e rua na soqe, se rua na ruve sa gone, ka kauta vua na bete, ki na katuba ni vale gatu ni veitata.
30Ia me cabora e dua mei soro ni valavala ca na bete, kei na kenai kadua mei soro kama; ia me na sorovaki koya na bete e na mata i Jiova, e na vuku ni turi ka tawa savasava kina.
31Ia dou tawasei ira tani vakaoqo na luve i Isireli mai na ka era tawa savasava kina, me ra kakua ni mate e na nodra tawa savasava, ni ra sa vakadukadukali-taka na noqu vale-tikotiko sa tu e na kedra maliwa.
32O qo na vunau e na vuku i koya sa turi, kei koya sa bura loa na nona si, a sa tawa savasava kina;
33kei koya na alewa sa dradra; kei koya sa turi, se tagane se alewa; kei koya erau sa koto kei na alewa sa tawa savasava.
Who We AreWhat We EelieveWhat We Do
2025 by iamachristian.org,Inc All rights reserved.
