Na Vunau Ni Soro 14 - AI VOLA TABU（FIJ1864）

A vunau e na vuku ni vukavuka ni sa laʼki vakasavasavataki, 1-32. Ai vakatakilakila ni vukavuka e na vale, kei na kena vakasavasavataki, 33-57.

1A sa vosa vei Mosese ko Jiova, ka kaya,

2O qo na vunau e na vuku ni tamata sa vukavuka, e na siga sa vakasavasavataki kina ko koya: Me kauti mai ko koya ki na bete:

3ia me lako yani ki nai bili ni koro na bete; me na qai vakaraica na bete; ia, kevaka sa bula na vukavuka e na tamata ka vukavuka;

4me qai vakarota ko na bete me tauri mai e na vukuna sa laʼki vakasavasavataki e rua na manumanu vuka savasava sa bula, kei na kau sitari, kei na ka damudamu, kei na isopa:

5ia me vakarota ko na bete me vakamatei e dua vei rau na manumanu, e dela ni dua na bilo qele sa tiko kina na wai vure:

6na manumanu sa bula tiko me taura ko koya, kei na kau sitari, kei na ka damudamu, kei na isopa, ka tonia vata kei na manumanu sa bula ki na dra ni manumanu ka vakamatei e dela ni wai vure:

7me qai kureitaka vakavitu vua sa laʼki vakasavasavataki mai na vukavuka, ka tukuni koya ni sa savasava, me qai laiva na manumanu sa bula me lako e dela ni vanua.

8Ia ko koya sa laʼki vakasavasavataki, me sava nona veisulu, ka tasia na kena vutuvutua kecega, ka vakasilimi koya e na wai, me savasava kina: ka sa oti, me na qai lako ki loma ni koro, ka me kakua ni curuma na nona vale gatu ka oti mada na bogi vitu.

9Ia e na kenai kavitu ni siga, me tasia kece na drau ni uluna, kei na kumina, kei na vacuna, io na kena vutikana kecega me tasia ko koya: ka sava nona veisulu, ka vakasilima talega na yagona e na wai, ena qai savasava ko koya.

10Ia e na kenai kawalu ni siga me kauta e rua na lami tagane sa tawa ca, ka dua na lami alewa sa dua ga na kena yabaki sa tawa ca, ka tolu na omeri madrai droka mei madrali laukana, sa waki vata kei na waiwai, kei na waiwai e lailai sobu e na painiti e dua.

11Ia na bete sa vakasavasavataki koya, me na kauta ki na mata i Jiova na tamata sa laʼki vakasavasavataki kei na veika talega ko ya, ki na katuba ni vale gatu ni veitata:

12me qai taura e dua vei rau na lami tagane na bete, ka cabora mei soro ni caka cala, kei na waiwai sa lailai sobu e na painiti e dua, ka yalovaka mei soro e yalovaki e na mata i Jiova:

13me qai vakamatea na lami e na yasana sa dauvakamatei kina nai soro ni valavala ca kei nai soro kama, e na yasana tabu: ni sa nona na bete nai soro ni valavala ca, sa vaka ga kina nai soro ni caka sala: sa ka tabu sara.

14Ia me kauta e so na dra ni soro ni caka cala na bete, ka me boroya na bete na vuso ni daligana i matau sa laʼki vakasavasavataki, kei nai qaqalo levu ni ligana i matau, kei nai qaqalo levu ni yavana i matau:

15ia me kauta e so mai na waiwai sa lailai sobu e na painiti e dua na bete, ka livia ki na qeteqete ni nona liga i mawi:

16me qai tonia na bete na nonai dusidusi i matau e na waiwai sa tu e na ligana i mawi, ka kureitaka vakavitu na waiwai e so e na nonai dusidusi e na mata i Jiova:

17ia na kena vo ni waiwai sa tu e ligana, me boroya e so na bete ki na vuso ni daligana i matau sa laʼki vakasavasavataki, kei nai qaqalo levu ni ligana i matau, kei nai qaqalo levu ni yavana i matau, e dela ni dra ni soro ni caka cala:

18ia na kena vo ni waiwai e na ligana na bete, me livia ko koya ki na dela ni ulu i koya sa laʼki vakasavasavataki: ia me sorovaki koya na bete e na mata i Jiova.

19Ia me cabora na bete nai soro ni valavala ca, ka sorovaki koya sa laʼki vakasavasavataki mai na nona tawa savasava; a sa oti me vakamatea nai soro kama:

20me qai cabora nai soro kama kei nai madrali laukana e na dela ni cabocabo-ni-soro na bete: ka sorovaki koya na bete, ena qai savasava ko koya.

21Ia kevaka sa dravudravua ko koya, a sa sega ni rawata, me qai kauta ko koya e dua na lami mei soro ni caka cala me yalovaki, me sorovaki koya kina, ka dua na omeri madrai droka sa waki vata kei na waiwai, mei madrali laukana, kei na waiwai e lailai sobu e na painiti e dua;

22ka rua na soqe, se rua na ruve sa gone, me vaka na ka sa rawata; ia me dua mei soro ni valavala ca, ka dua mei soro kama.

23Ia me kauta ko koya vua na bete e na kenai kawalu ni siga me vakasavasavataki kina, ki na katuba ni vale gatu ni veitata, e na mata i Jiova.

24Ia me kauta na lami mei soro ni caka cala na bete, kei na waiwai sa lailai sobu e na painiti e dua, me qai yalovaka na bete e na mata i Jiova mei soro e yalovaki:

25ia me vakamatea ko koya na lami sai soro ni caka cala, ka me kauta e so na dra ni soro ni caka cala na bete, ka boroya kina na vuso ni daligana i matau sa laʼki vakasavasavataki, kei nai qaqalo levu ni ligana i matau, nei nai qaqalo levu ni yavana i matau:

26me qai livia e so na waiwai na bete ki na qeteqete ni nona liga i mawi:

27me qai kureitaka vakavitu na bete, e na nonai dusidusi i matau, e so na waiwai sa tu e ligana i mawi, e na mata i Jiova:

28me qai boroya na bete e so na waiwai sa tu e ligana, ki na vuso ni daligana i matau sa laʼki vakasavasavataki, kei nai qaqalo levu ni ligana i matau, kei nai qaqalo levu ni yavana i matau, e na tikina sa boro kina na dra ni soro ni caka cala:

29ia na kena vo ni waiwai sa tu e ligana na bete, me livia ko koya ki na dela ni uluna sa laʼki vakasavasavataki, me sorovaki koya e na mata i Jiova.

30Me qai cabora ko koya e dua vei rau na soqe, se vei rau na ruve sa gone, me vaka na ka sa rawata;

31io na ka ga e rawata, e dua mei soro ni valavala ca, ka dua mei soro kama, kei nai madrali laukana: ia me sorovaki koya sa laʼki vakasavasavataki na bete, e na mata i Jiova.

32O qo na vunau e na vukuna sa mate vukavuka, o koya sa sega ni rawata, ni sa vakasavasavataki.

33A sa vosa ko Jiova vei Mosese kei Eroni, ka kaya,

34Ni kemuni na yaco ki na vanua ko Kenani, ko ya kaʼu sa solia vei kemuni mo ni taukena, ia niʼu sa vakatubura na mate ni vukavuka e na dua na vale e na vanua kemuni sa taukena;

35me qai lako ko koya sa taukena na vale, ka tukutuku vua na bete, ka kaya, Sa rairai vei au ni sa tiko e na vale na ka e vaka e dua na mate:

36ia me na vakarota na bete me ra vakalalataka eliu na vale, me qai curuma na bete me vakaraica na mate, me kakua kina ni tawa savasava na ka kecega sa tiko e vale: a sa oti, me qai curu na bete me raica na vale:

37ia me na vakaraica na mate ko koya; ia, kevaka sa tiko e na lalaga ni vale na mate, ka sa lolovira e so na tikina, sa karakarawa se damudamu, a sa rairai ni sa lako ki loma ni lalaga;

38me na qai curu kitautuba na bete, ki na katuba ni vale, ka sogota na vale ka bogi vitu:

39me na qai lako tale mai na bete e na kenai kavitu ni siga, ka raica: ia, kevaka sa tetela na mate e na lalaga ni vale;

40me na qai vakarota na bete me ra kauta tani na veivatu sa tiko kina na mate, ka biuta ki taudaku ni koro, ki na yasana tawa savasava.

41Me vakarota talega ko koya me kari na vale eloma ka volita, ia me ra sova-biuta na qele era karia ki taudaku ni koro, ki na yasana tawa savasava:

42me ra qai kauta na veivatu tani, ka vakatataka mei sosomi ni veivatu ko ya; ka kauta nai botani tani, ka botana na vale.

43Ia kevaka sa lako tale mai na mate, ka tetela e na vale, ni sa kauti tani oti na veivatu, ka kari oti na vale, ka botani;

44me na qai lako mai na bete, ka raica; ia, kevaka sa tetela na mate e na vale, o qori na vukavuka kanakana e na vale: sa tawa savasava.

45Me na qai basuka sobu na vale ko ya, na kena veivatu, kei na kena kau, kei nai botani kecega ni vale; ka kauta tani ki taudaku ni koro, ki na yasana tawa savasava.

46Ia ko koya sa curuma na vale e na dua na siga sa sogo kina, ena tawa savasava ka yacova na yakavi:

47kei koya sa koto e na vale ko ya, me sava nona veisulu; kei koya sa kana e na vale ko ya, me sava nona veisulu.

48Ia kevaka sa curu kina na bete, ka raica; ia, kevaka sa sega ni tetela na mate e na vale ni sa botani oti na vale: me na qai tukuna na vale ko ya na bete ni sa savasava, ni sa vakabulai mai na mate.

49Ia me kauta ko koya, me vakasavasavataka kina na vale, e rua na manumanu vuka, kei na kau sitari, kei na ka damudamu, kei na isopa:

50me qai vakamatea ko koya e dua vei rau na manumanu, e dela ni dua na bilo qele sa tiko kina na wai vure:

51me na qai taura na kau sitari, kei na isopa, kei na ka damudamu, kei na manumanu vuka sa bula, ka tonia e na dra ni manumanu sa vakamatei, kei na wai vure, ka kureitaka vakavitu ki na vale:

52ka me vakasavasavataka na vale e na dra ni manumanu, kei na wai vure, kei na manumanu sa bula, kei na kau sitari, kei na isopa, kei na ka damudamu:

53ia me laiva na manumanu sa bula me lako e dela ni vanua mai taudaku ni koro, ia me sorovaka na vale: ena qai savasava.

54O qo na vunau e na vuku ni mate kecega ni vukavuka, kei na bu ca,

55kei na vukavuka e nai sulu, kei na vale,

56kei na vuvuce, se na vidikoso, se na tikina lumilumisa:

57me vakatakila ni sa tawa savasava, se ni sa savasava: o qo na vunau e na vuku ni vukavuka.