Na Vunau Ni Soro 13 - AI VOLA TABU（FIJ1864）

A vunau e na vukavuka.

1A SA vosa ko Jiova vei Mosese kei Eroni, ka kaya,

2Kevaka sa dua na tamata sa tu e na kuli ni yagona na vu-vuce, se na vidikoso, se na tikina lumi-lumisa, a sa tu e na kuli ni yagona me vaka na mate vukavuka; me na kauti ko koya vei Eroni na bete, se vua e dua vei ira na luvena sa bete:

3ia me na raica na bete na mate e na kuli ni yago; ia kevaka sa vulavula mai na vutuvutua e na tikina sa mate, a sa rairai ni sa basika na kuli ni yagona na mate, o qori na mate ni vukavuka; ia ni sa raici koya na bete, me qai tukuni koya ni sa tawa savasava.

4Ia kevaka sa vulavula mai na tikina lumilumi-sa e na kuli ni yagona, a sa rairai ni sa sega ni basika na kulina, a sa sega ni vulavula mai na vutuvutua; me na sogoti koya sa mate kiloma na bete, ka bogi vitu:

5me na qai raici koya na bete e na kenai kavitu ni siga: ia kevaka sa rairai vua na mate me vaka sa tu dei, io sa sega ni tetela na mate e na kulina; me qai sogoti koya kiloma na bete, ka vitu tale na bogi:

6me na qai raici koya tale na bete ni sa oti e vitu na bogi: ia kevaka sa loaloa mai na mate, a sa sega ni tetela na mate e na kulina, me na qai tukuni koya na bete ni sa savasava; sa bu ca walega: me sava ko koya na nona veisulu ga, a sa savasava.

7Ia kevaka sa tetela vakalevu na bu ca e na kulina, ni sa raici koya oti na bete me tukuni koya ni sa savasava, me na raici koya talega na bete:

8ia ni sa dikeva na bete, kevaka sa tetela na bu ca e na kulina, me na qai tukuni koya na bete ni sa tawa savasava: o qori ga na vukavuka.

9Ni sa tauvi vukavuka e dua na tamata, me na kauti ko koya vua na bete;

10ia me raici koya na bete: ia kevaka sa vulavula mai e na kulina na vuvuce, a sa vakavula-vulataka na vutuvutua, a sa tiko e na vuvuce na tiki ni lewena sa bula;

11o qori na vukavuka makawa e na kuli ni yagona; me na tukuni koya na bete ni sa tawa savasava, me na kakua ni sogoti koya kiloma: ni sa tawa savasava ko koya.

12Ia ke sa tetela sara na vukavuka e na kulina, a sa robota kece na kulina sa mate na vukavuka, mai na uluna ka cavaraka na yavana, e na tikina kecega sa rai kina na bete;

13me qai vakaraica na bete: ka, raica, ke sa robota kecega na lewena na vukavuka, me na tukuni koya ka mate ni sa savasava: sa vulavula kece mai: sa savasava ko koya.

14Ia e na siga ga sa rairai kina na lewena sa bula, ena tawa savasava kina.

15Ia me raica na lewena sa bula na bete, ka tukuni koya ni sa tawa savasava: sa tawa savasava na lewena sa bula: o qori na vukavuka.

16Ia kevaka sa mata tani tale na lewena sa bula, a sa vulavula mai, me na lako mai ko koya vua na bete;

17ia me vakaraici koya na bete: ia kevaka sa vulavula mai na mate; me qai tukuni koya sa mate na bete ni sa savasava mai: sa savasava ko koya.

18Ia na lewena, ka tu kina e dua na bo e na kulina, a sa mavo,

19a sa tubu, e na tikina ka tu kina na bo, na vuvuce vulavula, se na tikina lumilumisa, e vulavula, ka damudamu mai, a sa vakatakilai vua na bete;

20a sa raica na bete, ia kevaka sa rairai ni sa basika na kulina, a sa vulavula mai na vutuvutua; me qai tukuni koya na bete ni sa tawa savasava: o qori na mate ni vukavuka sa tubu e na bo.

21Ia kevaka sa vakaraica na bete, ia, kevaka sa sega kina na vutuvutua vulavula, ka tiko walega e na kulina, a sa loaloa mai; me qai sogoti koya kiloma na bete, ka bogi vitu:

22ia kevaka sa tetela vakalevu e na kulina, me qai tukuni koya na bete ni sa tawa savasava: o qori na mate ko ya.

23Ia kevaka sa tu dei na tikina lumilumisa, a sa sega ni tetela, sa qai bo katakata; ia me na tukuni koya na bete ni sa savasava.

24Ia kevaka sa tu e na kuli ni lewena na tikina sa tavu e na buka waqa, a sa tu e na lewena bula, e na tikina sa tavu e na buka waqa, na tikina lumilumisa, e vulavula, sa damudamu mai, se vulavula ga;

25me qai vakaraica na bete: ia kevaka sa vulavula mai na vutuvutua e na tikina lumilumisa, a sa rairai ni sa basika na kulina; o qori na vukavuka, sa tubu e na tikina sa tavu e na buka waqa: ia me na tukuni koya na bete ni sa tawa savasava: o qori na mate ni vukavuka.

26Ia kevaka sa raica na bete, ia, ke sa sega na vutuvutua vulavula e na tikina lumilumisa, a sa tu walega e na kulina, a sa loaloa mai; me qai sogoti koya kiloma na bete, ka bogi vitu:

27ia me na raici koya na bete e na kenai kavitu ni siga: kevaka sa tetela vakalevu e na kulina, me qai tukuni koya na bete ni sa tawa savasava: o qori na mate ni vukavuka.

28Ia kevaka sa tu dei na tikina lumilumisa, a sa sega ni tetela e na kulina, a sa loaloa mai; o qori na vuvuce ni tikina sa tavu, ia me tukuni koya na bete ni sa savasava: ni sa tikina sa tavu ka sa katakata mai o qori.

29Ia kevaka sa dua na tagane se dua na alewa, sa tauvi koya na mate e na uluna se kumina;

30me qai raica na mate na bete; ia, kevaka sa rairai ni sa basika na kulina; a sa tu kina na vutuvutua dromodromoa e matailalai; me qai tukuni koya na bete ni sa tawa savasava: o qori na bu ca mamaca, io na vukavuka e na uluna se kumina.

31Ia kevaka sa raica na mate ni bu ca na bete; ia, ke sa rairai me vaka sa tiko walega e na kulina, a sa sega kina na vutuvutua loaloa; me qai sogoti koya sa tauvi bu ca kiloma na bete, ka bogi vitu:

32ia e na kenai kavitu ni siga me raica na mate na bete: ia, kevaka sa sega ni tetela na bu ca, a sa sega kina na vutuvutua dromodromoa, a sa sega ni rairai na bu ca ni sa basika na kulina;

33me qai tasi ko koya, ia me kakua ga ni tasia na tikina e bu ca; me qai sogoti koya sa tauvi bu ca kiloma na bete, ka vitu tale na bogi:

34ia e na kenai kavitu ni siga me raica na bu ca na bete: ia, kevaka sa sega ni tetela e na kulina na bu ca, ka sega ni rairai ni sa basika na kulina; me qai tukuni koya na bete ni sa savasava: me sava ko koya na nona veisulu, a sa savasava.

35Ia kevaka sa tetela vakalevu na bu ca e na kulina, ni sa savasava oti;

36me qai vakaraici koya na bete: ia, kevaka sa tetela na bu ca e na kulina, me na kakua ni vakasaqara na vutuvutua dromodromoa na bete; sa tawa savasava ko koya.

37Ia kevaka sa rairai na bu ca me vaka sa tu dei, a sa tubu kina na vutuvutua loaloa; sa mavo na bu ca, sa savasava ko koya: ia me tukuni koya na bete ni sa savasava.

38Ia kevaka sa dua na tagane se dua na alewa, sa tu e na kuli ni yagona na veitikina lumilumisa, na veitikina lumilumisa e vulavula;

39me qai vakaraica na bete: ia kevaka sa vulavula ka loaloa mai na tikina lumilumisa e na kuli ni yagona; o qori na tikina veivolavolai sa tubu e na kulina; sa savasava ko koya.

40Ia na tamata sa lutu mai na uluna na drauna, sa ulu drika; sa savasava ga:

41kei koya sa lutu na drauna mai na tiki ni uluna sa voleka ki na matana, sa yadre drika; sa savasava ga.

42Ia kevaka sa tu e na ulu drika, se na yadre drika, e dua na drakusi sa vulavula ka damudamu mai; o qori na vukavuka sa tubu e na uluna sa drika, se na yadrena sa drika:

43ia me na vakaraici koya na bete: ia, kevaka sa vulavula ka damudamu mai na vuvuce ni drakusi e na uluna drika, se na yadrena drika, me vaka na rairai ni vukavuka e na kuli ni yago;

44sa qai tamata vukavuka ko koya, sa tawa savasava: me tukuni koya na bete ni sa tawa savasava sara; sa tiko e na uluna na nona mate.

45Ia ko koya sa vukavuka, sa tu kina na mate, me dresulaki na nona veisulu, ka tawa vakaisulu na uluna, ka ubi na tebenigusuna ecake, me na qai qolouvaka ko koya, Tawa savasava! tawa savasava!

46A veisiga kecega sa mate kina ko koya, ena tawa savasava: sa tawa savasava ko koya: me na tiko ga vakai koya; me tiko e nai bili ni koro na nona vale.

47Ai sulu talega sa tu kina na mate ni vukavuka, ai sulu vuti ni sipi sei sulu tani;

48se sa tiko e ketena se dakuna, e na vuti ni sipi sei sulu tani, e na kuli ni manumanu, se dua na ka sa caka maikina:

49ia kevaka sa karakarawa se damudamu mai na mate e nai sulu, se na kuli ni manumanu, e ketena se dakuna, se dua na ka sa caka e na kuli ni manumanu; o qori na mate ni vukavuka, ia me na vakaraitaki vua na bete:

50ia me vakaraica na mate na bete, ka sogoti koya sa mate kiloma, ka bogi vitu:

51me qai raica ko koya na mate e na kenai kavitu ni siga: kevaka sa tetela e nai sulu na mate, se ketena se dakuna, se na kuli ni manumanu, se dua na ka sa caka maikina; na mate ko ya na vukavuka kanakana: sa tawa savasava.

52Me na vakama ko koya nai sulu ko ya, ke tiko e ketena se dakuna, ke vuti ni sipi sei sulu tani, se dua na ka sa caka e na kuli ni manumanu, sa tiko kina na mate: ni sa vukavuka kanakana; me na vakamai e na buka.

53Ia kevaka sa raica na bete; ia, ke sa sega ni tetela na mate e nai sulu, e ketena se dakuna, se dua na ka sa caka e na kuli ni manumanu;

54me qai vakarota na bete me ra savata na ka sa mate, ena qai sogota kiloma, ka vitu tale na bogi:

55me qai raica na mate na bete, ni sa sava oti: ia, kevaka sa sega ni roka tani mai na mate, a sa sega ni tetela na mate; sa tawa savasava; mo vakama e na buka; sa tetela eloma, se dravudravua e ketena se dakuna.

56Ia kevaka sa raica na bete; ia, ke sa loaloa mai na mate ni sa sava oti; me qai sea tani mai nai sulu, se na kuli ni manumanu, ke tiko e ketena se dakuna:

57ia kevaka sa rairai tiko e nai sulu, e ketena se dakuna, se dua na ka sa caka e na kuli ni manumanu; o qori na ka sa tetela: mo vakama e na buka na ka sa tiko kina na mate.

58Ia nai sulu, na ketena se dakuna, se dua na ka sa caka e na kuli ni manumanu, ko sa sava oti, kevaka sa lako tani kina na mate, me qai sava tale, ena qai savasava.

59O qo na vunau ni mate ni vukavuka e nai sulu, a vuti ni sipi sei sulu tani, ke tiko e ketena se dakuna, se dua na ka sa caka e na kuli ni manumanu, me tukuni kina ni sa savasava, se me tukuni ni sa tawa savasava.