Na Vunau Ni Soro 12 - AI VOLA TABU（FIJ1864）

Sa tawa savasava na alewa ni sa vakasucu, 1-5. A ka me vakasavasavataki kina, 6-8.

1A SA vosa vei Mosese ko Jiova, ka kaya,

2Mo vosa vei ira na luve i Isireli, ka kaya, Kevaka sa kunekune na alewa, a sa vakasucuma na goneatagane, ena qai tawa savasava ka bogi vitu: me vaka na siga ni sa tawase ko koya e na vuku ni nona mate vakaalewa, ena tawa savasava kina.

3Ia e na kenai kawalu ni siga ena cilivi na lewe ni vusona na goneatagane.

4Me qai tiko lo na alewa ka bogi tolusagavulu ka tolu, e na vuku ni dra ena vakasavasavataki maikina; me kakua ni tara ko koya e dua na ka tabu, se lako ki na vale tabu, ka me oti mada na siga sa vakasavasavataki kina ko koya.

5Ia kevaka sa vakasucuma na gonealewa, ena qai tawa savasava ka rua na wiki, me vaka ni sa tawase: ia me qai tiko lo ka onosagavulu ka ono na bogi, e na vuku ni dra ena vakasavasavataki maikina.

6Ia ni sa Oti na nona siga sa vakasavasavataki kina, e na vuku ni goneatagane, se gonealewa, me qai kauta mai ko koya e dua na lami sa yabaki dua ga mei soro kama, ka dua na ruve sa gone se na soqe, mei soro ni valavala ca, ki na katuba ni vale gatu ni veitata, vua na bete:

7me qai vakacabora ko koya e na mata i Jiova, ka sorovaki koya; ena vakasavasavataki kina mai na nona turudra balavu. Sa vakaoqo na vunau e na vuku i koya sa vakasucuma na tagane se alewa.

8Ia kevaka sa sega ni nona rawa e dua na lami, me qai kauta na soqe e rua, se na ruve sa gone e rua; e dua mei soro kama, ka dua mei soro ni valavala ca; ena qai sorovaki koya kina na bete, ena qai savasava ko koya.