Na Vunau Ni Soro 11 - AI VOLA TABU（FIJ1864）

A manumanu sa tara me laukana, kei ira sa tabu, 1-8; kei na ika, 9-12; kei na manumanu vuka, 13-28; kei na ka sa dolo, 29-47.

1A SA vosa ko Jiova vei Mosese kei Eroni, ka kaya vei rau,

2Drau vosa vei ira na luve i Isireli, ka kaya, O qo na manumanu e yavai va dou na kania vei ira kecega na manumanu vakaoqo e vuravura.

3A ka kecega vei ira na manumanu sa wase na kena ququ, ka basika na wase, ka sa mama vakarua na kena, o qori ga dou kania.

4Ia ko ira o qo vei ira sa mama vakarua na kena, kei ira sa wase na kena ququ, dou kakua ni kania: a kameli, ni sa mama vakarua na kena, ka sa sega ni wase na kena ququ; sa tawa savasava vei kemuni.

5Kei na tamani, sa mama vakarua na kena, a sa sega ni wase na yavana; sa tawa savasava vei kemuni.

6Kei na eri, sa mama vakarua na kena, a sa sega ni wase basika na yavana; sa tawa savasava vei kemuni.

7Kei na vuaka, sa wase na kena ququ, ka basika na wase, ka sa sega ni mama vakarua na kena; sa tawa savasava vei kemuni.

8Mo ni kakua ni kania na lewedra, mo ni kakua talega ni tara na yagodra ni sa mate; era tawa savasava vei kemuni.

9O qo dou na kania e na ka kecega mai wai: a ka sa vaka tutuna ka vakavarina mai wai, e na waitui, kei na uciwai, mo ni kania.

10Ia na ka kecega sa sega ni vakatutuna ka vakavarina e na waitui, kei na uciwai, e na ka kecega sa yavavala e na wai, kei na ka bula kecega sa tiko e wai, era na ka vakasisila vei kemuni:

11ia mo ni vakasisilataka; mo ni kakua ni kania na lewedra, ia mo ni vakasisilataka na yagodra ni sa mate.

12A ka kecega sa sega ni vakatutuna ka vakavarina e na wai, na ka vakasisila o qori vei kemuni.

13Ia na ka o qo dou vakasisilataka vei ira na manumanu vuka; me kakua ni kani, sa ka vakasisila: na mataqali e tolu ni ikeli,

14kei na veimataqali ni vulituri;

15na mataqali kecega ni reveni;

16na ositereji; kei na mataqali kecega ni lulu kei na ma-nulevu;

17io na lulu tabu kei na lulu tani,

18kei na veimataqali ni suani,

19kei na veimataqali ni belo, kei na upupa; kei na beka.

20A manumanu vuka kecega sa dauqasi, sa yavai va, me ka vakasisila vei kemuni.

21Ia na ka o qo dou na kania maivei ira na ka kecega sa vuka ka qasi e na yavana e va, sa vakasagana ka yava balavu, me daulade kina e dela i vuravura;

22io o qo ga vei ira dou na kania; na veimataqali ni vodre.

23Ia na ka tani kecega sa vuka ka qasi, sa yavai va, me ka vakasisila vei kemuni.

24Ia na ka o qo kemuni na tawa savasava kina: o ira kecega sa tara na yagodra ni sa mate, ena tawa savasava ka yacova na yakavi.

25Ia ko ira kecega sa colata tani na yagodra ni sa mate, me na sava nona veisulu, ena tawa savasava talega ka yacova na yakavi.

26 A yago mate ni manumanu kecega sa wase na kena ququ, ka tawa basika na wase, se tawa mama vakarua na kena, sa tawa savasava vei kemuni: ko ira yadua sa tara ena tawa savasava.

27Ia na ka kecega sa lako e na qalokana, vei ira na yavusa manumanu kecega sa lako e na yavana e va, o qori sa tawa savasava vei kemuni: o ira kecega sa tara na yagodra ni sa mate, ena tawa savasava ka yacova na yakavi.

28Kei koya sa colata tani na yagodra ni sa mate, me sava nona veisulu, ia ena tawa savasava ka yacova na yakavi: era ka tawa savasava vei kemuni.

29A ka talega o qo ena tawa savasava vei kemuni e na ka sa dauqasi e dela i vuravura; na veimataqali ni kalavo kei na moko,

30io na veimataqali kece ni moko, kei na vokai.

31Sa tawa savasava na ka o qo vei kemuni, vei ira na ka kecega sa dauqasi: o ira kecega sa tara, ni sa mate, ena tawa savasava ka yacova na yakavi.

32Kei na ka kecega sa lutu kina e dua na ka o qo, ni sa mate, ena tawa savasava; se dua nai yaya kau, sei sulu, se kuli, se taga, se nai yaya tani, sa caka kina e dua na ka, me na viri ki na wai, ia ena tawa savasava ka yacova na yakavi; ia ena qai savasava.

33Kei na bilo qele kecega, sa lutu ki lomana e dua na ka o qo, a ka kece sa tu kina ena tawa savasava, ia dou na vorota.

34A ka kecega e laukana sa lutu kina na wai ko ya, ena tawa savasava: kei na wai kecega e gunuvi e na bilo kece vaka, ena tawa savasava.

35Kei na ka kecega sa lutu kina e dua na tiki ni yagodra ni sa mate, ena tawa savasava; na lovo, sei tutu ni kuro, me na basuki sobu: sa tawa savasava, ia me tawa savasava vei kemuni.

36Ia na mata ni wai ga, se nai keli-wai, sa levu kina na wai, ena savasava: ia na ka sa tara na yagodra ni sa mate, ena tawa savasava.

37Ia kevaka e dua na tiki m yagodra sa lutuka e dua na sore ni sila sa laʼki kaburaki, ena savasava:

38ia kevaka sa vakasuasuataki na sore ni sila, a sa lutu kina na yagodra ni sa mate, ena tawa savasava vei kemuni.

39Ia kevaka sa mate e dua na manumanu sa kakana vei kemuni, ko koya sa tara na yagona ena tawa savasava ka yacova na yakavi.

40Ia ko koya sa kania e dua na tiki ni yagona ni sa mate, me sava nona veisulu, ia ena tawa savasava ka yacova na yakavi: o koya talega sa colata na yagona ni sa mate, me sava nona veisulu, ena tawa savasava talega ka yacova na yakavi.

41Ia na ka dauqasi kecega sa qasi e na dela i vuravura sa ka vakasisila; me kakua ni kani.

42A ka kecega sa dolo e na ketena, kei na ka sa lako e na yavana e va, kei na ka kecega sa levu cake na yavana e na ka dauqasi kecega sa qasi e dela i vuravura, o qori mo ni kakua ni kania; ni sa ka vakasisila.

43Mo ni kakua ni cakavi kemuni mo ni ka vakasisilataki e na dua na ka sa dauqasi, sa qasi voli, mo ni kakua talega ni vakatawasavasavataki kemuni e na ka o qori, mo ni dukadukali kina.

44Ni sa ko Jiova na nomuni Kalou koi au: o koya mo ni vakasavasavataki kemuni, mo ni savasava; niʼu sa savasava koi au: ia ni kakua ni vakadukadukalitaki kemuni e na dua na yavusa ka sa dauqasi, sa qasi e dela i vuravura.

45Ni sa ko Jiova koi au, sa kauti kemuni cake mai na vanua ko Ijipita, meʼu nomuni Kalou: ia mo ni savasava kina, niʼu sa savasava koi au.

46Sa vakaoqo na vunau e na vuku ni manumanu e yavai va, kei na manumanu vuka, kei na ka bula kecega sa yavavala e na wai, kei na ka kecega sa qasi e dela i vuravura:

47me vakatakilakilataki na ka e tawa savasava, kei na ka e savasava, na manumanu talega e tara ni kani, kei na manumanu e tabu ni kani.