Na Vunau Ni Soro 10 - AI VOLA TABU（FIJ1864）

Erau sa vakamatei ko Natapi kei Apiu, 1-7. Sa vakarota ko Jiova me ra kakua ni gunuva na waini se na yaqona na bete ni ra sa curuma na vale-tikotiko, 8-11. A tiki ni soro sa dodonu me laukana, 12-15. Sa vunauci ira na bete ko Mosese, 16-20.

1IA ko Natapi kei Apiu na luve i Eroni, erau sa dui kauta na nona miqa ni ka boi vinaka, a rau sa viria kina na buka waqa, ka viria kina na ka boi vinaka, ka cabora e na mata i Jiova na buka waqa tani, a ya sa sega ni vakarota vei rau ko Jiova.

2A sa lako yani na buka waqa maivei Jiova, ka kani rau, a rau sa ciba e na mata i Jiova.

3A sa kaya vei Eroni ko Mosese, O qo ka vosataka ko Jiova, ni sa kaya, Au na vakatabui vei ira era sa toro voleka vei au, ia kaʼu na vakarokorokotaki e na matadra kecega na tamata. A sa galu ko Eroni.

4Ia ko Mosese sa kacivi Misaeli kei Elisapani, na luve i Usieli na tamana lailai ko Eroni, a sa kaya vei rau, Toro mai, drau kauta tani na wekamudrau mai na mata ni tikina tabu, ki nai bili ni koro.

5A rau sa toro voleka, ka kauti rau ni rau vakaisulu tu, ki nai bili ni koro; me vaka ka kaya ko Mosese.

6A sa kaya ko Mosese vei Eroni, vei rau talega na luvena, ko Eliasari kei Icamari, Dou kakua ni luvata nai sala mai na ulumudou, kakua talega ni dresulaka na nomudou veisulu; de dou mate, de yaco talega na cudru vei ira kecega na tamata; ia ko ira ga na wekamudou, na mataqali kecega i Isireli, me ra tagicaka na visa sa vaka-waqa ko Jiova:

7ia dou kakua ni curu yani e na katuba ni vale gatu ni veitata, de dou mate: ni dou sa lumuti e na waiwai i Jiova. A ratou sa cakacaka me vaka na vosa i Mosese.

8A sa vosa vei Eroni ko Jiova, ka kaya,

9Dou kakua ni gunuva na waini, se na yaqona kaukauwa, ni dou sa curuma na vale gatu ni veitata, o iko, se na luvemu kei iko, de dou mate: me ka e vunautaki me tawa mudu o qo e na nomudou veitabatamata;

10mo dou vakatakilakilataka na ka e tabu kei na ka e tawa tabu, kei na ka e tawa savasava kei na ka e savasava;

11ia mo dou vakavulici ira na luve i Isireli e na vunau kecega sa vosataka ko Jiova vei ira e na gusu i Mosese.

12A sa kaya ko Mosese vei Eroni, kei rau na luvena sa vo, ko Eliasari kei Icamari, Dou kauta nai madrali laukana sa vo e na ka sa cabo e na buka waqa vei Jiova, ka kania ni sa tawa vakalevenitaki, ni dou sa tu voleka ki nai cabocabo-ni-soro: ni sa ka tabu sara:

13ia dou kania e na dua na tikina tabu, ni sa nomui votavota, kei na nodraui votavota na luvemu, e na ka sa cabo e na buka waqa vei Jiova; niʼu sa vakaroti vakaoqo.

14Ia na serena sa yalovaki kei na tabana sa lavelaveti dou kania e na dua na tikina savasava; o iko kei rau na luvemu tagane, kei iratou na luvemu alewa, vata kei iko; ni sa nomui votavota, kei na nodrai votavota na luvemu, sa soli mai na nodrai madrali na luve i Isireli, sa cabo e na veivinakati.

15Na tabana sa lavelaveti kei na serena sa yalovaki me ra kauta vata mai, kei na uro sa cabo e na buka waqa, ka me yalovaka mei soro e yalovaki e na mata i Jiova; ia me na nomu, kei na nodra na luvemu vata kei iko, sa vunautaki me tawa mudu; me vaka sa vunautaka ko Jiova.

16A sa vakasaqara matua ko Mosese na koti sai soro ni valavala ca, ka, raica, sa vakamai; a sa cudru vei rau ko Eliasari kei Icamari, na luve i Eroni sa vo, ka kaya,

17A cava kemudrau sa sega ni kania kina nai soro ni valavala ca e na tikina tabu, ni sa ka tabu sara, a sa solia vei kemudou na Kalou me colata kina nai valavala ca ni vavakoso, me sorovaki ira e na mata i Jiova?

18raica, na kena dra sa sega ni kauti ki loma ni tikina tabu: sa dodonu mo dou kania e na tikina tabu, me vaka kaʼu a vakarota.

19A sa kaya vei Mosese ko Eroni, Raica, era sa cabora edaidai na nodrai soro ni valavala ca, kei na nodrai soro kama, e na mata i Jiova; a sa yacovi au na ka vakaoqo: ia kevaka kaʼu a kania nai soro ni valavala ca edaidai, sa vinaka beka e na mata i Jiova, se segai?

20Ia ni sa rogoca ko Mosese, sa donuya.