Na Vunau Ni Soro 9 - AI VOLA TABU（FIJ1864）

Sa vosa vei Eroni ko Mosese me cabora nai soro e so, 1-7. Sa cabora na nonai soro ko Eroni, 8-14; kei na nodrai soro na tamata, 15-21. Sa vosavakalougatataki ira na tamata ko Eroni kei Mosese, 22, 23. Sa vinakata ko Jiova, 24.

1Ia e na kenai kawalu ni siga, sa kacivi Eroni kei iratou na luvena, kei ira na nodra qase na Isireli, ko Mosese;

2a sa kaya vei Eroni, Mo kauta e dua na karavau sa gone mei soro ni valavala ca, ka dua na sipi tagane mei soro kama, sa tawa ca, ka cabora e na mata i Jiova.

3Ia mo vosa vei ira na luve i Isireli, ka kaya, Mo ni kauta e dua na koti mei soro ni valavala ca, ka dua na karavau sa gone, kei na lami, sa dua ga na nedrau yabaki ka tawa ca, mei soro kama;

4kei na karavau kei na sipi tagane mei madrali e na veivinakati, me cabori e na mata i Jiova; kei nai madrali laukana sa waki vata kei na waiwai: ni na rairai vei kemuni e na siga o qo ko Jiova.

5A ra sa kauta mai na ka ka vakarota ko Mosese ki na mata ni vale gatu ni veitata; a ra sa toro voleka nai vavakoso taucoko, ka tu e na mata i Jiova.

6A sa kaya ko Mosese, Sa vakaoqo na ka sa vakarota ko Jiova mo ni cakava: ena qai rairai vei kemudou nai ukuuku i Jiova.

7A sa kaya vei Eroni ko Mosese, Mo toro ki nai cabocabo-ni-soro, ka cabora na nomui soro ni valavala ca, kei na nomui soro kama, ka sorovaki iko kei ira na tamata: ka cabora na nodrai madrali na tamata, ka sorovaki ira; me vaka sa vakarota ko Jiova.

8A sa laʼki torova nai cabocabo-ni-soro ko Eroni, ka vakamatea na luve ni karavau mei soro ni valavala ca, e na vukuna ga.

9A sa kauta vua na dra ko iratou na luve i Eroni: a sa tonia ko koya na nonai qaqalo e na dra, ka boroya kina na veitikina sa tu cake e nai cabocabo-ni-soro, a sa sova yani na dra ki na vu ni cabocabo-ni-soro:

10ia na uro, kei na ivi, kei nai latikoso sa toka ecake ka toka era na yate, mai nai soro ni valavala ca, sa vakama ko koya e na dela ni cabocabo-ni-soro; me vaka ka vunautaka vei Mosese ko Jiova.

11Ia na lewena kei na kuli sa vakama ko koya e na buka e nai bili ni koro.

12A sa vakamatea ko koya nai soro kama; a ra sa solia vua na dra ko iratou na luve i Eroni, a sa volita ko koya nai cabocabo-ni-soro, ka kureitaka kina na dra.

13A ratou sa solia vua nai soro kama, e na kena tikina, kei na uluna: a sa vakama ko koya e na dela ni cabocabo-ni-soro.

14A sa derea ko koya na gacagaca kei na yavana, a sa vakama e dela ni soro kama e na dela ni cabocabo-ni-soro.

15A sa qai kauta ko koya na nodrai madrali na tamata, ka taura na koti, ko ya na nodrai soro ni valavala ca na tamata, ka vakamatea, a sa cabora mei soro ni valavala ca, me vaka na kena eliu.

16A sa kauta nai soro kama, ka cabora me vaka na kenai valavala.

17A sa kauta nai madrali laukana, a sa qumia e so e na ligana, a sa vakama e dela ni cabocabo-ni-soro, mei kuri ni soro kama ni mataka.

18A sa vakamatea na karavau kei na sipi tagane mei madrali me cabo e na veivinakati, ko ya sa nodra na tamata: ia na luve i Eroni eratou sa solia vua na dra, a sa volita ko koya nai cabocabo-ni-soro, ka kureitaka kina na dra.

19Ia na uro ni karavau kei na sipi tagane, na buina uro, kei na uro sa ubia na gacagaca, kei na ivi, kei nai latikoso ni yate:

20ia eratou sa virikotora na uro ki na serena, a sa vakama ko koya na uro e na dela ni cabocabo-ni-soro:

21ia na sere-drau kei na tabadrau i matau sa yalovaka ko Eroni, mei soro sa yalovaki e na mata i Jiova; me vaka ka vakarota ko Mosese.

22A sa dodoka yani na ligana ko Eroni vaka kivei ira na tamata, ka vosavakalougatataki ira, a sa lako sobu ni sa cabora oti nai soro ni valavala ca, kei nai soro kama, kei nai madrali e na veivinakati.

23A rau sa curuma na vale gatu ni veitata ko Mosese kei Eroni, ka curu tale kitautuba, ka vosavakalougatataki ira na tamata: a sa rairai vei ira na tamata kecega nai ukuuku i Jiova.

24A sa lako yani na buka waqa mai na mata i Jiova, a sa kania nai soro kama kei na uro e na dela ni cabocabo-ni-soro: ia ni ra sa raica na tamata kecega, era sa kaila ka bale vakatoboicu.