1A SA vosa vei Mosese ko Jiova, ka kaya,
2Mo kauti Eroni kei iratou kaya na luvena, kei na veisulu, kei na waiwai ni veilumuti, kei na karavau mei soro ni valavala ca, kei na sipi tagane e rua, kei na kato ni madrai sa tawa vakaleveni;
3ka vakasoqoni ira vata nai vavakoso taucoko ki na katuba ni vale gatu ni veitata.
4A sa cakacaka ko Mosese me vaka ka vunautaka vua ko Jiova; a sa soqoni vata nai vavakoso ki na katuba ni vale gatu ni veitata.
5A sa kaya ko Mosese vei ira nai vavakoso, Sa vakaoqo na ka sa vunautaka ko Jiova me caka.
6A sa kauti Eroni kei iratou na luvena ko Mosese, ka vakasilimi iratou e na wai.
7A sa vakaisulutaki koya e na kote, ka vauci koya e nai vau ni tolo, ka vakaisulutaki koya e nai sulu eruku, ka vakasuluma e nai sulu-me-vauci, ka vauci koya e nai vau talei ni sulu-me-vauci, ka vauca vua kina.
8A sa taubeni koya e nai taube: a sa vonota nai taube e na Urimi kei na Cumimi.
9A sa vakaisalataka na uluna e nai sala; ia, e tautuba ni sala, e na yadrena, sa vauca na koula raraba sa mamare, mei sala tabu; me vaka ka vunautaka vei Mosese ko Jiova.
10A sa taura na waiwai ni veilumuti ko Mosese, ka lumuta na vale-tikotiko, kei na ka kece sa tu kina, ka vakatabuya:
11a sa kureitaka vakavitu e so ki dela ni cabocabo-ni-soro, ka lumuta nai cabocabo-ni-soro kei na kenai yaya kecega, kei nai deredere kei na kenai tutu, ka me vakatabuya.
12A sa livia e so na waiwai ni veilumuti ki dela ni ulu i Eroni, ka lumuta, ka me vakatabuya.
13A sa kauti iratou na luve i Eroni ko Mosese, ka vakaisulutaki iratou e na kote, ka vauci iratou e nai vau ni tolo, ka vakaisalataki iratou e nai sala; me vaka ka vunautaka vei Mosese ko Jiova.
14A sa kauta ko koya na karavau mei soro ni valavala ca: ia ko Eroni kei na luvena, eratou sa tabaka e na ligadratou na ulu ni karavau mei soro ni valavala ca:
15a sa qai vakamatei; a sa kauta na dra ko Mosese, ka boroya voli e nai qaqalo ni ligana na veitikina sa tu cake e nai cabocabo-ni-soro, ka vakasavasavataka nai cabocabo-ni-soro, ka sova yani na dra ki na vu ni cabocabo-ni-soro, ka vakatabuya, me ia e delana nai bulubulu.
16A sa taura na uro kecega sa tu e na gacagaca, kei nai latikoso sa toka ecake ka toka era na yate, kei na ivi e rua, kei na kedrau uro, a sa vakama ko Mosese e na dela ni cabocabo-ni-soro.
17Ta na karavau, kei na kulina, kei na lewena, kei na dena, sa vakama e na buka e nai bili ni koro; me vaka ka vunautaka vei Mosese ko Jiova.
18Sa qai kauta ko koya na sipi tagane mei soro kama: ia ko Eroni kei na luvena, eratou sa tabaka na ulu ni sipi tagane e na ligadratou:
19a sa vakamatei; a sa volita nai cabocabo-ni-soro ko Mosese, ka kureitaka kina na dra.
20A sa tava na sipi tagane ko Mosese me vaka na kenai tavatava; a sa vakama ko Mosese na ulu, kei nai tavatava, kei na uro.
21A sa derea ko koya na gacagaca, kei na yavana, e na wai; a sa vakama na sipi tagane taucoko ko Mosese e na dela ni cabocabo-ni-soro: o qori nai soro kama me ka boi vinaka, sa cabori e na buka waqa vei Jiova; me vaka ka vunautaka vei Mosese ko Jiova.
22A sa kauta ko koya na sipi tagane kadua, io na sipi tagane ni veibuli: ia ko Eroni kei na luvena, eratou sa tabaka na ulu ni sipi tagane e na ligadratou.
23A sa vakamatea ko koya; a sa kauta e so na kena dra ko Mosese, ka boroya kina na vuso ni daliga i matau i Eroni, kei nai qaqalo levu ni ligana i matau, kei nai qaqalo levu ni yavana i matau.
24A sa kauti iratou na luve i Eroni, a sa boroya e na dra e so na vuso ni daligadratou i matau, kei nai qaqalo levu ni ligadratou i matau, kei nai qaqalo levu ni yavadratou i matau: a sa volita nai cabocabo-ni-soro ko Mosese, ka kureitaka kina na dra.
25A sa taura na uro, kei na buina uro, kei na uro kecega sa tu e na gacagaca, kei nai latikoso ni yate, kei na ivi e rua, kei na kedrau uro, kei na tabana i matau:
26ia mai na kato ni madrai sa tawa vakaleveni, sa tu e na mata i Jiova, sa kauta e dua nai buli madrai sa tawa vakalevenitaki, ka dua nai buli madrai sa caka e na waiwai, ka dua nai buli madrai e mamare, ka viritu e na dela ni uro, kei na dela ni tabana i matau:
27a sa solia kecega ki na liga i Eroni kei na ligadratou na luvena, a sa yalovaka mei soro e yalovaki e na mata i Jiova.
28A sa qai taura mai na ligadratou ko Mosese, ka vakama e na dela ni cabocabo-ni-soro e dela ni soro kama: o qori na ka ni veibuli me ka boi vinaka: o qori na ka sa cabo e na buka waqa vei Jiova.
29A sa kauta na serena ko Mosese, ka yalovaka mei soro sa yalovaki e na mata i Jiova: na tiki ni sipi tagane ni veibuli o qo nai votavota i Mosese; me vaka ka vunautaka vei Mosese ko Jiova.
30A sa kauta e so na waiwai ni veilumuti ko Mosese, ka so na dra sa tu e dela ni cabocabo-ni-soro, ka kureitaka vei Eroni, kei na nona veisulu, kei iratou kaya na luvena, kei na nodratou veisulu na luvena; a sa vakatabui Eroni, kei na nona veisulu, kei iratou kaya na luvena, kei na nodratou veisulu na luvena.
31A sa kaya vei Eroni kei iratou na luvena ko Mosese, Dou vakasaqa na lewena mai na katuba ni vale gatu ni veitata; ka kania talega maikea, kei na madrai sa tu e na kato ni ka ni veibuli, me vaka kaʼu a vakarota, ka kaya, Me kania ko Eroni kei iratou na luvena.
32Ia na cau ni lewena kei na madrai dou vakama e na buka.
33Ia dou kakua ni curu kitautuba mai na vale gatu ni veitata ka bogi vitu, me oti mada na nomudou siga ni veibuli: ni na bogi vitu ni sa ia tiko ko koya na nomudou veibuli.
34Me vaka sa cakava e na siga o qo, sa vakarota ko Jiova me caka, me sorovaki kemudou.
35Dou tiko kina ki na katuba ni vale gatu ni veitata e na siga kei na bogi ka bogi vitu, ka vakabauta na ka sa vakarota ko Jiova, mo dou kakua ni mate kina: niʼu sa vakaroti vakakina.
36A sa cakava ko Eroni kei iratou na luvena na ka kecega sa vakarota ko Jiova e na gusu i Mosese.
Who We AreWhat We EelieveWhat We Do
2025 by iamachristian.org,Inc All rights reserved.
