Na Vunau Ni Soro 5 - AI VOLA TABU（FIJ1864）

Ai soro ni tamata sa bese ni tukutuku ni sa vakaroti e na vosa vavakini; kei koya sa tara na ka tawa savasava; kei koya sa vosavavakini walega, 1-13. Ai soro tani e so ni tamata sa valavala ca ka vakacalakataka, 14-19.

1IA kevaka sa valavala ca e dua na tamata, ni sa rogoca nai vakaro e na vosa vavakini, a sa tukuna rawa, ni sa raica se sa kila loa; kevaka sa sega ni tukuna, ka na cudruvi e na nona caka ca;

2se dua na tamata sa tara na ka tawa savasava, se yago ni manumanu tawa lasa sa tawa savasava, se na yago ni manumanu manoa sa tawa savasava, se na yago ni ka sa dolo sa tawa savasava, a sa vuni ga vua, ka sa tawa savasava ko koya, ka cala;

3se sa tara na tawa savasava ni tamata, a ka tawa savasava kecega sa vakatawasavasavataki kina ko koya, a sa vuni ga vua; ni sa kila mai, ka sa cala;

4se dua na tamata sa vosavavakini, a sa cavuta na tebe-ni-gusuna me kitaka na ka ca, se me kitaka na ka vinaka, a ka kecega ena cavuta kina na vosa vavakini na tamata, a sa vuni vua; ni sa kila mai, ka sa cala e na dua na ka o qo;

5io ni sa cala e na dua na ka o qo, me qai vakatusa ko koya na ka sa valavala ca kina;

6ia me na kauta vei Jiova na nonai soro ni caka cala, e na vuku ni nonai valavala ca sa kitaka ko koya, e dua na alewa mai na qele ni manumanu, e dua na luve ni sipi se na koti, mei soro ni valavala ca; ia me na sorovaki koya na bete e na vuku ni nonai valavala ca.

7Ia kevaka sa sega ni nona rawa e dua na lami, me qai kauta mai vei Jiova e na vuku ni nona caka cala sa valavala ca kina, e rua na soqe, se rua na luve ni ruve; e dua mei soro ni valavala ca, ai kadua mei soro kama.

8Ia me kauta vua na bete, ia ko koya sai soro ni valavala ca me na vakacabora eliu ko koya, ka kinita na uluna mai na domona, ia me kakua ga ni drutia laivi:

9me qai kureitaka e so na dra ni soro ni valavala ca e na sarisari ni cabocabo-ni-soro; ia na kena vo ni dra, me na lobai yani ki na vu ni cabocabo-ni-soro: o qo nai soro ni valavala ca.

10Me qai cabora nai karua mei soro kama, me vaka na kenai valavala: ia me sorovaki koya na bete e na vuku ni nonai valavala ca sa kitaka oti, ena qai tawa cudruvi kina.

11Ia kevaka sa sega ni nona rawa e rua na soqe, se rua na luve ni ruve, me qai kauta mai ko koya sa valavala ca me nonai madrali e dua na omeri madrai droka mei soro ni valavala ca; me kakua ni livi kina na waiwai, me kakua talega ni viri kina na drega me vakamai: ni sai soro ni valavala ca o qori.

12Me qai kauta vua na bete, ia me taura ko na bete e so sa qumia rawa e ligana, me kenai vakananumi, ka vakama e nai cabocabo-ni-soro, me vaka na ka sa cabori e na buka waqa vei Jiova: o qo nai soro ni valavala ca.

13Ia me sorovaki koya na bete e na vuku ni nonai valavala ca sa valavala ca kina e na dua na ka o qo, ena qai sega ni cudruvi kina; ia na kena vo me nona na bete, me vaka nai madrali laukana.

14A sa vosa vei Mosese ko Jiova, ka kaya,

15Kevaka e dua na tamata sa valavala vakatani, ka vakacalakataka na ka e tabu vei Jiova; me qai kauta mei soro ni nona caka cala vei Jiova e dua na sipi tagane sa tawa ca, mai na qele ni sipi, ni ko sa cavuta tale na kenai sau ni caka cala me vaka na sikeli siliva, me vaka na sikeli ni tikina tabu;

16ia me sauma na ca sa kitaka e na ka e tabu, ia me vakaiku-ritaka e na dua na tikina ni sa wase lima, ka solia vua na bete: ia me sorovaki koya na bete e na sipi tagane ei soro ni caka cala, ena qai sega ni cudruvi kina.

17Ia kevaka e dua na tamata sa valavala ca, ka kitaka e dua na ka sa vakatabui e na vunau i Jiova, ke sa sega ni kila, ena cudruvi e na nona caka ca;

18me qai kauta e dua na sipi tagane sa tawa ca, mai na qele ni sipi, vua na bete, ni ko sa cavuta tale na kenai sau ni caka cala: ia me sorovaki koya na bete e na vuku ni nona vakacataka sa vakacalakataka kina, ka sega ni kila, ena qai sega ni cudruvi kina.

190 koya nai soro ni caka cala: sa cala vakaidina ko koya vei Jiova.