Na Vunau Ni Soro 6 - AI VOLA TABU（FIJ1864）

Ai soro ni cala e so, 1-7. Ai valavala ni soro kama, 8-13. Ai valavala ni madrali laukana, 14-18. Ai madrali kei Eroni kei na luvena e na siga era sa lumuti kina, 19-23. Ai valavala ni soro ni valavala ca, 24-30.

1A sa vosa vei Mosese ko Jiova, ka kaya,

2Kevaka e dua na tamata sa valavala ca, ka valavala vakatani vei Jiova, ka vosa lasu vua na kai nona e na ka sa soli vua me maroroya, se na ka erau veiyalayalati kina, se na ka sa kovei, se sa cakacaka vakaukauwa vua na kai nona;

3se sa kunea beka na ka sa yali, ka lasu kina, ka vosavavakini vakailasu: e na dua na ka sa kitaka na tamata, ka valavala ca kina:

4e na vuku ni sa valavala ca, a sa vakacalai kina, me na vakasuka na ka sa kovea, se na ka sa rawata vaqaseqase, se na ka sa soli vua me maroroya, se na ka sa yali sa kunea ko koya,

5se na ka kecega sa vosavavakini vakailasu kina; me na sauma kece, ka vakaikuritaka e na dua na tikina ni sa wase lima; me solia vua na kenai taukei, e na siga sa ia kina nai soro ni caka cala.

6Ia me kauta mai ko koya nai soro ni nona caka cala vei Jiova, a sipi tagane sa tawa ca, mai na qele ni sipi, vua na bete, ni ko sa cavuta tale na kenai sau ni caka cala;

7ena qai sorovaki koya na bete e na mata i Jiova: ena sega kina ni cudruvi e na dua na ka e na ka kecega sa cala kina.

8A sa vosa vei Mosese ko Jiova, ka kaya,

9Mo vakarota vei Eroni kei iratou na luvena, ka kaya, O qo na vunau ni soro kania: o koya nai soro kama, e na vuku ni sa vakamai tiko e nai cabocabo-ni-soro e na bogi ka sigavaka, ni na waqa tiko kina na buka waqa ni cabocabo-ni-soro.

10Ia me vakaisulu na bete e nonai sulu malo, me daramaka talega nai curucuru malo ni saga me vakaisulu kina na ya-gona, me qai laveta na dravusa sa vakama vata kei nai soro kama na buka waqa e nai cabocabo-ni-soro, ka sova voleka ki nai cabocabo-ni-soro.

11Ia me qai luvata na nonai sulu ko koya, ka suluma nai sulu tani, ka kauta yani na dravusa ki nai bili ni koro, ki na vanua savasava.

12Ia na buka sa waqa e nai cabocabo-ni-soro me waqa tikoga kina; me kakua ni boko: ia me vakama kina na buka na bete e na mataka e na veisiga kecega, ka tuva vakavinaka kina nai soro kama; me vakama talega kina ko koya na uro ni madrali e na veivinakati.

13Me waqa tikoga na buka waqa e na dela ni cabocabo-ni-soro; me kakua ni boko.

14Ia o qo na vunau ni madrali laukana: Me vakacabora ko ira na luve i Eroni e na mata i Jiova, e na mata ni cabocabo-ni-soro.

15Ia me kauta ko koya na madrai droka sa qumia rawa e ligana mai nai madrali laukana, kei na kena waiwai, kei na drega kecega me vakamai sa tu e nai madrali laukana, ka vakama e na dela ni cabocabo-ni-soro me ka boi vinaka vei Jiova, mei vakananumi.

16Ia na kena vo, me ra kania ko Eroni kei na luvena: me kani vata kei na madrai sa tawa vakaleveni e na yasana tabu; e na loma ni rara sa vakabai ni vale gatu ni veitata, me ra kania kina:

17me kakua ni vavi kei na leveni. Au sa solia me nodrai votavota mai na ka sa cabori vei au e na buka waqa; sa tabu sara, me vaka nai soro ni valavala ca, kei nai soro ni caka cala.

18Me kania ko ira kecega na tagane vei ira na luve i Eroni. O qo na vunau sa tawa mudu e na vuku ni ka sa cabori vei Jiova e na buka waqa, e na nomudou veitabatamata: ena tabu ga na ka kece sa tarai ira.

19A sa vosa vei Mosese ko Jiova, ka kaya,

20O qo nai madrali kei Eroni kei ira na luvena, me ra vakacabora vei Jiova e na siga sa lumuti kina; e dua na omeri madrai droka mei madrali laukana me caka tikoga, e dua na wase ni sa wase rua e na mataka, ka dua na wase e na yakavi.

21Me caka vata kei na waiwai e na bilo; ni sa vavi mo qai kauta mai kiloma: na tiki ni madrali laukana sa vavi mo cabora me ka boi vinaka vei Jiova.

22Ia ko koya vei ira na luvena sa lumuti me bete me kenai sosomi, me vakacabora: a vunau i Jiova, ka tawa mudu; me vakamai kecega.

23Ia nai madrali laukana kecega ni bete me vakamai kece: me kakua ni kani.

24A sa vosa vei Mosese ko Jiova, ka kaya,

25Mo vosa vei Eroni kei iratou na luvena, ka kaya, O qo na vunau ni soro ni valavala ca: E na yasana sa vakamatei kina nai soro kama, me vakamatei kina nai soro ni valavala ca e na mata i Jiova: o qo sa ka tabu sara:

26na bete sa cabora e na vuku ni valavala ca me kania: me kani e na yasana tabu, e na loma ni rara sa vakabai ni vale gatu ni veitata.

27Ena tabu ga na ka kecega sa tara na yagona: ia ni sa kureitaki e so na kena dra e na dua nai sulu, mo savata o qori sa kureitaki kina e na yasana tabu.

28Ia na kuro qele sa riri kina, me vorolaki: ia kevaka sa riri e na kuro parasa, me masi ka dere e na wai.

29Me ra kania ko ira kecega na tagane vei ira na bete: o qo sa tabu sara.

30Ia me kakua ni kani e dua nai soro ni valavala ca, sa kauti mai e so na kena dra ki na vale gatu ni veitata, me ia kina na veibuluti e na tikina tabu: me na vakamai e na buka waqa.