Na Vunau Ni Soro 4 - AI VOLA TABU（FIJ1864）

Ai soro ni valavala ca ni sa vakacalakataka ko na bete, 1-12, se nai vavakoso taucoko, 13-21, se na turaga, 22-26, se na kaisi, 27-35.

1A SA vosa vei Mosese ko Jiova, ka kaya,

2Mo vosa vei ira na luve i Isireli, ka kaya, Kevaka sa valavala ca na tamata e dua, ni sa vakacalakataka e dua na ka sa vakarota ko Jiova me kakua ni kitaki, a sa kitaka e dua na ka o qori:

3kevaka sa valavala ca na bete sa lumuti me vaka na nodrai valavala ca na tamata; me qai kauta mai vei Jiova, e na vuku ni nonai valavala ca sa kitaka ko koya, e dua na luve ni karavau sa tawa ca, mei soro ni valavala ca.

4Ia me na kauta na karavau ki na mata i Jiova, ki na katuba ni vale gatu ni veitata; ka tabaka na ulu ni karavau e na ligana, ka vakamatea na karavau e na mata i Jiova.

5Ia na bete sa lumuti me taura e so na dra ni karavau, ka kauta ki na vale gatu ni veitata:

6me qai tonia na nonai qaqalo na bete e na dra, ka kureitaka vakavitu e so na dra e na mata i Jiova, e na mata ni lati ni tikina tabu.

7Ia me boroya ko koya na bete na veitikina sa tu cake e nai cabocabo ni kau boi vinaka me vakamai, sa tu e na mata i Jiova, a ya e na vale gatu ni veitata; ka sova biuta na dra kecega ni karavau ki na vu ni cabocabo ni soro kama, a ya mai na katuba ni vale gatu ni veitata.

8Ia me kauta laivi na uro kecega ni karavau sai soro ni valavala ca; a uro sa ubia na gacagaca, kei na uro kecega sa tu e na gacagaca,

9kei na ivi e rua, kei na uro sa tu kina, a ya mai na sarisarina, kei nai latikoso sa toka ecake ka toka era na yate, kei na ivi, o koya me na kauta tani,

10me vaka sa kauti laivi mai na karavau sai madrali sa cabo e na veivinakati: ia me vakama o qo na bete e na dela ni cabocabo ni soro kama.

11Ia na kuli ni karavau, kei na lewena kecega, kei na uluna, kei na yavana, kei na kena gacagaca, kei na dena,

12io na karavau taucoko, me colati yani ki nai bili ni koro ki na vanua savasava, sa dausova biu kina na dravu, ka me vakamai e na buka waqa e dela ni buka e so; e na tikina sa dausova biu kina na dravu, me vakamai kina.

13Ia kevaka era vakacalaka nai vavakoso taucoko ni luve i Isireli, a sa lecava na kena cala nai vavakoso, a ra sa kitaka e so na ka sa vakarota ko Jiova me kakua ni kitaki, a ra sa cala kina;

14ni sa kilai nai valavala ca era sa cakava oti, me ra qai cabora e dua na luve ni karavau ko ira nai vavakoso mei soro ni valavala ca, ka kauta ki na mata ni vale gatu ni veitata.

15Ia ko ira sa qase vei ira nai vavakoso, me ra tabaka na ulu ni karavau e na ligadra e na mata i Jiova: me qai vakamatei na karavau e na mata i Jiova.

16Ia na bete sa lumuti me kauta e so na dra ni karavau ki na vale gatu ni veitata;

17me qai tonia na nonai qaqalo na bete e na dra, ka kureitaka vakavitu e na mata i Jiova, e na mata ni lati.

18Me boroya talega e na dra na veitikina sa tu cake e nai cabocabo-ni-soro sa tu e na mata i Jiova, a ya e na vale gatu ni veitata; ka sova biuta na dra kecega ki na vu ni cabocabo ni soro kama, a ya mai na katuba ni vale gatu ni veitata.

19Ia me kauta laivi na kena uro, ka vakama e na dela ni cabocabo-ni-soro.

20Ia me kitaka na karavau me vaka ka kitaka na karavau kaliu sai soro ni valavala ca, io me kitaki o qo vakakina: ia me sorovaki ira ko na bete, era na qai tawa cudruvi kina.

21Ia me colati yani na karavau ki nai bili ni koro, ka vakamai me vaka sa vakamai na karavau kaliu: o qo nai soro ni valavala ca e na vukudra nai vavakoso.

22Ni sa valavala ca e dua na turaga, ka sa vakacalakataka e dua na ka sa vakarota ko Jiova na nona Kalou me kakua ni kitaki, a sa cala kina;

23kevaka sa kila mai na nonai valavala ca sa cakava oti ko koya; me qai kauta mai ko koya na nonai madrali, a koti, a tagane sa tawa ca:

24ia me tabaka na ulu ni koti e na ligana, ka vakamatea e na tikina sa dauvakamatei kina nai soro kama e na mata i Jiova: o qo nai soro ni valavala ca.

25Ia me kauta ko na bete e so na dra ni soro ni valavala ca e na nonai qaqalo, ka boroya kina na veitikina sa tu cake e nai cabocabo ni soro kama; ka sova biuta na dra ki na vu ni cabocabo ni soro kama.

26Me qai vakama na kena uro kecega e na dela ni cabocabo-ni-soro, me vaka na uro ni madrali sa cabo e na veivinakati: me sorovaki koya kina na bete e na vuku ni nonai valavala ca, ena qai tawa cudruvi kina.

27Ia kevaka sa valavala ca e dua na tamata vei ira na kaisi ni sa vakacalakataka, ka kitaka e dua na ka sa vakarota ko Jiova me kakua ni kitaki, a sa cala kina;

28kevaka sa kila mai na nonai valavala ca sa cakava oti ko koya: me qai kauta mai e dua na koti me nonai madrali, na alewa sa tawa ca, e na vuku ni nonai valavala ca sa cakava ko koya.

29Ia me tabaka ko koya na ulu ni soro ni valavala ca e na ligana, ka vakamatea nai soro ni valavala ca e na tikina ni soro kama.

30Ia me kauta ko na bete e so na kena dra e na nonai qaqalo, ka boroya kina na veitikina sa tu cake e nai cabocabo ni soro kama; ka sova biuta na kena dra kecega ki na vu ni cabocabo-ni-soro.

31Ia me na kauta laivi na kena uro kecega, me vaka sa kauti laivi na uro mai nai madrali sa cabo e na veivinakati; ia me vakama ko koya na bete e na dela ni cabocabo-ni-soro me ka boi vinaka vei Jiova; ia ena sorovaki koya ko na bete, ena qai tawa cudruvi kina ko koya.

32Ia kevaka sa kauta mai na nonai madrali, e dua na lami mei soro ni valavala ca, me kauta mai na alewa sa tawa ca.

33Ia me tabaka ko koya na ulu ni soro ni valavala ca e na ligana, ka vakamatea e na tikina sa dauvakamatei kina nai soro kama, mei soro ni valavala ca.

34Ia me kauta e so na dra ni soro ni valavala ca na bete e na nonai qaqalo, ka boroya kina na veitikina sa tu cake e nai cabocabo ni soro kama, ka sova biuta na kena dra kecega ki na vu ni cabocabo-ni-soro:

35me qai kauta laivi na kena uro kecega, me vaka sa kauti laivi na uro ni lami mai nai madrali sa cabo e na veivinakati; me qai vakama e na dela ni cabocabo-ni-soro ko koya na bete, me vaka sa daukitaki e na ka sa cabori e na buka waqa vei Jiova: ia me sorovaki koya ko na bete e na vuku ni nonai valavala ca sa kitaka ko koya, ena qai tawa cudruvi kina ko koya.