Na Vunau Ni Soro 3 - AI VOLA TABU（FIJ1864）

Ai valavala ni soro e na veivinakati, ni sa dua na karavau, 1-5; ni sa dua na sipi, 6-11; ni sa dua na koti, 12-16. Sa tabu me laukana na uro kei na dra, 17.

1IA kevaka sa nonai madrali e dua nai madrali sa cabo e na veivinakati, kevaka sa cabora ko koya e dua na karavau, se tagane se alewa, me vakacabora e na mata i Jiova e dua sa tawa ca.

2Ia me tabaka na ulu ni nonai madrali e na ligana, ka vakamatea mai na katuba ni vale gatu ni veitata: ia ko ira na bete na luve i Eroni, me volita nai cabocabo-ni-soro, ka kureitaka kina na dra.

3Ia me vakacabora ko koya e so mai nai madrali sa cabo e na veivinakati, me ka sa cabori e na buka waqa vei Jiova; a uro sa ubia na gacagaca, kei na uro kecega sa tu e na gacagaca,

4kei na ivi e rua, kei na uro sa tu kina, a ya mai na sarisarina, kei nai latikoso sa toka ecake ka toka era na yate, kei na ivi, o koya me na kauta tani.

5Ia ko ira na luve i Eroni, me ra vakama e na dela ni cabocabo-ni-soro, e na dela ni soro kama a ya e dela ni buka sa toka e dela ni buka waqa: o qo na ka sa cabori e na buka waqa, e boi vinaka vei Jiova.

6Ta kevaka sa nonai madrali na sipi se na koti mei madrali e cabo e na veivinakati vei Jiova, se tagane se alewa, me cabora ko koya e dua sa tawa ca.

7Kevaka sa cabora na lami me nonai madrali, me cabora e na mata i Jiova.

8Ia me tabaka ko koya na ulu ni nonai madrali e na ligana, ka vakamatea e na mata ni vale gatu ni veitata: ia ko ira na luve i Eroni, me volita nai cabocabo-ni-soro, ka kureitaka kina na dra.

9Ia me vakacabora ko koya e so mai nai madrali sa cabo e na veivinakati, me ka sa cabori e na buka waqa vei Jiova; na kena uro kei na buina uro kece, me tava laivi ka voleka ki na sui tu; kei na uro sa ubia na gacagaca, kei na uro kecega sa tu e na gacagaca,

10kei na ivi e rua, kei na uro sa tu kina, a ya mai na sarisarina, kei nai latikoso sa toka ecake ka toka era na yate, kei na ivi, o koya me na kauta tani.

11Me qai vakama e na dela ni cabocabo-ni-soro na bete: o qo na kakana e na ka sa cabori e na buka waqa vei Jiova.

12Ia kevaka sa nonai madrali na koti, me cabora ko koya e na mata i Jiova.

13Ia me tabaka na uluna e na ligana, ka vakamatea e na mata ni vale gatu ni veitata: ia ko ira na luve i Eroni, me volita nai cabocabo-ni soro, ka kureitaka kina na dra.

14Ia me so na tikina me cabora ko koya me nonai madrali, me ka sa cabori e na buka waqa vei Jiova; a uro sa ubia na gacagaca, kei na uro kece sa tu e na gacagaca,

15kei na ivi e rua, kei na uro sa tu kina, a ya mai na sarisarina, kei nai latikoso sa toka ecake ka toka era na yate, kei na ivi, o koya me na kauta tani.

16Ia me qai vakama e na dela ni cabocabo-ni-soro na bete: o qo na kakana e na ka sa cabori e na buka waqa me ka boi vinaka: sa nei Jiova na uro kecega.

17A ka o qo sa lesi me ia tikoga e na nomudou veitabatamata e na nomudoui tikotiko kecega, dou na kakua ni kania e dua na uro se na dra.