Na Vunau Ni Soro 2 - AI VOLA TABU（FIJ1864）

Ai madrali madrai droka, 1-3; na madrai sa vavi, 4; na madrai sa tavu, 5-10; na oni kei na leveni, 11, 12; na masima, 13; kei nai sevu ni vanua, 14-16.

1IA ni sa cabora e dua na tamata nai madrali laukana vei Jiova, me madrai droka na nonai madrali; ia me livia kina ko koya na waiwai; ka viria kina na drega me vakamai:

2me qai kauta vei ira na bete na luve i Eroni: me taura maikina na madrai droka sa qumia rawa e ligana, ka so na kena waiwai, kei kecega na kena drega me vakamai; ia me vakama e so e dela ni cabocabo-ni-soro na bete mei vakananumi, na ka sa cabori e na buka waqa, e boi vinaka vei Jiova:

3ia na kena vo ni madrali laukana, ena kei Eroni kei ira na luvena: o qo na ka tabu sara e na ka sa cabori e na buka waqa vei Jiova.

4Ia kevaka ko sa cabora nai madrali laukana sa vavi e na lovo, me na buli madrai droka sa tawa vakalevenitaki, sa waki vata kei na waiwai, se me buli madrai mamare sa tawa vakalevenitaki, sa wali e na waiwai.

5Ia kevaka sa nomui madrali nai madrali laukana sa tavu e na kaukamea raraba, me madrai droka sa tawa vakalevenitaki, sa waki vata kei na waiwai:

6mo dovia, ka livia kina na waiwai: o koya nai madrali laukana.

7Ia kevaka sa nomui madrali nai madrali laukana mai nai tavuteki, me caka e na madrai droka vata kei na waiwai.

8Ia mo kauta nai madrali laukana sa caka e na ka o qo vei Jiova: ia ni sa soli vua na bete, me kauta ko koya ki nai cabocabo-ni-soro.

9Ia me na kauta tani nai vakananumi mai nai madrali laukana na bete, ka vakama e dela ni cabocabo-ni-soro: me ka sa cabori e na buka waqa, e boi vinaka vei Jiova.

10Ia na kena vo ni madrali laukana ena kei Eroni kei ira na luvena: o qo na ka tabu sara e na ka sa cabori e na buka waqa vei Jiova.

11Me kakua e dua nai madrali laukana dou sa cabora vei Jiova, me vakalevenitaki: ia mo dou kakua ni vakama e dua na leveni, se na oni, me ka cabori e na buka waqa vei Jiova:

12e nai madrali ni sevu ga dou na vakacabori rau vei Jiova: ia me kakua ni cabori e nai cabocabo-ni-soro me ka boi vinaka.

13Ia nai madrali laukana kecega ko na cabora mo vakamasimataka; ia mo kakua talega ni guilecava na masima ni veiyalayalati ni nomu Kalou e na nomui madrali laukana: vata kei na masima mo cabora na nomui madrali kecega.

14Ia kevaka ko sa cabora e so nai sevu mei madrali vei Jiova, mo cabora mei madrali laukana ni nomui sevu na sila vou sa vakarara e na buka waqa, sa lauvutu mai na sola vakalewe.

15Ia mo livia kina na waiwai, ka virino ki na delana na drega me vakamai: o qo nai madrali laukana.

16Ia me vakama na kenai vakananumi na bete, e so na kena sila sa lauvutu, kei na kena waiwai e so, kei kecega na kena drega me vakamai, me ka sa cabori e na buka waqa vei Jiova.