Na Vunau Ni Soro 1 - AI VOLA TABU（FIJ1864）

A WASE I. —Sa vakavulici Mosese ko Jiova e nai valavala ni soro kama, ni sa dua na karavau, 1-9; se sipi, 10-13; se manumanu vuka, 14-17.

1A SA kacivi Mosese ko Jiova, ka vosa vua mai na vale gatu ni veitata, ka kaya,

2Mo vosa vei ira na luve i Isireli, ka kaya vei ira, Kevaka e dua na tamata vei kemudou sa cabora nai madrali vei Jiova, dou cabora na manumanu me nomudoui madrali, na karavau, se sipi, se koti.

3Kevaka sa nonai madrali na karavau mei soro kama, me cabora ko koya na tagane sa tawa ca: me cabora mai na katuba ni vale gatu ni veitata, me vinakati kina, e na mata i Jiova.

4Ia me tabaka ko koya na ulu ni soro kama e na ligana; ena qai ka sa vinakati kina ko koya, me nonai bulubulu.

5Ia me vakamatei na karavau e na mata i Jiova: ia ko ira na bete, na luve i Eroni, me ra kauta na dra, ka volita nai cabocabo-ni-soro, a ya sa tu mai na katuba ni vale gatu ni veitata, ka kureitaka kina na dra.

6Ia me qai lau-voci nai soro kama, ka tavai me vaka na kenai tavatava.

7Ia ko ira na luve i Eroni na bete, me ra virikotora na buka waqa e na dela ni cabocabo-ni-soro, ka tuva vakavinaka na buka e dela ni buka waqa:

8ia ko ira na bete, na luve i Eroni, me ra tuva vakavinaka nai tavatava, na ulu, kei na uro, e na dela ni buka sa toka e dela ni buka waqa, a ya e na dela ni cabocabo-ni-soro:

9ia na kena gacagaca, kei na yavana, me vuya e na wai; me qai vakama kecega na bete e na dela ni cabocabo-ni-soro, mei soro kama, sa cabori e na buka waqa, na ka boi vinaka vei Jiova.

10Ta kevaka sa nonai madrali na sipi se na koti, mei soro kama, me na cabora ko koya na tagane sa tawa cala.

11Ia me vakamatei e na yasa ni cabocabo-ni-soro sa donuya na tokalau, e na mata i Jiova: ia ko ira na bete, na luve i Eroni, me ra volita nai cabocabo-ni-soro, ka kureitaka kina na kena dra.

12Me tavai talega me vaka na kenai tavatava, io na uluna kei na kena uro: me qai tuva vakavinaka na bete e na dela ni buka sa toka e dela ni buka waqa, a ya e na dela ni cabocabo-ni-soro.

13Ia na gacagaca kei na yavana, me vuya e na wai: me qai kauta kecega na bete, ka vakama e na dela ni cabocabo-ni-soro: o qo nai soro kama, sa cabori e na buka waqa, na ka boi vinaka vei Jiova.

14Ia kevaka sa nonai madrali na manumanu vuka mei soro kama vei Jiova, me qai cabora ko koya na soqe, se na luve ni ruve, me nonai madrali.

15Ia me kauta na bete ki nai cabocabo-ni-soro, ka ki ni ta laivi na uluna, ka vakama e na dela ni cabocabo-ni-soro; ia me loba yani na kena dra ki na yasa ni cabocabo-ni-soro:

16me qai tuna ka vutia, ka biuta ki na yasa ni cabocabo-ni-soro sa donuya na cake, e na tikina sa biu kina na dravu:

17ia me tava na tabana, ka me kakua ni tawasea laivi, me qai vakama ko na bete e na dela ni cabocabo-ni-soro, e na dela ni buka sa toka e dela ni buka waqa: o qo nai soro kama, sa cabori e na buka waqa, na ka boi vinaka vei Jiova.