Na Lako Yani 40 - AI VOLA TABU（FIJ1864）

Sa vaka duri na vale-tikotiko, 1-8, ka lumuti, 9-11. Sa vakatabui ko Eroni kei iratou ua luvena, 12-15. Sa cakava vakadodonu na ka kecega ko Mosese, 16-33. Sa qai ubia na Vale gatu na o, 34-38.

1A SA vosa vei Mosese ko Jiova, ka kaya,

2E nai matai ni siga e nai matai ni vula mo vakaduria na vale-tikotiko ni vale gatu ni veitata.

3Ia mo kauta kina na kato ni vunau, ka tabonaka na kato e nai lati.

4Mo kauta talega nai kanakana, ka vakatura vinaka na ka me viritu vakavinaka e delana; mo kauta talega nai tutu-ni-cina, ka vakacaudreva na kena veicina.

5Ia mo tokara nai cabocabo koula ni boi vinaka vakamai e na mata ni kato ni vunau, ka rubeca na ka-rube me katuba ni vale-tikotiko.

6Ia mo vakatura nai cabocabo ni soro kama e na mata ni katuba ni vale-tikotiko ni vale gatu ni veitata.

7Ia mo vakatura nai deredere e na maliwa ni vale gatu ni veitata kei nai cabocabo-ni-soro, ka sova kina na wai.

8Ia mo viria na bai ni rara me volita, ka rubeca na ka-rube me katuba ni rara sa vakabai.

9Ia mo qai kauta na waiwai mei lumu, ka lumuta na vale-tikotiko, kei na ka kecega sa tu kina, ka vakatabuya, kei na kenai yaya kecega: ia ena qai tabu tikoga.

10Mo lumuta talega nai cabocabo ni soro kama, kei na kenai yaya kecega, ka vakatabuya nai cabocabo-ni-soro: ia ena qai tabu sara nai cabocabo-ni-soro.

11Ia mo lumuta nai deredere kei na kenai tutu, ka vakatabuya.

12Ia mo kauti Eroni kei iratou na luvena ki na katuba ni vale gatu ni veitata, ka vakasilimi iratou e na wai.

13Mo qai vakaisulutaki Eroni e na veisulu tabu, ka lumuti koya, ka vakatabui koya; me bete ko koya vei au.

14Mo qai kauti iratou na luvena, ka vakaisulutaka e na kote:

15ia mo lumuti iratou, me vaka ko a lumuta na tamadratou, me ratou bete vei au: ia e na vuku ni nodra veilumuti, era na bete tawa mudu kina e na nodra veitabatamata.

16A sa cakava ko Mosese: me vaka na ka kecega sa vunautaka vua ko Jiova, sa cakacaka vakakina ko koya.

17A sa yaco e nai matai ni vula e na kenai karua ni yabaki, e nai matai ni siga ni vula, sa vakaduri cake na vale-tikotiko.

18A sa vakaduria na vale-tikotiko ko Mosese, ka vakataudeitaka e na kena veiqara, ka vakaduria na kena veipapa, ka daramaka na kena veikolokolo, ka vakaduria na kena veiduru.

19A sa tevuka yani na vale gatu me ubia na vale-tikotiko, ka tevuka tale nai ubi ni vale gatu e delana; me vaka ka vunautaka vei Mosese ko Jiova.

20A sa taura ko koya na vunau, ka viria ki na kato, ka vauca na veivua ki na kato, ka viria nai cabocabo-ni-bulubulu me tu e dela ni kato:

21a sa kauta na kato ki loma ni vale-tikotiko, ka rubeca nai lati me rube, ka tabonaka na kato ni vunau; me vaka ka vunautaka vei Mosese ko Jiova.

22A sa kauta ko koya nai kanakana ki na vale gatu ni veitata, ki na yasa ni vale-tikotiko sa donuya na tokalau, e taudaku ni lati.

23A sa vakatura vinaka na madrai e delana e na mata i Jiova; me vaka ka vunautaka vei Mosese ko Jiova.

24A sa kauta ko koya nai tutu-ni-cina ki loma ni vale gatu ni veitata, me donuya nai kanakana, ki na yasa ni vale-tikotiko sa donuya na ceva.

25A sa vakacaudreva na veicina e na mata i Jiova; me vaka ka vunautaka vei Mosese ko Jiova.

26A sa kauta ko koya nai cabocabo-ni-soro koula ki loma ni vale gatu ni veitata e na mata ni lati:

27a sa vakama e delana na kau boi vinaka; me vaka ka vunautaka vei Mosese ko Jiova.

28A sa rubeca ko koya na ka-rube me katuba ni vale-tikotiko.

29A sa vakatura nai cabocabo ni soro kama me voleka ki na katuba ni vale-tikotiko ni vale gatu ni veitata, ka cabora e delana nai soro kama kei nai madrali laukana; me vaka ka vunautaka vei Mosese ko Jiova.

30A sa viria ko koya nai deredere me tu e na maliwa ni vale gatu ni veitata kei nai cabocabo-ni-soro, ka sova kina na wai, me deredere kina.

31Ia ko Mosese, kei Eroni, kei iratou na luvena, eratou a derea kina na ligadratou kei na yavadratou:

32ni ratou sa curuma na vale gatu ni veitata, se torova nai cabocabo-ni-soro, eratou sa qai deredere; me vaka ka vunautaka vei Mosese ko Jiova.

33A sa vakaduria ko koya na bai ni rara me volita na vale-tikotiko kei nai cabocabo-ni-soro, ka rubeca na ka-rube me katuba ni rara sa vakabai.

A sa vakaotia na cakacaka ko Mosese.

34Sa qai ubia na vale gatu ni veitata na o, a sa vakasinaita na vale-tikotiko na serau i Jiova.

35A sa sega ni curuma rawa ko Mosese na vale gatu ni veitata, e na vuku ni sa tiko e delana na o, a sa vakasinaita na vale-tikotiko na serau i Jiova.

36Ia ni sa kauti cake na o mai dela ni vale-tikotiko, era sa qai cavu me lako yani ko ira na luve i Isireli:

37ia kevaka sa sega ni kauti cake na o, era sa sega ni lako yani, ka yacova na siga sa kau cake kina.

38Ni sa tiko na o i Jiova e na dela ni vale-tikotiko e na siga, ka sa tiko kina na buka waqa e na bogi, e na matadra kecega na mataqali i Isireli, e na nodrai lakolako kecega.