1Ia na ka karakarawa, ka damudamu, ka rusivakula, era sa cakava kina na veisulu me cakacaka kina, me qaravi kina e na tikina tabu, era cakava talega na veisulu tabu vei Eroni; me vaka sa vunautaka vei Mosese ko Jiova.
2A sa cakava ko koya nai sulu-me-vauci e na koula, e na ka karakarawa, ka damudamu, ka rusivakula, kei na malo matailalai ni wa muloci.
3A ra sa tukilaka na koula me raraba, ka tavatava me wa, me tali kaya na ka karakarawa, ka damudamu, ka rusivakula, kei na malo matailalai, e na cakacaka ni vuku.
4Era sa cakava na kena wa bale, me vauci vata kina: sa vauci vata e na tutuna ruarua.
5Ia nai vau talei ni sulu-me-vauci, sa tiko kina, sa caka vakakina, me vaka na kenai valavala; e na koula, e na ka karakarawa, ka damudamu, ka rusivakula, kei na malo matailalai ni wa muloci; me vaka sa vunautaka vei Mosese ko Jiova.
6A ra sa cakava na vatu onikisa me vono e nai vakadei koula, sa ceu, me vaka sa ceu na mama, e na yacadratou na luve i Isireli.
7A sa tokara ko koya ki na wa bale ni sulu-me-vauci, me vatu me ra na nanumi kina na luve i Isireli; me vaka sa vunautaka vei Mosese ko Jiova.
8A sa cakava ko koya nai taube e na cakacaka ni vuku, me vaka nai valavala ni sulu-me-vauci; e na koula, e na ka karakarawa, ka damudamu, ka rusivakula, kei na malo matailalai ni wa muloci.
9Sa takiveilevu e na yasana e va; era sa cakava nai taube me lobi rua: sa dua na caga na kena balavu, ka dua na caga na kena raraba, ni sa lobi rua.
10A ra sa vono kina na vatu ka va na kena yatu: sa yatu e na saritiusi, na topasa, kei na kapuquli, nai matai ni yatu:
11ia nai karua ni yatu, na emeralita, na safairi, kei na taiamodi:
12ia nai katolu ni yatu, na laikure, na aketi, kei na amecisita:
13ia nai kava ni yatu, na perili, na onikisa, kei na jasipa: sa vono e nai vakadei koula e na qara era sa vono kina.
14Ia na vatu sa vaka na yacadratou na luve i Isireli, e tinikarua, me vaka na yacadratou, sa vaka na ceuceu ni mama ko iratou, yadua e na yacana, me vaka na yavusa e tinikarua.
15A ra sa cakava ki nai taube e so na sinucodo sa tobe me vaka na wa, e na koula dina.
16A ra sa cakava e rua na qara koula, kei na mama koula e rua; a ra sa vauca na mama e rua ki na tutuna e rua ni taube.
17Era sa qai daramaka na ka koula e rua sa tobe, ki na mama e rua sa vauci ki na tutuna e rua ni taube.
18Ia na muana tani e rua ni ka e rua sa tobe era sa bukia ki na qara e rua, ka vauca ki na mata ni wa bale ni sulu-me-vauci.
19A ra sa cakava e rua na mama koula, ka bukia ki na muana e rua ni taube, e na tutuna, a ya e na yasana kiloma, ni sulu-me-vauci.
20A ra sa cakava e rua tale na mama koula, ka vauca ki na kenai wa bale e rua ni sulu-me-vauci e Tukuna, vaka ki na matana, me donuya na tikina kadua sa vauci kina, me toka ecake, ka toka era nai vau talei ni sulu-me-vauci.
21A ra sa vauca na mama ni taube ki na mama ni sulu-me-vauci e na wa karakarawa, me toka ecake, ka toka era nai vau talei ni sulu-me-vauci, ka me kakua ni tasere mai nai sulu-me-vauci nai taube; me vaka ka vunautaka vei Mosese ko Jiova.
22A sa cakava ko koya nai sulu e ruku ni sulu-me-vauci, sa talitali, e na ka karakarawa walega.
23Ia sa dua na qara, e na levukana nai sulu eruku, me vaka na qara ni sulu ni valu; sa dua nai vau me volita na kena qara, me kakua ni kadresu.
24A ra sa cakava e na boto ni sulu eruku e so nai ukuuku e vaka na vua ni kau, e na ka karakarawa, ka damudamu, ka rusivakula, kei na wa muloci.
25A ra sa cakava e so na lali koula dina, ka vauca na lali e na maliwa ni ukuuku e vaka na vua ni kau e na boto ni sulu eruku, me volita e na maliwa ni ukuuku e vaka na vua ni kau;
26e dua na lali ka dua nai ukuuku e vaka na vua ni kau, e dua na lali, ka dua nai ukuuku e vaka na vua ni kau, me volita na boto ni sulu eruku, me ia kina na cakacaka; me vaka ka vunautaka vei Mosese ko Jiova.
27A ra sa cakava na kote e na malo matailalai sa tali, me nei Eroni kei iratou na luvena;
28kei nai sala e na malo matailalai, kei nai sala vinaka e na malo matailalai, kei nai curucuru ni saga e na malo matailalai ni wa muloci,
29kei nai vau ni tolo e na malo matailalai ni wa muloci, kei na ka karakarawa, ka damudamu, ka rusivakula, sa caka e nai cula; me vaka ka vunautaka vei Mosese ko Jiova.
30A ra sa cakava ki nai sala tabu na tiki ni koula dina me mamare, a ra sa vola na kena volavola me vaka na ceuceu ni mama, SA TABU ME NEI JIOVA.
31A ra sa bukia kina e dua na wa karakarawa, me vauca kina kicake ki nai sala; me vaka ka vunautaka vei Mosese ko Jiova.
32A sa vakaoti na cakacaka kecega ni vale-tikotiko ni vale gatu ni veitata: a ra sa cakava na luve i Isireli me vaka ka vunautaka vei Mosese ko Jiova, io era sa cakacaka vakakina.
33A ra sa kauta mai vei Mosese na vale-tikotiko, nai ubi, kei na kenai yaya kecega, na kena veiqila, na kena veipapa, na kena veikolokolo, kei na kena veiduru, kei na kena veiqara,
34kei nai ubi kuli ni sipi tagane sa somoti damudamu, kei nai ubi kuli tani, kei nai lati me rube,
35na kato ni vunau, kei na kena veivua, kei nai cabocabo-ni-bulubulu,
36kei nai kanakana, kei na kenai yaya kecega, kei na madrai dauraici,
37kei nai tutu-ni-cina makama-kalivata, kei na kena veicina, na veicina me vakarautaki tiko, kei na kenai yaya kecega, kei na waiwai ni cina,
38kei nai cabocabo-ni-soro koula, kei na waiwai mei lumu, kei na kau boi vinaka vakamai, kei na ka-rube me katuba ni Vale gatu,
39kei nai cabocabo-ni-soro parasa, kei na kena miqa parasa, na kena veivua, kei na kenai yaya kecega, nai deredere, kei na kenai tutu,
40na veigatu ni rara sa vakabai, na kena veiduru, kei na kena veiqara, kei na ka-rube me katuba ni rara sa vakabai, na kena dali, kei na kenai vakadei, kei nai yaya kecega me kitaka kina na cakacaka ni vale-tikotiko ni vale gatu ni veitata,
41na veisulu ni cakacaka me cakacaka kina e na tikina tabu, kei na veisulu tabu i Eroni na bete, kei na nodratou veisulu na luvena, me ia kina na cakacaka vakabete.
42Me vaka na ka kecega ka vunautaka vei Mosese ko Jiova, era sa cakava vakakina na cakacaka kecega ko ira na luve i Isireli.
43A sa dikeva na cakacaka kecega ko Mosese, ka, raica, era sa cakava oti me vaka ka vunautaka ko Jiova, io era sa cakava vakakina: a sa vosavakalougatataki ira ko Mosese.
Who We AreWhat We EelieveWhat We Do
2025 by iamachristian.org,Inc All rights reserved.
