1A sa cakava ko koya nai cabocabo ni soro kama e na kau sitimi: e tini na caga na kena balavu, ka tini na caga na kena raraba; sa takiveilevu na veiyasana e va; ka ono na caga na kena cecere.
2A sa cakava na veitikina sa tu cake e na tutuna e va; sa mai na nona kau na veitikina sa tu cake: a sa botana e na parasa.
3A sa cakava nai yaya kecega ni cabocabo-ni-soro, na veisedre, kei na veibilo me kau tani kina na dravu, kei na veibilo me kau kina na dra me kureitaki, kei na veiqila ni lewe ni manumanu, kei na veidari ni de-ni-buka: sa cakava na kenai yaya kecega e na parasa.
4A sa cakava ki nai cabocabo-ni-soro e dua na miqa parasa, me vaka na lawa, me tu e ruku ni belena, me yaco ki na kena veimama.
5A sa cakava e va na mama ni sa vakawaicalataka, ki na tutuna e va ni lawa parasa, mei daradara ni veivua.
6A sa cakava na veivua e na kau sitimi, ka botana e na parasa.
7A sa daramaka ko koya na veivua ki na veimama e na yasa ni cabocabo-ni-soro, me colati kina; sa cakava ko koya nai cabocabo-ni-soro e na veipapa me vakalomalomana.
8A sa cakava ko koya nai deredere parasa, a kenai tutu talega e na parasa, io e na nodrai iloilo parasa na alewa era soqoni vata e na katuba ni vale gatu ni veitata.
9A sa cakava ko koya na rara sa vakabai: ki na yasana sa donuya na ceva sa so na gatu me bai ni rara, e malo matailalai ni wa muloci, e rua na drau na caga:
10a kedra duru e ruasagavulu, kei na kedra qara parasa e ruasagavulu; ai ruberube e na veiduru, kei na kedra veivau, sa siliva.
11Ia na gatu e na yasana ki na tokalau e rua na drau na caga, na kedra duru sa ruasagavulu, kei na kedra qara parasa e ruasagavulu; ai ruberube e na veiduru, kei na kedra veivau, sa siliva.
12Ia ki na yasana sa donuya na ra sa so na gatu e dua na drau na caga, na kedra duru sa tini, ka tini na kedra qara; ai ruberube e na duru kei na kedrai vau sa siliva.
13Ia na gatu ki na yasana vaka ki cake sa dua na drau na caga.
14A gatu ki na dua na yasa ni katuba sa tolusagavulu na caga; na kedra duru sa tolu, kei na kedratou qara sa tolu.
15Ia na gatu ki na yasana kadua ni katuba ni rara sa vakabai, vaka ka vaka, sa tolusagavulu na caga; e tolu na kedra duru, ka tolu na kedratou qara.
16A gatu kecega sa volita na rara sa vakabai, sa malo matailalai ni wa muloci.
17Ia na veiqara ni veiduru sa parasa: ai ruberube e na duru kei na kedrai vau sa siliva: a sa siliva nai botani ni kedra domodomo: a sa vakaivau siliva na duru kecega ni rara sa vakabai.
18Ia na ka-rube mei sogo ni rara sa vakabai sa caka e nai cula, e na ka karakarawa, ka damudamu, ka rusivakula, kei na malo matailalai ni wa muloci: a sa vasagavulu na caga na kena balavu, kei na kena cecere (a ya na kena raraba) e tini na caga, me tauvata kei na gatu ni rara sa vakabai.
19A sa va na kedra duru, kei na kedratou qara parasa e va; sa siliva na kedrai ruberube, a sa siliva nai botani ni kedra domodomo kei na kedrai vau.
20Ia nai vakadei kecega ni vale-tikotiko, kei na rara e vakabai sa volita, sa parasa.
21O qo nai wiliwili ni yaya ni vale-tikotiko, ko ya na vale-tikotiko ni vunau, ni sa wiliki, me vaka na vunau i Mosese, ni ra sa cakava na luve i Levi, ka sa lewai ira ko Icamari, na luve i Eroni na bete.
22Ia ko Pisalieli na luve i Uri, na luve i Uri, e na yavusa i Juta, sa cakava na ka kecega sa vunautaka ko Jiova vei Mosese.
23A sa cakacaka kaya ko Aoliapi, na luve i Eiisamaki, e na yavusa i Tani, na matai dauceuceu, kei na matai dauca-kacaka vakavuku, ka sa daucula e na ka karakarawa, ka damudamu, ka rusivakula, kei na malo matailalai.
24Na koula kecega sa caka kina na cakacaka e na ka kecega sa caka e na tikina tabu, io na koula sa cabori, sa ruasagavulu ka ciwa na taledi, ka vitu na drau ka tolusagavulu na sikeli, me vaka na sikeli ni tikina tabu.
25Ia na nodra siliva era sa wiliki vei ira nai vavakoso, sa dua na drau na taledi, ka dua na udolu ka vitu na drau ka vitusagavulu ka lima na sikeli, me vaka na sikeli ni tikina tabu:
26sa yadua na peka mai na tamata yadua, ko ya sa dua na wase ni sikeli ni sa wase rua, me vaka na sikeli ni tikina tabu, maivei ira kecega era sa laʼki wiliki, sa ruasagavulu na nodra yabaki kei ira sa qase cake, maivei ira era lewe onosagavulu na oba ka tolu tale na udolu ka lima na drau ka limasagavulu.
27Ia na taledi siliva e dua na drau sa vakawaicalataki me qara ni tikina tabu, kei na qara ni lati; na taledi e dua na drau, me qara e dua na drau; sa dua na taledi ki na qara e dua.
28Ia na sikeli siliva e udolu ka vitu na drau ka vitusagavulu ka lima, sa cakava kina ko koya nai ruberube e na duru, ka botana na kedra domodomo, ka cakava na kedrai vau.
29Ia na parasa sa cabori sa vitusagavulu na taledi, ka rua na udolu ka va na drau na sikeli.
30A sa cakava kina ko koya na veiqara ki na katuba ni vale gatu ni veitata, kei nai cabocabo-ni-soro parasa, kei na kena miqa parasa, kei nai yaya kecega ni cabocabo-ni-soro;
31kei na veiqara ni rara e vakabai sa volita, kei na veiqara ni katuba ni rara sa vakabai, kei nai vakadei kecega ni vale-tikotiko, kei nai vakadei kecega ni rara e vakabai sa volita.
Who We AreWhat We EelieveWhat We Do
2025 by iamachristian.org,Inc All rights reserved.
