Na Lako Yani 37 - AI VOLA TABU（FIJ1864）

Ai valavala ni kato, 1-5, kei nai cabocabo-ni-bulubulu, 6-9. Ai kanakana kei na kenai yaya, 10-16. Ai tutu-ni-cina kei na kenai yaya, 17-24. Ai cabocabo ni boi vinaka vakamai, kei na waiwai tabu, 25-29.

1A sa cakava na kato e na kau sitimi ko Pisalieli: e lima na caga na kena balavu, ka tolu na caga na kena raraba, ka tolu na caga na kena cecere:

2a sa botana ko koya e na koula dina eloma etaudaku talega, a sa cakava kina e dua nai sala koula me volita.

3A sa vakawaicalataka na koula me mai va na kena mama, ki na tutuna e va; ia e rua na mama e na yasana e dua, ka rua na mama e na yasana kadua.

4A sa cakava e so nai vua e na kau sitimi, ka botana e na koula.

5A sa daramaka ko koya na veivua ki na mama e na yasana e rua ni kato, me colati kina na kato.

6A sa cakava ko koya e dua nai cabocabo-ni-bulubulu e na koula dina: e lima na caga na kena balavu, ka tolu na caga na kena raraba.

7A sa cakava ko koya e rua na jerupi koula, sa cakavi rau e nai tukituki me tu e na kubu ruarua ni cabocabo-ni-bulubulu;

8e dua na jerupi e na kubu e dua, ka dua na jerupi e na kubu kadua: mai nai cabocabo-ni-bulubulu sa cakava na jerupi ruarua, e na kena kubu e rua.

9A rau sa vakate taba kicake na jerupi, ka ubia nai cabocabo-ni-bulubulu e na tabadrau, a sa veiqaravi tu na matadrau; sa qarava talega nai cabocabo-ni-bulubulu na matadrau na jerupi.

10A sa cakava ko koya nai kanakana e na kau sitimi: e va na caga na kena balavu, ka rua na caga na kena raraba, ka tolu na caga na kena cecere:

11a sa botana e na koula dina, a sa cakava kina e dua nai sala koula me volita.

12Sa cakava talega na belena me raba ni liga na rabana me volita; a sa cakava e dua nai sala koula ki na belena me volita.

13A sa vakawaicalataka na koula me mai va na kena mama, ka vakota na mama ki na tutuna e va sa tu e na yavana e va.

14Era sa donuya na belena na mama, mei daradara ni veivua, me colati kina nai kanakana.

15A sa cakava ko koya na veivua e na kau sitimi, ka botana e na koula, me colati kina nai kanakana.

16A sa cakava nai yaya sa tu e dela ni kanakana, a kena veidari, kei na kena vei-taki, kei na kena veisedre, kei na kena veibilo, me livilivi kina, e na koula dina.

17A sa cakava ko koya nai tutu-ni-cina e na koula dina: sa cakava e nai tukituki nai tutu-ni-cina; na tolona, kei na tabana, na kena bilo lalai, na kenai ukuuku momokitikiti, kei na kena se-ni-kau, sa caka vakakina:

18kei na tabana e ono sa lako mai na yasana e rua; e tolu na taba ni tutu-ni-cina sa lako mai na yasana e dua, ka tolu na taba ni tutu-ni-cina mai na yasana kadua:

19e tolu na bilo sa vaka na amodi, e dua nai ukuuku momokitikiti, ka dua na se-ni-kau, e na tabana e dua; ka tolu na bilo sa vaka na amodi, e dua nai ukuuku momokitikiti, ka dua na se-ni-kau, e na tabana kadua: sa vakakina e na tabana e ono sa lako mai nai tutu-ni-cina.

20Ia e nai tutu-ni-cina sa va na bilo sa vaka na amodi, na nodratoui ukuuku momokitikiti, kei na nodratou se-ni-kau:

21ia sa dua nai ukuuku momokitikiti e ruku ni tabana e rua, ka dua nai ukuuku momokitikiti e ruku ni tabana e rua, ka dua nai ukuuku momokitikiti e ruku ni tabana e rua, me rau ta na tabana e ono sa lako maikina.

22Sa caka e na ka e dua na kedrai ukuuku momokitikiti kei na tabadra: o koya taucoko sa dua bauga na tiki ni koula dina sa tukilaki.

23A sa cakava ko koya na kena cina e vitu, kei na kenai koti-ni-cina, kei na kena dari ni de-ni-cina, e na koula dina.

24Sa cakava e na taledi koula dina, kei na kenai yaya kecega.

25A sa cakava ko koya nai cabocabo ni boi vinaka vakamai e na kau sitimi: e rua na caga na kena balavu, ka rua na caga na kena raraba; sa takiveilevu e na yasana e va, a sa va na caga na kena cecere; sa mai na nona kau na tikina sa tu cake.

26A sa botana ko koya e na koula dina, a delana, kei na veiyasana sa volita, kei na tikina sa tu cake: a sa cakava kina e dua nai sala koula me volita.

27A sa cakava kina na mama e rua e ruku ni nonai sala, e na tutuna e rua, e na yasana e rua, ka me ra daramaki kina nai vua me colati kina.

28A sa cakava na veivua e na kau sitimi, ka botana e na koula.

29A sa cakava ko koya na waiwai tabu mei lumu, kei na boi vinaka sara me vakamai e na kau boi vinaka, me vaka na nonai valavala sa veiwakitaka nai saluaki.