Na Lako Yani 36 - AI VOLA TABU（FIJ1864）

1Ia me kitaka na cakacaka ko Pisalieli kei Aoliapi, kei na tamata lomavuku kecega sa solia vei ira ko Jiova na lomavuku kei na yalomatua, me kila na cakacaka kecega me yaga e na cakacaka ni tikina tabu, me vaka na ka kecega sa vunautaka ko Jiova.

Ai taratara ni vale-tikotiko, 2-38.

2A SA kacivi Pisalieli kei Aoliapi ko Mosese, kei na tamata lomavuku kecega, sa vakavukuya na lomana ko Jiova, io ko ira kecega sa vakauqeti ira na lomadra me lako mai ki na cakacaka me kitaka:

3a ratou sa taura maivei Mosese nai solisoli kecega era sa kauta mai na luve i Isireli me caka kina na cakacaka me yaga e na tikina tabu, me cakava kina. A ra sa kauta tiko vei koya nai solisoli era sa marau kina, e na sabogibogi kecega.

4Ia ko ira kecega na tamata vuku, era sa kitaka na cakacaka kecega ni tikina tabu, era sa lako na tamata yadua mai na cakacaka sa cakava;

5a ra sa vosa vei Mosese, ka kaya, Era sa kauta mai na tamata na ka sa rauta na cakacaka sa vunautaka ko Jiova me cakava, ka vo vakalevu talega.

6A sa vakarota ko Mosese, a sa kacivaki voli e na koro, ka vaka, Me kakua na tagane se na alewa me cakava tale e dua na cakacaka me cabora me caka kina na tikina tabu. A ra sa vakadaroi na tamata me kakua ni kauta tiko mai.

7Ni sa rauta me cakava na cakacaka kece na ka sa kauti mai, ka sa vo tu yani.

8Ia na tamata lomavuku kecega vei ira sa kitaka na cakacaka, era sa cakava na gatu e tini e na malo matailalai ni wa muloci, kei na ka karakarawa, ka damudamu, ka rusivakula, me vale-tikotiko: sa cakava kina ko koya e so na jerupi, me vaka na cakacaka ni vuku.

9A kena balavu na gatu e dua e limasagavulu ka ono na caga, kei na kena raraba na gatu e dua e walu na caga: sa tauvata na kedrai vakarau na gatu kecega.

10A sa cula vata ko koya na gatu e lima, e dua ki na dua: ka sa cula vata na gatu e lima, e dua ki na dua.

11A sa cakava e so nai vakamatavili e na ka karakarawa e na bele ni gatu e dua, mai na bele ni ka sa cula: sa cakava vakakina e na bele ni gatu e saukana, e nai karua ni ka sa cula.

12Sa cakava e limasagavulu nai vakamatavili e na gatu e dua, ka limasagavulu nai vakamatavili e na bele ni gatu sa cula kaya na kenai karua: sa veitauri nai vakamatavili.

13A sa cakava e limasagavulu nai qila koula, a sa veiqilaititaka vata na gatu e dua ki na dua e nai qila: a sa vale-tikotiko e dua ga.

14A sa cakava ko koya e so na gatu e na vutika ni koti, mei ubi ni vale-tikotiko: sa cakava ko koya e tinikadua na gatu.

15A kena balavu na gatu e dua sa onosagavulu na caga, kei na kena raraba na gatu e dua sa walu na caga: sa tauvata na kedrai va karau na gatu e tinikadua.

16A sa cula e lima na gatu me dua, ka ono na gatu me dua.

17A sa cakava e limasagavulu nai vakamatavili e na bele ni gatu, e saukana e na ka sa cula, ka limasagavulu nai vakamatavili e na bele ni gatu a ya e nai karua ni ka sa cula.

18A sa cakava e limasagavulu nai qila parasa, me veiqilaititaka vata na vale gatu, me dua ga.

19A sa cakava ko koya e dua nai ubi ni vale gatu e na kuli ni sipi tagane sa somoti damudamu; kei na dua nai ubi ecake e na kuli tani.

20A sa cakava ko koya na veipapa ki na vale-tikotiko e na kau sitimi, me duri tu.

21A kena balavu e dua na papa e ruasagavulu na caga, kei na kena raraba e dua na papa e tolu na caga.

22Ki na papa e dua sa rua na tikina sa sivi, sa veidonui: sa cakava vakakina ko koya ki na papa kecega ni vale-tikotiko.

23A sa cakava na veipapa ni vale-tikotiko; e ruasagavulu na papa ki na yasana sa donuya na ceva:

24a sa cakava e vasagavulu na qara siliva e ruku ni papa e ruasagavulu; e rua na qara e ruku ni papa e dua, me rau dara kina na tikina sa sivi; ka rua na qara e ruku ni papa e dua, me rau dara kina na tikina sa sivi.

25Ia ki nai karua ni yasa ni vale-tikotiko, ko ya sa donuya na tokalau, sa cakava e ruasagavulu na papa;

26kei na kedra qara siliva e vasagavulu; e rua na qara e ruku ni papa e dua, ka rua na qara e ruku ni papa e dua.

27Ia ki na yasa ni vale-tikotiko sa donuya na ra, sa cakava e ono na papa.

28Ka rua na papa sa cakava ko koya ki na tutu ni vale-tikotiko e na yasana ruarua.

29Ia erau sa vauci vata era, ka vauci vata ecake, ki na mama e dua: sa cakava vakakina ko koya vei rau ruarua mai na tutuna e rua.

30A sa walu na papa, a sa tinikaono na qara na kedra veiqara siliva, e rua na qara e ruku ni papa yadua.

31A sa cakava ko koya e so na kolokolo e na kau sitimi: e lima ki na veipapa e na yasa e dua ni vale-tikotiko;

32ka lima na kolokolo ki na veipapa e nai karua ni yasa ni vale-tikotiko, ka lima na kolokolo ki na veipapa ni vale-tikotiko, ki na yasana sa donuya na ra.

33A sa cakava na kolokolo eloma, me darabasika na gau ni veipapa, mai na kubu e dua ki na kubu kadua.

34A sa botana na veipapa e na koula, a sa cakava e na koula na kedra veimama mei daradara ni veikolokolo, a sa botana na veikolokolo e na koula.

35A sa cakava ko koya nai lati e na ka karakarawa, ka damudamu, ka rusivakula, kei na malo matailalai ni wa muloci: sa cakava kina e so na jerupi, me vaka na cakacaka ni vuku:

36a sa cakava kina e va na duru sitimi, ka botana e na koula: sa koula ga na kedratoui ruberube; a sa vakawaicalataka na siliva me mai va na kedra qara.

37A sa cakava ko koya e dua na ka-rube mei sogo ni Vale gatu, e na ka karakarawa, ka damudamu, ka rusivakula, kei na malo matailalai ni wa muloci, sa caka e nai cula;

38kei na kena duru e lima, kei na kedratoui ruberube: a sa botana na kedra domo-domo kei na kedrai vau e na koula; a sa parasa ga na kedra qara e lima.