Na Lako Yani 35 - AI VOLA TABU（FIJ1864）

A siga tabu, 1-3. A ka sa cabori me caka kina na vale-tikotiko, 4-19. Era yalovinaka na tamata ni ra cabora, 20-29. Sa kacivi ko Pisalieli kei Aoliapi me matai levu, 30-35.

1A SA vakasoqona vata nai vavakoso taucoko ni luve i Isireli ko Mosese, a sa kaya vei ira, O qo na vosa sa vunautaka ko Jiova, mo dou cakava:

2E ono na siga me kitaki kina na cakacaka, ia na kenai kavitu ni siga ena tabu vei kemudou, a gauna ni vakacecegu me vakacegu kina vei Jiova: ko koya yadua sa kitaka kina na cakacaka ena vakamatei.

3Mo ni kakua ni waqaca na buka e na nomuni veivale e na siga ni vakacecegu.

4Sa vosa talega ko Mosese ki nai vavakoso taucoko ni luve i Isireli, ka kaya, O qo na ka sa vunautaka ko Jiova, ka vaka,

5Mo ni taura maivei kemuni nai solisoli vei Jiova: o koya sa lomasoli, me kauta ga mai ko koya nai solisoli vei Jiova; a koula, kei na siliva, kei na parasa,

6kei na ka karakarawa, ka damudamu, ka rusivakula, kei na malo matailalai, kei na vutika ni koti,

7kei na kuli ni sipi tagane sa somoti damudamu, kei na kuli tani, kei na kau sitimi,

8kei na waiwai ni cina, kei nai saluaki ni waiwai mei lumu, me kuria talega na kau boi vinaka me vakamai,

9kei na vatu onikisa, kei na vatu me vono kina nai sulu-me-vauci kei nai taube.

10Ia ko ira kecega sa loma vuku vei kemudou me lako mai, ka cakava na ka kecega sa vunautaka ko Jiova;

11na vale-tikotiko kei na kenai ubi, kei na kenai ubi etautuba, na kena veiqila, kei na kena veipapa, na kena veikolokolo, na kena veiduru, kei na kena veiqara,

12na kato, kei na kena veivua, nai cabocabo-ni-bulubulu, kei nai lati me rube,

13nai kanakana, kei na kena veivua, kei na kenai yaya kecega, kei na madrai dauraici,

14kei nai tutu-ni-cina ki na rarama, kei na kenai yaya, kei na kena veicina, kei na waiwai ni cina,

15kei nai cabocabo ni boi vinaka vakamai, kei na kena veivua, kei na waiwai mei lumu, kei na kau boi vinaka vakamai, kei na ka-rube mei sogo ni katuba era sa curu kina ki na vale-tikotiko,

16nai cabocabo ni soro kama, kei na kena miqa parasa, na kena veivua, kei na kenai yaya kecega, nai deredere kei na kenai tutu,

17na gatu ni rara, na kena veiduru, kei na kedra veiqara, kei na ka-rube mei sogo ni rara sa vakabai,

18nai vakadei ni vale-tikotiko, kei nai vakadei ni rara sa vakabai, kei na kedra dali,

19na veisulu me cakacaka kina, me qaravi kina e na tikina tabu, na veisulu tabu i Eroni na bete, kei na nodratou veisulu na luvena, me ia kina na cakacaka vakabete.

20A ra sa lako tani e na mata i Mosese nai vavakoso taucoko ni luve i Isireli.

21A ra sa lako mai ko koya yadua sa vakauqeti koya na lomana, kei koya yadua sa marau kina na lomana, era sa kauta mai nai solisoli vei Jiova me kitaki kina na cakacaka ni vale gatu ni veitata, kei na kenai valavala kecega, kei na veisulu tabu.

22A ra sa lako mai na tagane kei na alewa, ko ira kecega sa marau kina na lomadra, ka kauta mai na qato, kei na sau ni daliga, kei na mama, kei nai vau, kecega nai yaya koula; ia na tamata kecega sa cabora e dua nai solisoli koula vei Jiova.

23Kei na tamata yadua sa kune vua na ka karakarawa, ka damudamu, ka rusivakula, kei na malo matailalai, kei na vutika ni koti, kei na kuli ni sipi tagane sa somoti damudamu, kei na kuli tani, sa kauta ga mai.

24O ira kecega sa cabora e dua nai solisoli siliva kei na parasa sa kauta nai solisoli vei Jiova: kei na tamata yadua sa kune vua na kau sitimi sa yaga e na dua na cakacaka sa cakavi, sa kauta ga mai.

25Kei ira na alewa kecega sa lomavuku, era sa mulomulo e na ligadra, ka kauta mai na ka era muloca, io na ka karakarawa, ka damudamu, na ka rusivakula, kei na malo matailalai.

26Kei ira na alewa kecega sa vakauqeti ira na lomadra e na vuku, era sa muloca na vutika ni koti.

27Ia ko ira na turaga, era sa kauta mai na vatu onikisa, kei na vatu me vono kina nai sulu-me-vauci kei nai taube;

28kei na ka boi vinaka, kei na waiwai ni cina, kei na waiwai mei lumu, me kuria talega na kau boi vinaka me vakamai.

29Era sa kauta mai vei Jiova na luve i Isireli nai solisoli era sa marau kina, io, ko ira kecega na tagane kei na alewa sa marautaka na yalodra me kauta mai ki nai valavala ni cakacaka kecega, a ya sa vunautaka e na gusu i Mosese ko Jiova me caka.

30A sa kaya ko Mosese vei ira na luve i Isireli, Raica, sa cavuta ko Jiova na yaca i Pisalieli na luve i Uri, na luve i Uri, e na yavusa i Juta;

31a sa vakasinaiti koya e na Yalo ni Kalou, e na vuku, e na yalomatua, kei na daukila-ka, kei na cakacaka kecega;

32ka me vakasama na cakacaka vakavuku, me cakacaka e na koula, kei na siliva, kei na parasa,

33kei na dauta vatu, me vono, kei na dauceu kau, me kitaka na cakacaka vakavuku kecega.

34A sa vakatubura ko koya e lomana me via vakavuvuli, io ko koya kei Aoliapi, na luve i Eiisamaki, e na yavusa i Tani.

35Sa vakasinaiti rau ko koya e na lomavuku, me kitaka na cakacaka kecega ni matai dauceuceu, kei na matai dauvakasama, kei na dau ni culacula e na ka karakarawa ka damudamu, na ka rusivakula kei na malo matailalai, kei na matai dautalitali, io na dau ni cakacaka kecega, kei ira era vakasama na cakacaka vakavuku.