Na Lako Yani 34 - AI VOLA TABU（FIJ1864）

A Sa taya e rua na vatu raraba ko Mosese, ka cabeta na ulu-ni-vanua; a sa lako sobu ko Jiova, ka kacivaka na yacana, 1-9. Sa rotaka tale e so na ka ko Jiova, a sa tiko ka vasagavulu na bogi ko Mosese e na ulu-ni-vanua, 10-28. Sa cila na mata i Mosese, a sa puloutaka, 29-35.

1A SA kaya vei Mosese ko Jiova, Mo taya vei iko e rua na vatu raraba, me vaka na kena eliu: ia kaʼu na vola e na ka raraba na vosa ka tu e na ka raraba, ko a vorota:

2ia mo vakarau e na sabogibogi, ka cabeta na ulu-ni-vanua ko Sinei e na sabogibogi, ka tu e mataqu maikea e na dela ni ulu-ni-vanua:

3ia me kakua e dua na tamata kemudrau cabe vata kaya, me kakua talega ni raici e dua na tamata e na ulu-ni-vanua taucoko; ia me kakua ni kana voli na sipi se na karavau e na mata ni ulu-ni-vanua ko ya.

4A sa taya ko koya e rua na vatu raraba me vaka na kena eliu; a sa sou e na sabogibogi ko Mosese, ka cabeta na ulu-ni-vanua ko Sinei, me vaka ka vunautaka vua ko Jiova, a sa kauta e ligana na vatu raraba e rua.

5A sa lako sobu ko Jiova e na o, ka tu vata kaya maikea, ka kacivaka na yaca i Jiova.

6A sa lako voli e matana ko Jiova, ka kacivaki, Jiova, Jiova na Kalou, sa yalololoma ka daulo-masoli, sa vosovoso vakadede, ka sa levu na yalovinaka kei na dina,

7sa maroroya na yalovinaka vei ira era vakau-dolu, sa tawa cudru vaka na caka ca kei na talaidredre kei nai valavala ca, ia sa sega ga ni vakadonuya kece; sa cudruvaka na nodra caka ca na qase vei ira na luvedra, kei na makubudra, ka yacova nai katolu ni tabatamata, kei na kenai kava.

8A sa kusarawa ko Mosese, ka cuva ki na qele, ka soro:

9a sa kaya, I Turaga, kevaka kemuni sa lomani au, me lako mada kei keimami na noqu Turaga; ni ra sa tamata domoqa ko ira; mo kakua talega ni cudruvaka na neimami caka ca, kei na neimami caka cala, ia mo ni taukeni keimami.

10A sa kaya ko koya, Raica, kaʼu sa ia na veiyalayalati; au na kitaka na cakacaka mana e na matadra kecega na nomu tamata, sa sega e tautauvata sa caka e vuravura kecega, se na matanitu e dua: ia ko ira na tamata kece ko sa tiko e na kedra maliwa, era na raica na cakacaka i Jiova: ni sa ka vakadomobula kaʼu na kitaka vei iko.

11Mo muria na ka kaʼu sa vunautaka vei iko edaidai: raica, kaʼu sa vakasevi ira tani e matamu na luve i Amori, kei ira na kai Kenani, kei ira na luve i Eci, kei ira na lewe ni Veikoro lalai, kei ira na luve i Evi, kei ira na kai Jepusa.

12Mo qarauni iko, de ko ia na veiyalayalati kei ira na lewe ni vanua ko sa lako kina, dei cori e na kemuni maliwa o qo:

13ia dou na vakacacana na nodrai cabocabo-ni-soro, ka musumusuka na nodra matakau, ka taya laivi na nodra kalou-alewa ni veikau:

14ni sa tabu mo soro va na kalou tani: ni sa Kalou vu vu ko Jiova, o koya sa ko Vuvu na yacana:

15de ko ia na veiyalayalati kei ira na lewe ni vanua ko ya, a ra sa lako tani me muri ira na nodra kalou, ka cabora nai soro vei ira na nodra kalou, ka ko sa kacivi, ko sa qai laʼki kana e na nodrai soro;

16ko qai kauta e so na nodra gonealewa me watidra na luvemu, a sa lako tani ko ira na nodra gonealewa me muri ira na nodra kalou, ka kauti ira na luvemu tagane me lako tani me muri ira na nodra kalou:

17mo kakua ni cakava vei iko na kalou e na ka vakawaicalataki.

18Mo vakabauta tiko na solevu ni ka tawa vakaleveni. E vitu na bogi mo kania kina na ka tawa vakaleveni, me vaka kaʼu a vunau vei iko, e na tabayabaki e na vula ko Apipi: ni ko a lako tani mai Ijipita e na vula ko Apipi.

19Sa noqu na ulumatua kecega; kei na ulumatua tagane kecega ni nomu manumanu, se karavau, se sipi.

20Ia na ulumatua ni asa mo volia e na lami: ia kevaka ko sa tawa via volia, mo qai musuka na domona. A ulumatua kecega vei ira na luvemu tagane mo volia. Ia me kakua e dua me rairai lala e mataqu.

21E ono na siga mo cakacaka kina, ia e na kenai kavitu ni siga mo vakacegu: io, e na vula i teitei kei na vula i tamusuki sila mo vakacegu.

22Mo ia na solevu ni veiwiki talega, e nai sevu ni witi, kei na solevu ni kumukumuni ni sa cava na yabaki.

23O ira kecega na luvemu tagane, me rairai vakatolu e na veiyabaki e na mata i Jiova na Turaga, na Kalou nei Isireli.

24Ni kaʼu na vakasevi ira e matamu na veimatanitu, ka vakarabailevutaka na nomu vanua: ia ena sega e dua na tamata me domona na nomu vanua, ni ko sa lako cake vakatolu e na veiyabaki me rairai e na mata i Jiova na nomu Kalou.

25Mo kakua ni cabora vata kei na ka sa vakaleveni na dra ni noqui soro; me kakua talega ni vo nai soro ni solevu ni lako-sivia me yacova na sabogibogi.

26Ai matai ni sevu ni nomu vanua mo kauta ki na vale i Jiova na nomu Kalou.

Mo kakua ni saqata na luve ni koti e na wai-ni-sucu i tinana.

27A sa kaya vei Mosese ko Jiova, Mo vola na vosa o qo; ni sa vaka na vosa o qo kaʼu sa kitaka e dua na veiyalayalati kei iko kei ira na Isireli.

28A sa tiko maikea kei Jiova ko koya ka siga e vasagavulu ka bogi e vasagavulu; a sa sega ni kana kakana, se gunu wai. A sa vola e na ka raraba ko Jiova na vosa ni veiyalayalati, io na vunau e tini.

29A sa yaco, ni sa lako sobu ko Mosese mai na ulu-ni-vanua ko Sinei, a sa taura na liga i Mosese na ka raraba e rua ni vunau, ni sa lako sobu mai na ulu-ni-vanua ko koya, sa sega ni kila ko Mosese ni sa serau na kuli ni matana ni sa veivosaki kaya ko Koya.

30A sa raici Mosese ko Eroni kei ira kecega na luve i Isireli, ka, raica, sa serau na kuli ni matana; a ra sa rere ni torovi koya.

31A sa kacivi ira ko Mosese; a sa lesu vua ko Eroni kei ira kece na turaga ni vavakoso: a sa veivosaki kei ira ko Mosese.

32A sa oti era qai toro va ko ira kece na luve i Isireli: a sa vunautaki ira ko koya e na ka kecega ka vosataka vua ko Jiova mai na ulu-ni-vanua ko Sinei.

33Ia ni sa oti na nona veivosaki kei ira ko Mosese, sa qai puloutaka na matana ko koya.

34Ia ni sa curu ko Mosese ki na mata i Jiova me vosa vua, sa luvata tiko na pulou, ka me curu mada mai kitautuba. A sa qai curu tale mai kitautuba, ka tukuna vei ira na luve i Isireli na ka sa vunautaki vua.

35A ra sa raica na mata i Mosese na luve i Isireli, ni sa serau na kuli ni mata i Mosese: a sa puloutaka tale na matana ko Mosese, ka yacova na nona curu me vosa vei Koya.