1A sa kaya vei Mosese ko Jiova, Mo ia, mo lako cake tani eke, ko iko kei ira na tamata ko a kauta cake mai na vanua ko Ijipita, ki na vanua kaʼu a vosavavakini kina vei Eparaama, vei Aisake, kei Jekope, niʼu a kaya, Kaʼu na solia vei ira na nomu kawa:
2ia kaʼu na tala e dua na agilose me liutaki iko; ia kaʼu na vakasevi ira tani na kai Kenani, kei ira na luve i Amori, kei ira na luve i Eci, kei ira na lewe ni Veikoro lalai, kei ira na luve i Evi, kei ira na kai Jepusa:
3io, mo lako ki na vanua sa dave kina na wai-ni-sucu kei na oni: niʼu na tawa lako cake e na kemuni maliwa; ni kemuni sa tamata domoqa: deʼu vakarusai kemuni e na gau-ni-sala.
4Ia ni ra sa rogoca nai rogorogo ca o qo na tamata, era sa tagi: a sa sega na tamata sa vakaiukuukutaki koya e nonai ukuuku.
5Ni sa kaya oti eliu vei Mosese ko Jiova, Mo kaya vei ira na luve i Isireli, Oi kemuni sa tamata domoqa: kevaka kaʼu na lako cake vakalekaleka ga e na kemuni maliwa, kaʼu na vakarusai kemuni: o koya o qo, mo ni luvata tani mada vei kemuni na nomuni ukuuku; meʼu kila kina na ka meʼu kitaka vei kemuni.
6A ra sa luvata tani na nodrai ukuuku na luve i Isireli, ni ra sa lako mai na ulu-ni-vanua ko Orepi.
7A sa kauta na Vale gatu ko Mosese, ka laʼki birika mai nai bili ni koro, me veiyawaki kei na koro, ka sa vakayacana, Na Vale gatu ni Veitata. Ia ko ira kecega era sa via qaravi Jiova sa lako ki nai bili ki na vale gatu ni veitata, a ya mai nai bili ni koro.
8Ia ni sa lako yani ki na vale gatu ni veitata ko Mosese, era sa qai tu cake na tamata kecega, ka tu yadua e na katuba ni nona vale gatu, ka rai yani vei Mosese, ka me curu oti mada ko koya ki na Vale gatu.
9A sa yaco, ni sa curuma na Vale gatu ko Mosese, sa qai lako sobu na duru o, ka tu mai na katuba ni Vale gatu, a rau sa veivosaki kei Mosese ko Jiova.
10A ra sa raica na duru o na tamata kecega ni sa tu mai na katuba ni Vale gatu: a ra sa tu cake na tamata kecega ka soro, na tamata yadua e na katuba ni nona vale gatu.
11A sa vosa vei Mosese ko Jiova ni rau veiraici mata tu, me vaka na nodrau veivosaki na tamata kei na wekana. A sa lesu ko koya ki na koro: ia na nonai talatala ko Josua, na luve i Nuni, a cauravou, sa sega ni lako tani mai na Vale gatu.
12A sa kaya vei Jiova ko Mosese, Raica, kemuni sa kaya vei au, Mo kauti ira cake na tamata o qo: ia kemuni sa sega ni vakatakila vei au se ko cei kemuni na talai keirau vata: ia kemuni a kaya ga, Au sa kila na yacamu, ia kaʼu sa lomani iko talega.
13Au sa qai masuti kemuni mada, kevaka kemuni sa lomani au, mo ni vakatakila mai vei au na nomuni valavala, meʼu kilai kemuni, mo ni lomani au kina: mo ni nanuma talega ni ra sa nomuni tamata na matanitu o qo.
14A sa kaya ko koya, Ko ya kaʼu sa kilai kina, ena lako, kaʼu na vakacegui iko.
15A sa kaya vua ko koya, Kevaka sa sega ni lako ko ya kemuni sa kilai kina, mo ni kakua ni kauti keimami cake tani eke:
16ia na cava na ka ena kilai kina eke ni kemuni sa lomani au kei ira na nomuni tamata? e sega li na ka ga o qo, ni kemuni sa lako kei keimami? keimami na tawase tani kina, koi au kei ira na nomuni tamata, vei ira na tamata kecega sa tiko e dela i vuravura.
17A sa kaya vei Mosese ko Jiova, Au na cakava talega na ka o qo ko sa vosa kina: niʼu sa lomani iko, kaʼu sa kila talega na yacamu.
18A sa kaya ko koya, Au masuti kemuni, mo ni vakaraitaka vei au na nomuni ukuuku.
19A sa kaya ko koya, Au na cakava me lako e matamu na noqu vinaka kecega, ia kaʼu na kacivaka na yaca i Jiova e matamu; ia kaʼu na lomasoli vei ira kaʼu via lomasoli kina, ka yalololoma vei ira kaʼu via yalololoma kina.
20A sa kaya, E dredre mo raica na mataqu: ni sa sega na tamata me raici au, ka bula.
21Sa kaya talega ko Jiova, Raica, sa dua na tikina sa voleka vei au, ia ko na tu e na dela ni Uluvatu:
22ia ena yaco, ni sa lako voli na noqui ukuuku, kaʼu na qai kauti iko ki na gusu ni Uluvatu, ka ubi iko e ligaqu niʼu sa lako voli yani kina:
23ia kaʼu na qai kauta tani na ligaqu, mo na raica kina na dakuqu: ia na mataqu ena sega ni raici.
Who We AreWhat We EelieveWhat We Do
2025 by iamachristian.org,Inc All rights reserved.
