1IA ni ra sa raica na tamata ni sa berabera ko Mosese ni lako sobu mai na ulu-ni-vanua, sa ra soqoni vata vei Eroni na tamata, ka kaya vua, Mo ia, mo cakava vei keda na kalou, me liutaki keda; ni ko Mosese ko ya, na tamata ka kauti keda cake mai na vanua ko Ijipita, eda sa sega ni kila se cava beka sa yaco vua.
2A sa kaya vei ira ko Eroni, Mo ni musuka tani na sau koula sa vakasau kina na daligadra na wa-timuni, kei na luvemuni tagane, kei na luvemuni alewa, ka kauta mai vei au.
3Ia ko ira na tamata kecega era sa musuka tani na sau koula sa vakasau kina na daligadra, ka kauta vei Eroni.
4A sa taura ko koya mai na ligadra, a sa cakava e na veleko, ka vakawaicalataka, ka bulia kina e dua na luve ni karavau: a ra sa kaya, I Isireli, o qo na nomu kalou, sa kauti iko cake mai na vanua ko Ijipita.
5Ia ni sa raica ko Eroni, sa cakava e dua nai cabocabo-ni-soro me tu e matana; a sa kailavaka yani ko Eroni, ka vaka, Sa ia na solevu vei Jiova e na sabogibogi.
6A ra sa sou e na sabogibogi, ka cabora nai soro kama, ka kauta mai nai madrali e na veivinakati; a ra sa tiko sobu na tamata me kana ka gunu, ka tu cake me qito.
7A sa kaya vei Mosese ko Jiova, Mo ia, mo lako sobu; ni ra sa vakadukadukalitaki ira ko ira na nomu tamata, ko a kauta cake mai na vanua ko Ijipita:
8era sa lako tani vakasauri mai na sala kaʼu a vunautaka vei ira; era sa bulia vei ira e dua na luve ni karavau sa vakawaicalataka, a ra sa soro kina, ka cabora kina nai soro, ka kaya, I Isireli, o qo na nomu kalou, sa kauti iko cake mai na vanua ko Ijipita.
9Sa kaya talega vei Mosese ko Jiova, Au sa raici ira oti na tamata o qo, ka, raica, era sa tamata domoqa:
10ia o qo, mo laivi au mada, me waqawaqa vei ira na noqu cudru, ia meʼu vakarusai ira: ia kaʼu na cakavi iko mo matanitu levu.
11A sa vakamasuti Jiova na nona Kalou ko Mosese, ka kaya, I Jiova, a cava sa waqa mai kina na nomu cudru vei ira na nomu tamata, ko a kauta tani mai na vanua ko Ijipita e na kaukauwa levu, kei na liga qaqa?
12a cava me ra vosa kina na kai Ijipita, ka kaya, Sa kauti ira tani ko koya me ra ca ga, ka me vakamatei ira e na veiulu-ni-vanua, ka me vakarusai ira mai dela i vuravura? Mo lesu tani mai na nomu cudru waqawaqa, ka veivutunitaka na nodra cudruvi na nomuni tamata.
13Mo nanumi Eparaama, kei Aisake, kei Isireli, na nomu tamata, ko iratou ko a cakavi iko kina me vosa vavakini, ka kaya, Au na vakalewevuqataka na nomudou kawa me ra vaka na veikalokalo ni lomalagi, ia kaʼu na solia vei ira na nomudou kawa na vanua kecega o qo kaʼu sa vosa kina, me ra kenai taukei ka tawa mudu.
14A sa veivutunitaka ko Jiova na cudru ka kaya me kitaka vei ira na nona tamata.
15A sa gole tani ko Mosese, ka lako sobu mai na ulu-ni-vanua, a sa taura e ligana na ka raraba e rua ni vunau: na ka raraba sa volai e babadrau ruarua, sa takiveivola na veiyasana ruarua.
16Ia na ka raraba ko ya na cakacaka ni Kalou, na kedraui volavola talega nai volavola ni Kalou, sa ceuti e na ka raraba.
17Ia ni sa rogoca ko Josua na domo ni tamata ni ra kaila, sa kaya vei Mosese, Sa dua na domo ni valu mai na koro.
18A sa kaya ko koya, Sa sega ni domo ni kaila ni sa gumatua, sa sega talega ni domo ni qoqolou ni sa guca: a domo ni sere ga kaʼu sa rogoca.
19Ia ni sa laʼki voleka ki na koro, sa qai kunea na luve ni karavau, kei na meke: a sa waqa mai na cudru i Mosese, a sa viritaki rau yani na ka raraba mai na ligana, ka tebeka e ruku ni ulu-ni-vanua.
20A sa kauta ko koya na luve ni karavau ka ra cakava, ka vakama e na buka, ka vurumemea, ka vakamiraka ki na wai, ka vagunuvi ira kina na luve i Isireli.
21A sa kaya vei Eroni ko Mosese, A cava na ka era cakava vei iko na tamata o qo, mo vakayacora kina vei ira nai valavala ca levu?
22A sa kaya ko Eroni, Me kakua mada ni waqawaqa mai na cudru ni noqu turaga: o sa kilai ira na tamata o qo, ni ra sa ca vakaidina.
23A ra sa kaya vei au, Mo cakava vei keda na kalou, me liutaki keda; ni ko Mosese ko ya, na tamata ka kauti keda cake mai na vanua ko Ijipita, eda sega ni kila se cava beka sa yaco vua.
24Au a qai kaya vei ira, O koya sa dua nona koula, me musuka tani. A ra sa solia mai vei au: kaʼu a qai biuta ki loma ni buka waqa, a sa lako mai na luve ni karavau o qo.
25A sa kunei ira na tamata ko Mosese ni ra sa sereki tu; (ni ka vakasereki ira ko Eroni, ka me ra vakamaduataki e na kedra maliwa na nodra meca):
26sa qai laʼki tu ko Mosese mai na matamata-ni-koro, ka kaya, Mada mai vei au, ko koya sa totaki Jiova! A ra sa soqoni vata vua ko ira kece na luve i Levi.
27A sa kaya vei ira, Sa vosa vakaoqo ko Jiova na Kalou i Isireli, Yadua na tamata, me vauca na nonai seleiwau ki na sarisarina; me lako basika na koro mai na matamata-ni-koro e dua ki na matamata-ni-koro e dua, ia na tamata yadua me vakamatea na wekana, kei na tamata yadua na nonai tokani, kei na tamata yadua na kai nona.
28A sa cakava me vaka na vosa i Mosese ko ira na luve i Levi: a sa baleti ira na tamata e na siga ko ya e tolu beka na udolu na tamata.
29Ni sa kaya oti ko Mosese, Dou buli kemudou edaidai me nei Jiova, na tamata yadua e na vakamatea na luvena, kei na wekana; ka mo dou vakalougatataki kina edaidai.
30Ia e na sabogibogi sa kaya vei ira na tamata ko Mosese, Kemuni sa kitaka e dua nai valavala ca levu: ia o qo, kaʼu na qai cabe cake vei Jiova; kaʼu na buluta rawa beka na nomudoui valavala ca.
31A sa lesu vei Jiova ko Mosese, ka sa kaya, Ule! na tamata o qo era sa kitaka nai valavala ca levu, ka cakava na kalou koula vei ira!
32ia o qo, ko na kakua beka ni cudru vaka na nodrai valavala ca; ia kevaka sa sega, mo bokoci au laivi mada mai na nomui vola ko sa vola.
33A sa kaya vei Mosese ko Jiova, O koya yadua sa valavala ca vei au, kaʼu na bokoca laivi mai na noqui vola:
34ia mo lako madani, mo tuberi ira na tamata ki na vanua kaʼu a vosa kina vei iko: raica, na noqu Agilose ena liutaki iko: ia e na siga kaʼu sa talevi ira kina, kaʼu na cudru vaka kina na nodrai valavala ca.
35A sa yaviti ira na tamata ko Jiova, e na vuku ni luve ni karavau era a cakava, io ko ya ka cakava ko Eroni.
Who We AreWhat We EelieveWhat We Do
2025 by iamachristian.org,Inc All rights reserved.
